Mena ne Fifili e Au he Vahā Tote

Ne hogofulu laia e tau haaku he 1985 he mogo ne hohoko mai e tau tama i Kamepotia ke he aoga haaku i Columbus, Ohio i U.S.A. Taha he tau fanau taane ne fai kupu Palagi ne iloa. He lagomatai he tau fakatino, ne kamata a ia ke talahau ki a au e tau tala matakutakuina he fakakikiveka, tau kelipopo, mo e tau fehola. Fa tagi au ka pō he manatu e tau fanau nei. Manako au ke tala age ki a lautolu e amaamanakiaga he Parataiso mo e liu tu mai, ka e nakai maama e lautolu e vagahau haaku. Pete ni he tote agaia au, ne fifili au ke fakaako e vagahau Kamepotia ke maeke au ke tala age ke he tau kapitiga aoga haaku hagaao ki a Iehova. Ka e nakai mailoga lahi e au he mogoia to fakahakohako he fifiliaga nei e vahā haaku anoiha.

Kua uka e vagahau Kamepotia ke fakaako. Lagaua e fifili au ke tiaki, ka e fakamalolō e Iehova au puhala he tau matua haaku. Fai magaaho, ne kamata e tau faiaoga mo e tau kapitiga aoga haaku ke fakaohooho au ke foli e gahua totogi lahi. Ka e manako au ke eke mo paionia, ti fifili e au e tau fakaakoaga kū he aoga tokoluga ka lagomatai au ke kumi e gahua tupe vala magaaho ke maeke ke moua e foliaga haaku. He hili e aoga, fa mahani au ke feleveia mo e falu paionia mo e gahua mo lautolu he fonua. Ne fakaaoga noa foki e au e tau magaaho ke fakaako e tau fanau aoga ne fakaako e vagahau Palagi ko e vagahau ke uaaki​—ko e fifiliaga ne aoga lahi mahaki ki a au he mogo fakamui.

He mogo ne 16 e tau haaku, ne logona e au hagaao ke he matakau Kamepotia i Long Beach, California i U.S.A. Ne ahiahi atu au ki ai ti fakaako ke totou Kamepotia. Ko e mogo ne paase mai au he aoga, ti eke au mo paionia mo e matutaki ke fakamatala ke he tau tagata Kamepotia ne tata ke he kaina haaku. Ko e mogo ne 18 e tau haaku, ne manamanatu au ke hiki ki Kamepotia. Ko e matakavi hagahaga kelea agaia, ka e iloa e au gahoa ni he hogofulu e miliona tagata kua nonofo i Kamepotia ne logona e tala mitaki he Kautu. He magahala ia, he motu katoa na taha ni e fakapotopotoaga ne 13 e tagata fakailoa. Ne ahiahi fakamua au ki Kamepotia he 19 e tau. Ua e tau he mole, ne fifili au ke fano ke nofo i ai. Moua e au e gahua vala magaaho he fakaliliu mo e fakaako e vagahau Palagi ke lagomatai e gahua haaku ke he fonua. Nakai leva ti moua e au e hoana ne fakalataha ke he tau foliaga haaku he moui. Tokoua, ne fiafia a maua he lagomatai e tokologa he tau tagata Kamepotia ke tukulele ha lautolu a tau momoui ki a Iehova.

Kua foaki mai e Iehova e ‘tau manako he haaku loto.’ (Sala. 37:4) Ko e taute tutaki ko e gahua ne mua atu e makona. He 16 e tau ne nofo ai au i Kamepotia, ko e fakapotopotoaga tote ia ne 13 e fekafekau ha Iehova kua tupu ke 12 e fakapotopotoaga mo e fā e matakau tū mamao!​—Ne talahau e Jason Blackwell.