Loto Fakaaue Mooli Nakai a Koe ke he Tau Monuina Haau?

MAI he laveaki homo ue atu he tupaaga i Aikupito, he magaaho fakamua ne fiafia e tau fanau a Isaraela ha kua atāina ke tapuaki a Iehova. (Esoto 14:29–15:1, 20, 21) Ka e nakai leva ne hiki e tau onoonoaga ha lautolu. Ne kamata a lautolu ke gugū hagaao ke he tuaga ha lautolu he moui. Ko e ha? Ha kua hiki e lautolu e onoonoaga ha lautolu mai he mena ne taute e Iehova ma lautolu ke he tau tuaga uka he momoui he tutakale. Pehē a lautolu ki a Mose: “Kua ta mai he ha e mua a mautolu i Aikupito ke mamate ai ke he tutakale? ha ko e mena nakai fai mena kai, to nakai ni fai vai, kua vihia foki he tau loto ha mautolu e mena kai [manai] fakateaga nai.”—Nume. 21:5.

Fai senetenari he mole, ko e Patuiki ko Tavita i Isaraela i tuai ne lologo: “Ka ko au nai, to tua au ke he hāu a fakaalofa, to fiafia hoku loto ke he hāu a fakamouiaga. To lologo atu au kia Iehova, ha kua mahani mitaki mai a ia kia au.” (Sala. 13:5, 6) Nakai nimo e Tavita e tau gahua fakaalofa-totonu ha Iehova ki a ia. Kua manamanatu tumau a ia ke he tau mena ia. (Sala. 103:2) Ne taute fakamitaki foki e Iehova a tautolu, ti pulotu a tautolu ke nakai uta fakateaga e tau mena ne taute e ia ma tautolu. Kia manamanatu mogoia a tautolu ke he falu he tau monuina he Atua kua olioli e tautolu he vahā nei.

‘Fakafetui mo Iehova’

Ne lologo e salamo: “Kua fakafetui a Iehova mo lautolu kua matakutaku kia ia.” (Sala. 25:14) Ko e lilifu mooli ma e tau tagata nakai mitaki katoatoa ke moua e fakafetuiaga tata mo Iehova! Ka e kua ka lavelave lahi a tautolu mo e tau mena he moui he tau aho takitaha ti tote fakahaga e magaaho ha tautolu ke liogi? Manamanatu la ke he mena ka tupu mogoia ke he fakafetuiaga mitaki ha tautolu mo Iehova. Ko Iehova ko e ha tautolu a Kapitiga kua amanaki ki a tautolu ke falanaki ki a ia mo e liligi age e tau loto ha tautolu ki a ia he liogi, he tala age ki a ia e tau matakutaku, tau manako, mo e tau tupetupe ha tautolu. (Fakatai 3:5, 6; Filipi 4:6, 7) Ti kua lata nakai ia tautolu ke manamanatu ke he puhala he tau liogi ha tautolu?

Magaaho ne manamanatu e fuata Fakamoli ne higoa ko Paul ke he tau liogi haana, ne mailoga e ia kua lata a ia ke taute falu hikiaga mitaki.a Pehē a ia, “kua to au ke he aga ke talahau lagaloga e tau manatu agaia ka liogi au ki a Iehova.” He kumikumi a Paul ke he matakupu ia he Watch Tower Publications Index, ne iloa e ia na 180 e liogi ne fakamau he Tohi Tapu. I ai, ne fakakite he tau fekafekau a Iehova i tuai e tau logonaaga hokulo ha lautolu. Ne pehē a Paul: “He manamanatu fakahokulo ke he tau fakataiaga pihia he Tohi Tapu, ne fakaako au ke tutala fakatonu he tau liogi haaku. Lagomatai he mena nei au ke hafagi e loto haaku ki a Iehova. Mogonei ko e mena fiafia ke fakatata ki a ia he liogi.”

