Manatu Nakai e Koe?
Kua totou fakamitaki nakai e koe e tau fufuta foou he Ko e Kolo Toko? Lali la mogoia ke kitia ko e maeke nakai a koe ke tali e tau hūhū i lalo:
Moua mai i fe e tau maka uho he ufi fatafata he ekepoa ne mua ha Isaraela?
Ko e tau pule i tuai ha Aikupito ne pule katoatoa ke he keli hake he tau maka uho he tau matakavi ne pule a lautolu ki ai. Hagaao ke he tala Tohi Tapu he tohi a Esoto, ne fakanofogati he tau Isaraela e tau Aikupito he uta e tau koloa uho ha lautolu he toka e motu. Ti liga moua mai he tau Isaraela i Aikupito e tau maka ne taute aki e ufi fatafata he ekepoa ne mua.—10/1, lau 18.
Ko e ha kua maeke ia tautolu ke talitonu ke he tau mana ne fakamau he Tohi Tapu?
Ne fa taute e tau mana ke he tau toloaga tagata, nakai taute fakagalogalo. Ne mukamuka ai mo e nakai fai koloa fakaaoga pauaki. Ne taute ai ke fakaheke e Atua, nakai ke he tau tagata. Ne kehekehe e tau mana ne taute ai, ti ko e tau tagata totoko he magahala ia ne nakai fakauaua na tutupu mooli e tau mena ia. Ko e tau kakano anei ma tautolu ke mauokafua ai ke he tau mana ne fakamau i loto he Tohi Tapu.—10/1, lau 7-8.
Maeke fēfē ia tautolu ke tamate e afi he vagahau nakai tautaofi?
Kua lata ia tautolu ke kumikumi hifo ke he tau loto ha tautolu ni. He nakai hūhū toko e matakainaga, ko e ha he nakai kumikumi hifo ai ko e heigoa e kakano he aga pihia? Liga kua hūhū toko kia e tautolu a ia ha ko e puhala ke fakamatalahi aki a tautolu ni? Lafi ki ai, ko e hūhū toko kua maeke ke taute e tuaga vihi ke au atu e kelea.—8/15, lau 21.
Ko e ha kua hagaaki a Iehova ke fakameā e higoa haana?
I loto he Tohi Tapu, ko e “higoa” kua fa fakakite e mahani. Taha e tohi ne pehē ko e higoa he Atua kua hagaao ke he “tau mena kua iloa ki a ia—ko e fakakiteaga ki a ia ni, fakakite ai foki e talahaua haana, ti ko e lilifu haana.” Kua putoia ke he higoa a Iehova e mahani haana. Ne vihiatia e ia e nakai fakafili tonu ti fakaalofa hofihofi a ia ki a lautolu kua lauia noa ai. Ka tukupau he tau tagata ko e Atua ne fakatupu e tau mena ia ne vihiatia lahi e ia, kua takiva e lautolu e higoa haana. Kua taute fakalialia e lautolu e higoa haana.—10/1, lau 15.
He tata mai e aho a Iehova, ko e heigoa e tau mena tutupu ka hohoko mai?
To fakapuloa ai e “Kua mafola, kua nakai haofia!” To totoko atu mo e moumou he tau motu a Papelonia Lahi. To totoko ke he tau tagata he Atua. To hoko e tauaga ha Amaketo, ti mui mai ai e tolo hifo a Satani mo e tau temoni haana ke he pahua.—9/15, lau 4.
Aoga fēfē ki a tautolu he nakai iloa e magaaho ka hoko mai e fakaotiaga?
He nakai iloa tonu e aho po ke magaaho kua fakaatā a tautolu ke fakakite e tau mena he tau loto ha tautolu. Kua foaki mai ki a tautolu e mogo ke fakafiafia e loto he Atua. Kua fakamalolō ai a tautolu ke tutuli e puhala moui foaki noa mo e lagomatai a tautolu ke falanaki fakalahi ke he Atua mo e haana Kupu. Lafi ki ai, kua fakaatā ai e tau matematekelea mogonei ke fakahakohako a tautolu.—9/15, lau 24-25.
Ko hai ne hukui e “fitu e fetu” he lima matau ha Iesu ne talahau he Fakakiteaga 1:16, 20?
Kua hukui e lautolu ia e tau leveki fakauku he tau fakapotopotoaga, ti pihia foki mo e tau leveki oti.—10/15, lau 14.
Fakakite fēfē e Iesu e aga fakatokolalo ne hagaao ki ai he Isaia 50:4, 5?
Talahau mai he tau kupu ia ko ia ne moua e “alelo ha lautolu ne fakaako,” to “nakai tukumuli.” Ne fakatātā e Iesu e aga fakatokolalo, he hagaaki fakalahi ke he tau mena ne fakaako age he Matua haana. Ne makutu mo e makai a Iesu ke fakaako mai ia Iehova, he kitekite fakatonu e mahani fakatokolalo he Atua he fakagahua e fakaalofa noa ke he tau tagata agahala.—11/15, lau 11.