Nakai leva ato mate a Iesu, ne fakatutala a ia hokoia ni mo e tokofā he haana tau tutaki​—Peteru, Iakopo, Ioane, mo Aneterea. He talahau tuai e Iesu e fakamailoga he haana ha ha hinei he tau aho fakamui, ne fakalagā e ia e hūhū aoga: “Ko hai foki e fekafekau fakamoli mo e loto matala, kua kotofa he hana iki ke pule ke he hana tau fekafekau mo e age kia lautolu e tau mena kai ke he tau magaaho?” (Mataio 24:3, 45; Mareko 13:3, 4) Kua fakamafana e Iesu e tau tutaki haana ko ia ko e ha lautolu a “iki,” to kotofa e ia a lautolu ka foaki e tau mena kai fakaagaaga ne hau tumau ma e tau tutaki haana he vahā he fakaotiaga. Ko hai kua fakakatoa e fekafekau nei?

Ko e matakau tote he tau tutaki ha Iesu ne fakauku he agaaga. Ko e “fekafekau” ne tata lahi mo e Kau Fakatufono he Tau Fakamoli a Iehova. Ne fakatoka mai ai e tau mena kai fakaagaaga he magaaho tonu ke he tau tagata tapuaki ha Iehova. Kua falanaki a mautolu ke he fekafekau fakamooli nei ke foaki tumau mai ki a mautolu e ha mautolu a “tau mena kai ke he tau magaaho.”​—Luka 12:42.

Leveki ai e fale po ke tau tagata he Atua. (1 Timoteo 3:15) Ne age e Iesu ke he fekafekau e matagahua mamafa he leveki e gahua he vala he fakatokatokaaga ha Iehova he lalolagi​—he leveki e tau koloa fakatino, takitaki e gahua fakamatala, mo e fakaako a mautolu ke he puhala he tau fakapotopotoaga ha mautolu. Ti foaki ki a mautolu e tau mena kua lata mo mautolu, ko e “fekafekau fakamoli mo e loto matala” kua fakatoka mai e tau mena kai fakaagaaga puhala he tau tohi kua fakaaoga e mautolu he gahua he fonua, ti pihia mo e tau fakaholoaga kua foaki he ha mautolu a tau feleveiaaga mo e tau toloaga.

Ko e fekafekau kua fakamoli ke he tau kupu mooli he Tohi Tapu mo e poakiaga ke fakamatala e tala mitaki, ti kua loto matala hagaao ke he puhala kua leveki fakapulotu ai ma e tau mena he Keriso he lalolagi. (Gahua 10:42) Kua fakamonuina e Iehova e gahua haana aki e holo ki mua mo e tau foakiaga fakaagaaga loga.​—Isaia 60:22; 65:13.

• Ko hai ne fakauku e Iesu ke fagai fakaagaaga e tau tutaki haana?

• He tau puhala fe kua fakamoli mo e loto matala e fekafekau?

He senetenari fakamua, ko e matakau tote he “tau aposetolo mo e tau patu ki Ierusalema,” ne fekafekau ko e kau fakatufono ke taute e tau fifiliaga aoga ke lata mo e tau fakapotopotoaga Kerisiano fakauku katoatoa. (Gahua 15:2) Ka taute e lautolu e fifiliaga kua talia oti, kua fua mai ai ha kua fakatutala ke he mena ne talahau he tau Tohiaga Tapu mo e fakatokatoka atu ke he fakaohoohoaga he agaaga he Atua. (Gahua 15:25) Ko e puhala ia kua muitua he vahā nei.

Ne fakaaoga ai he Atua ke taute haana finagalo. Ko e tau matakainaga taane fakauku ne fekafekau ko e Kau Fakatufono kua fiafia lahi ke he Kupu he Atua mo e lahi e iloaaga he taute e tau mena kua aoga mo e fakaagaaga. Kua feleveia a lautolu he tau faahi tapu takitaha ke fakatutala e tau manako he tau matakainaga he lalolagi katoa. Tuga he senetenari fakamua, ko e tau fakatonuaga ne fakavē ke he Tohi Tapu kua foaki puhala he tau tohi po ke he tau leveki faifano mo e falu. Kua fakaholo ki mua he mena nei e kaufakalataha he manatu mo e gahua he tau tagata he Atua. (Gahua 16:4, 5) Kua leveki he Kau Fakatufono e tau tauteuteaga he tau mena kai fakaagaaga, tuku fakamua e gahua fakamatala he Kautu, mo e takitaki e tau matagahua he foaki e tau kotofaaga ke he tau matakainaga taane.

Ko e muitua ke he takitakiaga he agaaga tapu he Atua. Ko e Kau Fakatufono kua ono atu ke he Pule Katoatoa he Lagi mo e Lalolagi ko Iehova, mo e Ulu he fakapotopotoaga ko Iesu, ke moua e takitakiaga. (1 Korinito 11:3; Efeso 5:23) Nakai onoono a lautolu ki a lautolu ko e tau takitaki he tau tagata he Atua. Ko lautolu, fakalataha mo e tau Kerisiano fakauku “kua mumui atu ke he Punua mamoe [Iesu] ke he tau mena oti kua fano a ia ki ai.” (Fakakiteaga 14:4) Kua loto fakaaue e Kau Fakatufono ke he tau liogi ha mautolu ke lata mo lautolu.

• Ko hai he kau fakatufono he senetenari fakamua?

• Kumi fēfē he Kau Fakatufono he vahā nei e takitakiaga he Atua?