Ko e Heigoa ne Talahau he Tohi Tapu ke he Mahani Fakataane mo e Fifine?

Tokologa e tagata ne fuafuakelea ke tutala ke he mahani fakataane mo e fifine. Ka e tutala fakahako mo e fakalilifu e Tohi Tapu hagaao ke he mahani fakataane mo e fifine. Aoga e talahauaga ia ki a tautolu. Ti hako ha ko Iehova ko e Tufuga ha tautolu. Iloa e ia e mena kua mua e mitaki ma tautolu. Fakakite e ia ki a tautolu e tau gahua ka fakafiafia a ia mo e lagomatai a tautolu ke fiafia e moui tukulagi.

1. Ko e heigoa e onoonoaga ha Iehova ke he mahani fakataane mo e fifine?

Ko e mahani fakataane mo e fifine ko e mena fakaalofa mai ia Iehova. Manako a ia ke fiafia ai he taane mo e hoana kua mau. Hafagi he mena fakaalofa nei e tau hoa ke fanafanau mo e fefakakiteaki e fakaalofa mo e logonaaga hokulo ha laua he puhala pauaki mo e fiafia. Kakano ia ne pehē e Kupu he Atua: “Fiafia a koe ke he hoana ne faihoana ai a koe ke he hāu a vaha fuata.” (Tau Fakatai 5:18, 19) Amanaki a Iehova ke he tau Kerisiano kua mau ke fakamooli ke he tau hoa ha lautolu he nakai mahani faivao.​—Totou Heperu 13:4.

2. Ko e heigoa e mahani feuaki?

Tala mai e Tohi Tapu “ko e tau tagata feuaki, . . . nakai moua e lautolu nā e kautu he Atua.” (1 Korinito 6:9, 10) Ko e tau tagata tohia Tohi Tapu ne tohi ke he vagahau Heleni ne fakaaoga e kupu por·neiʹa ke fakamaama e mahani feuaki. Putoia he kupu ia e (1) fakafetuiaga feuakia he tau tagata ne nakai mau a laua, (2) mau e taane mo e taane po ke fifine mo e fifine, mo e (3) feuaki mo e manu. Fakafiafia e tautolu a Iehova mo e aoga ki a tautolu ka “fakamamao . . . mo e feuaki.”​—1 Tesalonia 4:3.

KUMIKUMI FAKAHOKULO

3. Fehola kehe he mahani feuaki

Ko e tagata mahani fakamooli ko Iosefa ne fakatumau ke meā e mahani. Totou Kenese 39:1-12, ti tutala ke he tau hūhū nei:

• Ko e heigoa ne fakaohooho a Iosefa ke hola?​—Kikite e kupu 9.

• Manatu nakai a koe kua taute e Iosefa e fifiliaga hako? Ko e ha?

VITIŌ: Fehola Kehe he Mahani Feuaki (5:06)

Manako a Iehova ki a tautolu oti ke tiaki e mahani feuaki. Totou 1 Korinito 6:18, ti tutala ke he tau hūhū nei:

• Ko e heigoa e tau tuaga ka takitaki e tagata ke taute e mahani feuaki?

• Hola kehe fēfē a koe he mahani feuaki?

4. Maeke a koe ke totoko e kamatamata

VITIŌ: Totoko e Kamatamata he Totou e Tohi Tapu (3:02)

• He mailoga he matakainaga taane he vitiō to takitaki e tau manatu mo e tau mahani haana ke nakai mahani fakamooli ke he hoana, ko e heigoa ne taute e ia?

Taufetului foki e tau Kerisiano fakamooli he falu magaaho ke fakatumau ke meā e tau manatu. Kalo kehe fēfē a koe he manamanatu tumau ke he tau manako feuaki? Totou Filipi 4:8, ti tutala ke he tau hūhū nei:

• Ko e heigoa e tau mena kua lata ke manamanatu a tautolu ki ai?

• Maeke fēfē e totou he Tohi Tapu mo e gahua fakamalolō ke he fekafekauaga ha Iehova ke lagomatai a tautolu ke totoko e kamatamata ke agahala?

5. Aoga e tau puhala ha Iehova ki a tautolu

VITIŌ: Galo e Manamanatu Mitaki (9:31)

• Fina atu fēfē e fuata ke he tuaga kamatamata?​—Kikite e Tau Fakatai 7:8, 9.

• Ia Tau Fakatai 7:23, 26, hagahagakelea lahi e fua he mahani feuaki. Ka fakatumau a tautolu ke meā e mahani, ko e heigoa e tau lekua ka kalo kehe i ai?

• Lagomatai fēfē a tautolu he meā e mahani ke fiafia e moui tukulagi?

Manatu falu tagata kua nakai totonu e mena ne talahau he Tohi Tapu ke he mau e taane mo e taane po ke fifine mo e fifine. Ka e manako a Iehova ko e Atua fakaalofa ke he tau tagata oti ke fiafia e moui tukulagi. Ke moua e fiafia ia, lata a tautolu ke momoui fakatatau ke he tau mahani haana. Totou 1 Korinito 6:9-11, ti tutala ke he hūhū nei:

• Mai he tuaga he Atua, kua nakai hako kia e tau manako ke mau e taane mo e taane po ke fifine mo e fifine?

Ke fakafiafia e Atua, lata a tautolu oti ke taute e tau hikiaga. To aoga nakai? Totou Salamo 19:8, 11, ti tutala ke he tau hūhū nei:

• Manatu nakai a koe kua mitaki e tau mahani ha Iehova? Ko e ha ne manatu pihia a koe, po ke ko e ha ne nakai manatu pihia a koe?

MANATU KATOA

Ko e mahani fakataane mo e fifine ko e mena fakaalofa ha Iehova ke he taane mo e hoana ke moua e fiafia.

Liu Fakamanatu

• Ko e heigoa kua putoia he mahani feuaki?

• Ko e heigoa ka lagomatai a tautolu ke kalo kehe he mahani feuaki?

• Aoga fēfē ka omaoma a tautolu ke he tau mahani ha Iehova?

KUMI FOKI

Kumikumi e kakano kua uho ke he Atua he mau po ke nakai mau e tau hoa.

“Ko e Heigoa e Talahauaga he Tohi Tapu ke he Nonofo Tokoua ka e Nakai Mau?” (Vala tala he kupega hila)

Manamanatu ke he fakaakoaga he Tohi Tapu kua hepe ke mau e taane mo e taane po ke fifine mo e fifine, ka e nakai vihiatia a lautolu.

“Hepe Kia ke Mau e Taane mo e Taane po ke Fifine mo e Fifine?” (Vala tala he kupega hila)

Fakaako e puhala kua puipui he tau matafakatufono he Atua a tautolu he tau mahani feuaki oti.

“Ko e Mahani Fakataane mo e Fifine Kia e Feuaki Halagutu?” (Vala tala he kupega hila)

He tala mooli “Taute Fakalilifu e Lautolu Au,” kitia e mena ne omoomoi e tagata taane ne nofo mo e tagata taane ke hiki e puhala moui haana ke fakafiafia e Atua.

“Hiki he Tohi Tapu e Tau Momoui” (Vala tala he Kolo Toko)