Puhala ke Fakaako e Tama Haau

He magaaho ne fakatu e Iehova e fakatokaaga he magafaoa, ne fakalago e ia ke he tau matua ke leveki e tau fanau ha lautolu. (Kolose 3:20) Ko e matagahua haau ko e matua ke fakamahani e tama haau ke fakaalofa ki a Iehova ti eke mo tagata mitaki ka lahi a ia. (2 Timoteo 1:5; 3:15) Ti lata foki ia koe ke iloa e mena kua ha hā he loto he tama taane po ke tama fifine haau. Mooli ai, kua aoga lahi e fakafifitakiaga haau. Kua mua e mitaki ke tuku fakamua e Kupu ha Iehova ke he loto haau ni to fakaako ai ke he tama haau.—Salamo 40:8.

1 FAKAMUKAMUKA AI MA E FANAU HAAU KE TUTALA KI A KOE

PEHĒ E TOHI TAPU: “[Kia] alumaki ke fanogonogo, kia fakatuai ke vagahau atu.” (Iakopo 1:19) Manako a koe ke logona hifo he tau fanau haau kua atāina a lautolu ke tutala mo koe. Kua lata ia lautolu ke iloa kua mautali a koe ke fanogonogo ka manako a lautolu ke tutala ki a koe. Fakatoka e takatakaiaga ke mukamuka ai a lautolu ke talahau fakamooli e tau manatu ha lautolu. (Iakopo 3:18) To nakai mauokafua a lautolu ke tutala mo koe ka manatu to vale a koe mo e tuhituhi tumau. Kia fakauka mo e tau fanau haau, mo e fakatātā tumau e fakaalofa haau ki a lautolu.—Mataio 3:17; 1 Korinito 8:1.

KO E MENA HAAU KA TAUTE:

• Kia atā a koe ka manako e tau fanau haau ke tutala mo koe

• Tutala tumau mo e tau fanau haau, nakai ni he magaaho ka fai lekua

2 LALI KE MAAMA E KAKANO MOOLI HA LAUTOLU

PEHĒ E TOHI TAPU: “Ko ia kua manamanatu ke he kupu, to moua ai e ia e mena mitaki.” (Tau Fakatai 16:20) Falu magaaho kua lata a koe ke mailoga e tau logonaaga mooli he tau fanau haau nakai ko e tau kupu hokoia ni ne talahau. Fa mahani ma e tau fuata ke fakalahilahi e tala po ke tutala fakahanoa. “Ko ia kua tali atu ke he kupu, ka e nakaila fanogonogo a ia ki ai, kua eke ia mo goagoa hana.” (Tau Fakatai 18:13) Ua mafiti ke ita.—Tau Fakatai 19:11.

KO E MENA HAAU KA TAUTE:

• Kia eketaha ke fanogonogo mo e ua mafiti ke ita ke he ha mena he tama ka talahau

• Lali ke manatu e tau logonaaga haau he vahā ne tote a koe mo e tau mena ne aoga ki a koe he mogoia

3 KIA FAKAKITE E LOTO TAHA

PEHĒ E TOHI TAPU: “Haku tama tane na e, kia fanogonogo mai a ke he tau kupu ne fakaako atu ai he matua tane hāu; aua neke tiaki foki e koe e poaki he hāu a matua fifine.” (Tau Fakatai 1:8) Foaki e Iehova ke he matua taane mo e matua fifine ke pule ke he tau fanau. Kua latatonu ia mua ke fakaako e tau fanau ha mua ke fakalilifu mo e omaoma ki a mua. (Efeso 6:1-3) Maeke e tau fanau ke mailoga ka nakai “fakalataha . . . ke he loto taha” e tau matua ha lautolu. (1 Korinito 1:10) Ka nakai fetaliaaki a mua, lali ke ua taute pihia i mua he tau fanau ha mua ha kua maeke ai ke fakatote hifo e fakalilifu ha lautolu ki a mua ko e tau matua.

KO E MENA HAAU KA TAUTE:

• Fakatutala mo e talia e puhala ke akonaki e tau fanau ha mua

• Ka kehekehe e tau manatu haau mo e hoa haau ke he puhala ke fakaako e tau fanau ha mua, lali ke maama e manatu he hoa haau

4 TAUTE E FAKATOKAAGA

PEHĒ E TOHI TAPU: “Kia fakaako a e tama ke lata mo e hana puhala.” (Tau Fakatai 22:6) To nakai kautū noa e tau fanau haau ka nakai fakaako. Kua lata ia koe ke fai fakatokaaga ke fakaako e tau fanau ha mua, putoia e akonakiaga. (Salamo 127:4; Tau Fakatai 29:17) Ko e akonakiaga kua nakai kakano hokoia ko e fakahala, kua putoia foki e lagomatai he tau fanau ha mua ke maama e tau kakano he tau poakiaga. (Tau Fakatai 28:7) Pihia foki, fakaako a lautolu ke fiafia ke he Kupu ha Iehova mo e mailoga e tau matapatu fakaakoaga i ai. (Salamo 1:2) To lagomatai ai a lautolu ke feaki e loto manamanatu mitaki.—Heperu 5:14.

KO E MENA HAAU KA TAUTE:

• Kia fakamakamaka ke kitia he tau fanau ha mua na moolioli e Atua mo e tau aga haana, ke falanaki a lautolu ki ai

• Lagomatai a lautolu ke mailoga e tau hagahagakelea ke he tau mahani mo e kalo kehe ai, tuga e tau mahani ne ha hā he Initanete mo e tau faahi fakatu kapitiga i ai. Fakaako a lautolu ke kalo kehe mai he tau tagata fakakelea he tau fanau he mahani fakataane mo e fifine