‘Tau Mena Kai ke he Tau Magaaho Tonu’

Ko e taha fakamonuinaaga foki ne foaki e Iehova ki a tautolu ko e tau fakaakoaga loga he kupu mooli he Tohi Tapu. He kai galue a tautolu ke he loga lahi e tau mena kai fakaagaaga, kua ha ha ia tautolu e kakano ke “kalaga . . . ha ko e loto fiafia.” (Isaia 65:13, 14) Pete ia, lata ia tautolu ke puipui ke nakai fakaatā e tau fakaohoohoaga kelea ke fakatupu a tautolu ke galo e makaukau ke he kupu mooli. Ma e fakatai, ko e hagaaki ke he tau fakaakoaga tiaki taofiaga ka fakatauhele e manamanatuaga ha tautolu mo e fakapouli a tautolu ke he aoga he ‘tau mena kai fakaagaaga ke he tau magaaho tonu’ ne fakatoka mai e Iehova he “fekafekau fakamoli mo e loto matala.”—Mata. 24:45-47.

Ko André, ne leva e fekafekau ki a Iehova, ne mamahi lahi e mena ne tupu ki a ia he takitaki fakahehē he manamanatuaga tiaki taofiaga. Ne logona hifo e ia ko e kitekite fakakū noa ni ke he faahi Web tiaki taofiaga to nakai hagahaga kelea. Manatu e ia: “Kamata aki, na fiafia au ke he tau tala ne tuga kua mooli ne talahau he tau tagata tiaki taofiaga. He lahi e kumikumi ke he tau talahauaga ha lautolu, ne lahi e manamanatu haaku kua lata ni au ke toka e fakatokatokaaga ha Iehova. Ka e fakamui, he kumikumi au ke he tau matakupu he tau tagata tiaki taofiaga ne totoko ke he Tau Fakamoli a Iehova, ne kamata au ke mailoga e fakahehē he tau puhala he tau faiaoga fakavai ia. Ko e tau vala tala ne kehe e fakamaamaaga ko e ha lautolu a ‘fakamooliaga malolō’ he totoko ki a tautolu. Ti fifili au ke kamata ke liu totou e tau tohi ha tautolu mo e ke fano he tau feleveiaaga. Nakai leva ti mailoga e au e lahi he mena ne galo noa e au.” Fiafia ai, ne liu a André ke he fakapotopotoaga.

‘Tau Matakainaga Oti’

Ko e tau matakainaga fakahele ha tautolu mo e kaufakalataha ko e monuina mai ia Iehova. (Sala. 133:1) Mo e kakano mitaki, ne tohi he aposetolo ko Peteru: “Kia fakaalofa ke he tau matakainaga.” (1 Pete. 2:17) He vala he fakamatakainaga Kerisiano, kua fiafia a tautolu ke he lalagoaga mafanatia he tau matua taane, matua fifine, matakainaga taane, mo e tau matakainaga fifine fakaagaaga ne tatai e tua.—Mare. 10:29, 30.

Pete ia, ko e kehekehe he tau tuaga he falu magaaho ka fakatupu e nakai vahāloto mitaki he fakafetuiaga ha tautolu mo e tau matakainaga ha tautolu. Tuga anei, kua mukamuka ke hogohogo manava ke he tau nakai mitaki katoatoa he taha mo e ke moua e aga tuhituhi ki a ia. Ka tupu e mena nei, nakai kia lagomatai ke manatu kua fakaalofa a Iehova ke he tau fekafekau haana pete ni e tau nakai mitaki katoatoa ha lautolu? Lafi ki ai, “kaeke ke pehe a tautolu, Nakai fai hala a tautolu, kua hehe tuai a tautolu kia tautolu, nakai nofo foki e kupu moli ki loto ia tautolu.” (1 Ioa. 1:8) Nakai kia lata ia tautolu ke eketaha ke “fefakaukaaki . . . mo e fefakamagaloaki”?—Kolo. 3:13.

