Fakamalolōaga “Mai he Tau Gutu he Tau Tama”
Ia Tesemo 2009, ko e Hopoaga Mua Atu a Rusia ne lalago e fifiliaga ati pā ai e fakatokatokaaga fakalotu he Tau Fakamoli a Iehova i Taganrog, i Rusia, ne utakehe e Fale he Kautu, mo e fakailoa nukua 34 e tohi ha tautolu ne hagahagakelea lahi mahaki. Ne tuku e mena tupu fakaofo nei ke he faahi Kupega Hila pauaki he Tau Fakamoli a Iehova mo e tau ata he tau Fakamoli ne lauia he fifiliaga ia, putoia foki e tau fanau ikiiki.
Ko e tau fanau i Ausetalia
Fai mahina he mole, ko e Ofisa Fakatokatoka he Tau Fakamoli a Iehova i Rusia ne moua e puha mo e tohi nei mai he magafaoa Fakamoli i Queensland, Ausetalia, he kitia e hokotaki ke he fifiliaga he Fakafiliaga: “Tau Matakainaga Fakahele, Ko e tau fanau ha maua, ko Cody mo Larissa, ne aamotia lahi he tua mo e tau kamatamata he tau kapitiga i Rusia. Ne tohia e laua e tau laupepa mo e tau tohi, mo e taute e puha tote he tau mena fakaalofa ne kua manako a mautolu ke fakafano atu ke he tau fanau i Taganrog, ke fakailoa ki a lautolu kua ha ha he matakavi mamao lahi e falu fanau kua fekafekau fakamooli foki ki a Iehova mo e kua manamanatu ki a lautolu. Ne fakafano atu e laua ke he tau fanau oti ia e lalagoaga mafanatia lahi mo e fakaalofa.”
He moua e tau mena fakaalofa ia, ne tohia he tau fanau i Taganrog e tau tohi fakaaue mo e tau fakatino ke he magafaoa i Ausetalia. Ne omoomoi ai he tau talahauaga fakamalolō “mai he tau gutu he tau tama,” taha e Fakamoli ne fekafekau he la ofisa i Rusia ne tohi ki a Cody mo Larissa: “Liga mailoga e mua kua nakai mitaki e tau fanau mo e tau tagata lalahi ke fakahala ha ko e mena ne nakai taute e lautolu. Ne nakai fai mena kelea ne taute he ha tautolu a tau matakainaga taane mo e fifine i Taganrog, ka kua utakehe ha lautolu a Fale he Kautu. Ti momoko lahi a lautolu he mena nei. To fakamalolō lahi ki a lautolu ke iloa kua ha ha i ai falu he taha faahi he lalolagi kua manamanatu ki a lautolu. Fakaaue ke he aga mafanatia mo e fakamokoi ha mua!”—Sala. 8:2.
Ko e tau fanau i Rusia (hema) ne moua e tau mena fakaalofa mai he tau fanau i Ausetalia (matau)
Ko tautolu ko e tau matakainaga mooli he lalolagi katoa, mo e kua lagomatai a tautolu he ha tautolu a fefakaalofaaki ke fahia ke he tau kamatamata he moui mo e tau mena uka. He matutaki e tau fakafiliaga ke totoko kua fakalagalaga kia he tau tohi he Tau Fakamoli a Iehova e vihiatia, ko e ha tautolu a tau fanau kua fefakakiteaki fakalilifu e tupetupe ha lautolu ma lautolu ni, kua kautū mai he tau kaupāaga he motu mo e tau aga fakamotu mo e fakatātā e moolioli he tau kupu ha Iesu: “Ko e mena ia ke iloa ai he tau tagata oti kana, ko e haku a tau tutaki a mutolu, ka feofanaki a mutolu.”—Ioane 13:35.