Tutū Mauokafua a Lautolu he “Magaaho Kamatamata”

HE HOKO e Felakutaki I he Lalolagi he 1914 ne iloa he lalolagi katoa e tu uho he Tau Tagata Fakaako Tohi Tapu. (Isaia 2:2-4; Ioane 18:36; Efeso 6:12) Lauia fēfē e tau fekafekau he Atua i Peritania?

He 1916 ne fakatoka mai he Tohi Fakave he Tau Kautau i Peritania, ko e tau tagata taane ne nakaila fai hoana ne 18 ke he 40 e tau tau moui kua lata ke ō he tau. Ne fai fakatokaaga ke nakai putoia a lautolu ne fai kakano mitaki moolioli ke nakai ō he tau ha ko e “tau taofiaga fakalotu po ke lauia e loto manamanatu.” Ne fakatū he fakatufono e tau matakau ke fifili a lautolu ka fakaatā ke ua ō he tau mo e laulahi fēfē.

Nakai leva, ne kavi ke he 40 e Tagata Fakaako Tohi Tapu ne tuku he tau fale puipui he tau kautau, mo e 8 ne fakafano atu ke he tau i Falani. Ha ko e fakafiliaga nakai tonu nei, ne tohi atu e tau matakainaga i Peritania ke he Takitaki he Motu ko Herbert Asquith e tohi totoko ha ko lautolu he fale puipui mo e fakamauaga ne 5,500 tagata ne saini ai.

Ne logona mai e tala hagaao ke he tokovalu ne fakafano ki Falani kua fakahala tuai ti tauteute ke fana he nakai talia ke fakalataha ke he tau gahua fakakautau. Ka ko e magaaho ne fakalaini e tau matakainaga ke fana, ne hiki e fakahala ha lautolu ke hogofulu e tau ka tuku he fale puipui. Ne liuaki a lautolu ki Igilani ke lata mo e fakahala ia he fale puipui he motu.

Ne toho loa e tau, ti holo atu ai ke ō foki e tau tagata taane ne fai hoana he tau. Taha hopoaga fakamua ia ne tupu i Manchester, Igilani, ne hokotaki ai a Henry Hudson, ko e ekekafo mo e Tagata Fakaako Tohi Tapu. Ia Aokuso 3, 1916, ne pehē e fakafiliaga ko ia ko e tagata fakavaia, ti fakahala a ia mo e tuku age ke he tau kautau. He magaaho taha ia ne taha foki e hopoaga fakamua ne kua taute i Edinburgh, Sikotelani. Ko James Frederick Scott, ko e tagata foafoa ne 25 e tau he moui, ne nakai holifono a ia. Ne ole e Fakatufono ke liu fanogonogo ke he lekua haana ka kua fakamagalo noa ai ka e atā ke fakamakamaka ke he taha hopoaga pihia i London. He magahala ia, ko e matakainaga taane ko Herbert Kipps ne fakahala ti tuku age ke he tau kautau.

Ia Sepetema 1916, ne 264 e matakainaga taane ne tohi ole ke ua ō he tau. Ia lautolu nei, toko 5 ne fakaatā ke ua ō he tau, toko 154 ne fekau ke taute e “tau gahua ke aoga e motu,” toko 23 ne kotofa ke taute e tau gahua ne nakai matutaki mo e felakutaki he malē tau, toko 82 ne tuku age ke he tau kautau, ti fakahala he tau kautau e falu ia lautolu he nakai omaoma ke he tau poakiaga. Tokologa e tagata ne totoko ke he ekefakakelea he tau tagata taane nei, ti hiki he fakatufono a lautolu mai he fale puipui he tau kautau ke he tau kemuaga he tau tagata noa.

Ko Edgar Clay mo Pryce Hughes, ne hoko ke he mogo fakamui ti eke a ia mo leveki he la ofisa i Peritania, ne gahua he pā hala vai i Wales. Ka ko Herbert Senior, ko ia taha he tokovalu ne liuaki mai i Falani, ne fakafano ki Wakefield Prison i Yorkshire. Ne fakahala e falu ke gahua fakatupa he tau tutuaga uka lahi i Dartmoor Prison, ti ko lautolu ni e matakau ne mua atu e tokologa ne nakai talia ke ō he tau ha ko e tau loto manamanatu ha lautolu.

Ko Frank Platt, ko e Tagata Fakaako Tohi Tapu ne talia e ia ke taute e tau gahua ne nakai matutaki ke he felakutaki he malē tau, ne leva e ekefakakelea fakamamahi he mogo ne fakafano atu ke tau ti nakai talia e ia. Ko Atkinson Padgett, ne iloa e kupu mooli he nakaila leva ia e tohi ke fano he tau, ne matematekelea foki he fakamamahi fakakelea he tau takitaki kautau he nakai talia ke fano he tau.

Pete he nakai maama katoatoa he tau matakainaga e tu uho faka-Kerisiano ha tautolu he kavi ke taha e senetenari kua mole, ne lali ni a lautolu ke fakafiafia a Iehova ko e Atua. Ko lautolu ne totoku e tau higoa he vala tala nei ne fakatoka e lautolu e fakafifitakiaga mitaki he tu uho he tau magaaho uka lahi pauaki he “magaaho kamatamata.” (Fakakite. 3:10)​​—Mai he tau tokaaga tuai ha tautolu i Peritania.