Ko e tama fuata ne higoa ko Ann ne uka e puhala ne iloa e uho he lafiaga faka-Kerisiano. He tuga e tama moumou koloa he fakataiaga ha Iesu, ne tafea kehe a ia mai he fakapotopotoaga Kerisiano. Fakamui, ne matala e loto haana ti liu mai ke he kupu mooli. (Luka 15:11-24) Ko e heigoa ha Ann ne fakaako mai he mena nei ne tupu? Talahau e ia: “Ha kua liu mai au mogonei ke he fakatokatokaaga ha Iehova, kua uho ki a au e tau matakainaga taane mo e fifine oti haaku pete e tau nakai mitaki katoatoa ha lautolu. Mogo kua mole, ne mafiti au ke tuhituhi a lautolu. Ka kua eketaha au mogonei ke nakai fakaatā ha mena ke utakehe e tau monuina ia kua olioli e au fakalataha mo e tau matakainaga talitonu. Nakai fai mena uho i fafo ia he lalolagi kua aoga ke tiaki e parataiso fakaagaaga.”

Loto Fakaaue Tumau ma e Tau Monuina Haau

Ko e amaamanakiaga ha tautolu ke he Kautu he Atua ko e tali ke he tau lekua oti kana he tagata ko e koloa uho kua mua ue atu. Magaaho fakamua ne moua e tautolu e amaamanakiaga nei, ne olioli lahi e loto fakaaue ha tautolu! Ko e logonaaga ha tautolu kua tuga e tagata fakafua koloa he fakatai ha Iesu ne “fakafua atu hana tau mena oti” ke maeke ke fakatau e “taha penina fakafua lahi.” (Mata. 13:45, 46) Nakai pehē a Iesu na galo he tagata fakafua koloa e loto fakaaue ke he penina. Pihia foki, kia nakai galo ia tautolu e loto fakaaue ke he amaamanakiaga homo ue atu ha tautolu.—1 Tesa. 5:8; Hepe. 6:19.

Manamanatu ke he fakafifitakiaga ha Jean, ne fekafekau ki a Iehova ke molea e 60 e tau. Pehē a ia: “Ko e mena ne lagomatai au ke tokaloto e Kautu he Atua ko e tutala ke he falu hagaao ki ai. Ka kitia e au e tau mata ha lautolu ne ofo he iloa e Kautu, ti fiafia au. He kitia e lauiaaga he kupu mooli he Kautu ke he moui he tagata fakaako Tohi Tapu ne manamanatu au, ‘Ko e mitaki ha ia he tau kupu mooli kua lata ia au ke tala age ke he falu!’”

Ha ha ia tautolu e tau kakano ke loto fakaaue ma e tau monuina fakaagaaga loga kua olioli e tautolu. Pete ka pehia a tautolu ha ko e tau kamatamata tuga e totoko, gagao, momotua, fakaatukehe, maanu, mo e vihi fakatupe, kua iloa e tautolu ko e tau mena mole vave a ia. I lalo hifo he Kautu he Atua, to lafi e tau monuina fakatino ke he tau monuina fakaagaaga ha tautolu. Ko e ha matematekelea ne fakauka a tautolu ki ai mogonei to mole atu he fakatokaaga foou.—Fakakite. 21:4.

Ka ko e mogonei, kia totou e tautolu e tau monuina fakaagaaga ha tautolu mo e fakatātā e loto fakaaue tuga ia he salamo ne lologo: “Iehova na e, haku Atua, kua loga e tau mena kua eke e koe, ko e hau a tau mana mo e hau a tau manatu kia mautolu, nakai maeke ke talahau atu kia koe; kua fia fakailoa atu e au mo e vagahau ki ai, ka e loga ni, ai maeke he totou.”—Sala. 40:5.

[Matahui Tala]

[Fakatino he lau 18]

Fakamonuina a tautolu he lalagoaga fakaagaaga he tau mogo kamatamata