Kua Lata ke Manatu Fēfē e Tautolu e Mate ha Iesu?

Ko e vala tala nei kua fakatutala ke he tau hūhū kua liga hūhū e koe mo e fakakite e matakavi ka totou e koe e tau tali he Tohi Tapu haau. To fiafia e Tau Fakamoli a Iehova ke fakatutala e tau tali nei mo koe.

1. Lata ke manatu fēfē e mate ha Iesu?

Ne tala age a Iesu ke he tau tutaki haana ke manatu e mate haana puhala he kaiaga fakatai, he fakaaoga e areto mo e uaina. Ne hukui he areto e tino ha Iesu, mo e uaina ke he toto haana.—Totou Luka 22:19, 20.

Ko e areto ne fakaaoga e Iesu kua nakai fakaea. He Tohi Tapu, ko e mena fakaea ne fa fakaaoga ke hukui aki e agahala. Ti ko e areto ko e fakamailoga kua latatonu ke he tino mitaki katoatoa a Iesu. Ne foaki e ia e tino haana ko e poa, ne kua fakaoti ai e tau poa manu i lalo he Fakatufono faka-Mose. (Heperu 10:5, 9, 10) Ko e uaina ko e fakamailoga he toto uho a Iesu ne liligi ai ke eke mo poa ma e tau agahala ha tautolu.—Totou 1 Peteru 1:19; 2:24; 3:18.

2. Magaaho fe kua lata ia tautolu ke fakamanatu e mate ha Iesu?

Ne mate a Iesu he Paseka, Nisana 14. Ko e aho Iutaia ne kamata he toaga laā. Ko e afiafi ato mate a ia, ne kai e Iesu e kaiaga Paseka mo e tau aposetolo haana ti fakatū ai e kaiaga he fakamanatuaga foou ke fakamanatu aki e mate haana.—Totou Luka 22:14, 15.

He vahā nei, ne fakamanatu he tau tagata he Atua e mena ne foaki he Atua puhala mai ia Iesu ke fakatokanoa mai e lalolagi katoa he agahala mo e mate. (Esoto 12:5-7, 13, 17) Tuga ni e Paseka ne fakamanatu lagataha he tau, ti pihia foki e Fakamanatuaga he mate a Iesu kua fakahoko lagataha he tau, he mole e toaga laā ia Nisana 14 hagaao ke he kalena faka-Iutaia he Tohi Tapu.—Totou Ioane 1:29.

3. Ko hai kua lata ke kai e areto mo e inu e uaina?

He age e Iesu e uaina ke he tau tutaki haana, ne pehē a ia: “Ko e kapiniu nai, ko e maveheaga fou ia.” (1 Korinito 11:25) Ne hukui he maveheaga foou e maveheaga he Fakatufono faka-Mose, ne kua mavehe he Atua ke he tau Isaraela ka omaoma fakatatau a lautolu ki a ia, to eke a lautolu mo tau tagata haana. (Esoto 19:5, 6) Ka e, nakai omaoma a Isaraela ke he leo he Atua. Ti foaki e Iehova e maveheaga foou.—Totou Ieremia 31:31.

Puhala he maveheaga foou, ne foaki e Iehova e tau monuina ke he tokologa he puhala he tokogahoa. Tokogahoa a lautolu he maveheaga ia, ko e 144,000. Puhala ia lautolu, totou miliona mai he tau motu ka fakamonuina aki e moui tukulagi ke he parataiso he lalolagi. Falu he maveheaga foou kua fekafekau ki a Iehova he lalolagi he vahā nei. Ko lautolu ni a ia kua kai ke he areto mo e inu ke he uaina ha ko e kapiniu “ko e maveheaga fou.”—Totou Luka 12:32; Fakakiteaga 14:1, 3.

4. Aoga fēfē e Fakamanatuaga ki a tautolu?

Ko e Fakamanatuaga he tau tau takitaha he mate a Iesu kua fakahokulo e loto fakaaue ha tautolu ma e fakaalofa mua ue atu ha Iehova. Ne fakafano mai e ia e Tama haana ke mate ma e tau agahala ha tautolu. Ti ka o atu a tautolu ke he Fakamanatuaga, kua lata ia tautolu ke manamanatu ke he kakano he mate a Iesu ma tautolu. Kua lata ia tautolu ke manamanatu ke he puhala ka fakakite e tautolu e loto fakaaue ke he mena ne taute e Iehova mo Iesu ma tautolu.—Totou Ioane 3:16; 2 Korinito 5:14, 15.

Ma e falu vala tala foki, kikite e lau 206-208 he tohi nei, Ko e Heigoa ne Fakaako Moli he Tohi Tapu?, ne taute fakailoa he Tau Fakamoli a Iehova.