Manatu Nakai e Koe?
Kua loto fakaaue nakai a koe he totou ke he tau fufuta foou he Ko e Kolo Toko? Lali la mogoia ke kitia ko e maeke nakai a koe ke tali e tau hūhū i lalo:
• Lafi foki ke he Tohi Tapu ko e heigoa e fakamooliaga ko Iesu ko e tagata mooli he fakamauaga tuai?
Tokologa e tagata tohi tala he lalolagi ne talahau fakamaaliali hagaao ki a Iesu. Ne fakamau e Cornelius Tacitus na mate a Iesu ke he magahala ha Ponotio Pilato i lalo he pule ha Tiperio. Talahau e Flavius Josephus ne fakapotopoto he Ekepoa ne Mua ko Anania e tau ikifakafili he Saneheturini ke fakafili a Iakopo, ko e matakainaga ha Iesu.—4/1, lau 15.
• Ko e heigoa e tau fakaakoaga ne moua mai he tau gahua ha Peteru he mole e mate ha Iesu?
Liga matematekelea lahi a Peteru ke manamanatu ke he mamahi ne lafi e ia ke he Iki haana he aho fakahiku he moui Haana ko e tagata. Pete ia, ne nakai mahala a Peteru ke he fakaatukehe. Ne fakakite e ia e tua mooli he fakapotopoto mo e tau matakainaga haana pete ne loto malipilipi haana. Ka pehia e tagata he momoko po ke tokihala, kua mukamuka ke vevehe kehe ka kua hagahaga kelea ai. Ko e puhala pulotu ke nonofo fakatata ke he tau matakainaga ti liu ke moua e malolō fakaagaaga. Ka kaumahala e fekafekau he Atua, nakai ko e kaumahala lahi mahaki haana ne aoga ka ko e aoga lahi mahaki e malolō he fifiliaga haana ke liu tū, ke fakahako e tau matalekua.—4/1, lau 24.
• Ko e heigoa he tau fuata Kerisiano ka fakaako mai he omaoma ha Iesu he vahā fuata haana?
Mailoga ai, na ua e matua taane ha Iesu—ko Iehova mo Iosefa. Ko e fuata taane ne nofo he lalolagi, ne matutaki a ia ke omaoma ke he tau matua haana. (Luka 2:51, 52) Ka e nakai mukamuka tumau ma Iesu ke omaoma ke he Matua haana he lagi. He pō ato mate a Iesu, ne ole a ia ki a Iehova kua maeke nakai a Ia ke hiki e manatu Haana hagaao ke he mena ne manako a Ia ke taute e ia. (Luka 22:42) Ka kua omaoma a Iesu ke he Atua pete ne nakai mukamuka.—4/1 lau 30-31.
• Ko e ha ne nakai fakahala he Atua a Arona he talaga e punua povi auro?
Na moumou e Arona e fakatufono he Atua ke he tapuaki tupua. (Esoto 20:3-5) Ka kua olelalo a Mose ke he Atua ke lata mo Arona, ti kua “aoga lahi” e olelalo haana. (Iako. 5:16) Ne leva tuai e tua fakamooli ha Arona. Ti pete he fakaohooho he tau tagata a Arona ke talaga e punua povi, ne fakakite e ia he magaaho fakamui kua nakai fakalataha e loto haana mo lautolu, ha kua matutaki a ia mo e tau tama taane a Levi he tutū ke he faahi a Iehova. (Esoto 32:25-29)—5/15, lau 21.
• Ko e heigoa ka lagomatai e Kerisiano ke fahia ka mahani faivao e hoa mau?
Ka eketaha e hoa ne nakai fai kelea ke moui fakatatau ke he tau matapatu fakaakoaga he Tohi Tapu, kua nakai lata ke kelea e loto ha ko e agahala nakai fakamooli he tagata mahani faivao. Na iloa he Atua e manako haau ma e fakamafanaaga mo e fakamalolōaga. Liga foaki e ia e fakamafanaaga puhala he tau matakainaga Kerisiano.—6/15, lau 30-31.
• Feaki fēfē e koe he fanau haau e fiafia ke totou?
Ko e takatakaiaga fiafia mo e fakafifitakiaga fakamatua ka lagomatai ke feaki e fiafia ke totou. Age ki ai foki e tau tohi. Totou fakaleo lahi. Fakamalolō ke fai vala ki ai, fakatutala e mena ne totou e mutolu. Fekau e tau fanau haau ke totou ki a koe, ti tomatoma ki a lautolu ke hūhū.—7/15, lau 26.