Ko e Peteli ko e higoa Heperu ne kakano “fale ni he Atua.” (Kenese 28:17, 19) Ko e higoa kua latatonu ma e fale ne fakatū he Tau Fakamoli a Iehova he lalolagi katoa ne takitaki mo e lalago e gahua fakamatala. Kua fekafekau e Kau Fakatufono he tau matapatu he lalolagi i New York State i U.S.A., ti leveki e lautolu e gahua he tau lā ofisa he tau motu loga. Ko e matakau, ko lautolu ne fekafekau he tau fale nei kua iloa ai ko e magafaoa Peteli. Tuga e magafaoa, ne nonofo mo e gahua auloa a lautolu, kai auloa, ti fakaako auloa e Tohi Tapu. ​—Salamo 133:1.

Ko e matakavi uho lahi ne foaki noa he tau tagata he magafaoa a lautolu ni. He tau fale takitaha he Peteli, ha ha i ai e tau tagata taane mo e tau fifine Kerisiano ne gahua malolō ke he finagalo he Atua mo e gahua katoatoa ke he tau mena he Kautu. (Mataio 6:33) Nakai fai ia lautolu kua moua e totogi lahi, ka e moua e lautolu e tau poko mo e tau levekiaga mo e lagomataiaga fakatupe ke leveki aki e tau mena fakatagata. Igatia e tau tagata oti he Peteli mo e matagahua, he ofisa, fale tunu kai, po ke poko kai. Falu ne gahua lomi tohi po ke pota, po ke fakameā he tau poko, fale unu, fale leveki mena malona, po ke falu mena foki.

Ko e matakavi lavelave ne lalago e fakamatala he Kautu. Ko e matapatu foliaga he tau Peteli oti ke hokotia e kupu mooli he Tohi Tapu ke he tau tagata tokologa. Ko e porosua nei ko e taha fakataiaga he mena ia. Ne tohi ai i lalo he takitakiaga he Kau Fakatufono, utafano he Initanete ke he tau matakau fakaliliu totou teau he lalolagi, lolomi he tau matini lomi tohi ne holo mafiti he Peteli, ti fakafano atu ke he molea e 110,000 he tau fakapotopotoaga. He tau fakaholoaga oti, kua foaki he tau magafaoa Peteli e lalagoaga kua latatonu ke he gahua mafiti lahi mahaki​—ko e fakamatala e tala mitaki.​—Mareko 13:10.

• Ko hai ne gahua he Peteli, ti ko e heigoa e tau levekiaga ne taute ma lautolu?

• Ko e heigoa e gahua mafiti kua lalago he tau matagahua he tau Peteli takitaha?

Ko e tau tagata he magafaoa Peteli kua gahua he tau faahi kehekehe, he leveki e gahua fakamatala he taha po ke loga e motu. Liga gahua a lautolu he tau matakau fakaliliu, lomi he tau mekasini, pota he tau tohi, fakaholoaga leveki he tau tohi, taute e tau ata autiō/vitiō, po ke leveki falu matagahua he magamotu.

Ko e La Komiti ne leveki e gahua. Kua tuku age he Kau Fakatufono e fakatokaaga ke he tau la ofisa takitaha ke he Komiti he La ne ha ha i ai tokotolu e motua lotomatala lahi. Kua fakailoa tumau he komiti ke he Kau Fakatufono e holo ki mua he gahua he tau motu takitaha i lalo he levekiaga he komiti ia mo e tau lekua ne liga tutupu. Ko e tau hokotakiaga pihia kua lagomatai e Kau Fakatufono ke fifili e tau matakupu kua lata ma e tau tohi, mo e he tau feleveiaaga mo e tau toloaga he tau mogo i mua. Ko e tau hukui he Kau Fakatufono kua fakafano tumau ke ahiahi e tau la mo e foaki e takitakiaga ma e tau La Komiti ke fakatokatoka aki e tau kotofaaga ha lautolu. (Tau Fakatai 11:14) Ko e fakaholoaga pauaki kua putoia e lauga he hukui he matapatu ofisa kua fakatoka ke fakamalolō a lautolu ne nonofo he matakavi he la ia.

Lalagoaga ne foaki ke he tau fakapotopotoaga he matakavi. Ko e tau matakainaga taane iloilo he la ofisa kua talia e fakatokaaga he tau fakapotopotoaga foou. Kua takitaki foki he tau matakainaga taane e gahua he tau paionia, tau misionare, mo e tau leveki takaiaga kua fekafekau he la he matakavi. Ne fakatokatoka e lautolu e tau toloaga mo e tau fonoaga, leveki e talagaaga he tau Fale he Kautu foou, mo e matakaki kua fakafano atu e tau tohi ke he tau fakapotopotoaga ke lata mo lautolu. Ko e tau mena oti ne taute he la kua lafi ke he fakatokatokaaga maopoopo he gahua fakamatala.​—1 Korinito 14:33, 40.

• Lalago fēfē he tau La Komiti e Kau Fakatufono?

• Ko e heigoa e tau matagahua ne leveki he la ofisa?