Moua Fēfē e Koe e Moui Mitaki?

KO E moui he vahā nei ne nakai ko e puhala ne finagalo e Atua ki ai. Lata e lalolagi ke puke he tau tagata ne fakalilifu e pule katoatoa he Tufuga, aoga mai he takitakiaga haana, mo e fakakite e mahani fakaalofa haana. Lata a lautolu ke fiafia he fakalataha auloa he feaki e tau magafaoa, fakaako ke he tau mena foou, mo e taute e lalolagi katoa mo parataiso.

MAVEHE E ATUA KE LIUAKI E MOUI HE LALOLAGI KE HE MENA NE FINAGALO E IA

• “Kua fakahiku e ia e tau ato hoko ke he fakatulakiaga he lalolagi.”​—Salamo 46:9.

• “Mo e vaha . . . ke moumou ai foki a lautolu kua moumou e lalolagi.”​—Fakakiteaga 11:18.

• “To nakai pehe mai foki taha kua nofo ai, Kua gagao au.”​—Isaia 33:24.

• “To oti ai kia lautolu ne fifili e au e tau mena ne eke ai ke he tau lima ha lautolu.”​—Isaia 65:22.

To fakamooli fēfē e tau perofetaaga nei? Kua kotofa he Atua e Tama haana ko Iesu mo Patuiki he fakatufono mitaki katoatoa ka pule mai he lagi ke he lalolagi. Fakahigoa ai he Tohi Tapu ko e Kautu he Atua. (Tanielu 2:44) Pehē e Tohi Tapu hagaao ki a Iesu: “To foaki atu he Iki ko e Atua kia ia e nofoaiki. . . . To eke a ia mo Patuiki.”​—Luka 1:32, 33.

He ha ha he lalolagi, ne loga e tau gahua ofoofogia ne taute e Iesu ke fakakite he magaaho ka Pule ai, to taute e ia e moui he tau tagata ke mua atu e mitaki ke he moui mogonei.

FAKAKITE E IESU E PUHALA KA AOGA A IA KE HE TAU TAGATA OMAOMA

• Ne fakamalolō e ia e tau gagao oti, he fakakite e puhala ka utakehe katoatoa e ia e tau kafokia mai he tau tagata.​—Mataio 9:35.

• Fakamilino e ia e tahi, he fakakite e puhala ka puipui e ia e tau tagata he tautaofi e malolō he tufugatia.​—Mareko 4:36-39.

• Fagai e ia e tokoafe, he fakakite to foaki e ia e tau mena kua lata ke leveki aki e tau momoui he tau tagata.​—Mareko 6:41-44.

• Ne faliu e ia e vai ke eke mo uaina he taonaga, he fakakite to lagomatai e ia e tau tagata ke fiafia e moui.​—Ioane 2:7-11.

Maeke fēfē a koe ke moua e moui kua tauteute he Atua ma e tau tagata kua fakaalofa ki a ia? Ha ha i ai e “hala” kua lata a koe ke fano. Fakamaama ai he Tohi Tapu ko e “hala ke pu atu ke he moui, kua tokogaogao foki a lautolu ke moua.”​—Mataio 7:14.

KUMI E HALA KE HE MOUI MITAKI

Ko e heigoa e hala ke he moui? Pehē e Atua: “Ko au ko Iehova, ko e hau a Atua, kua fakaako atu kia koe ke he tau mena ke aoga ai, kua takitaki e ia a koe ke he puhala ke fano ai a koe.” (Isaia 48:17) Ko e fano he hala nei ko e puhala mitaki lahi he moui.

Pehē a Iesu: “Ko au nai ko e puhala, mo e kupu moli, mo e moui.” (Ioane 14:6) Ko e talitonu ke he tau kupu mooli ne fakaako e Iesu mo e muitua ke he fakafifitakiaga ne fakatoka e ia ka fakatata a tautolu ke he Atua ti aoga ai ki a tautolu.

Moua fēfē e koe e hala ke he moui? Kua loga e lotu ati hataki e Iesu: “Nakai hohoko ke he kautu he lagi a lautolu oti kua pehe mai kia au, Ko e Iki na e, ko e Iki na e; ka ko ia ni kua eke e finagalo he haku a Matua ha ha he lagi.” (Mataio 7:21) Pehē foki a ia: “To iloa mali e mutolu a lautolu ke he tau fua ha lautolu.” (Mataio 7:16) Maeke e Tohi Tapu ke lagomatai a koe ke iloa e tapuakiaga mooli mai he tapuakiaga fakavai.​—Ioane 17:17.

Fano fēfē a koe he hala ke he moui? Putoia ai e iloa e Punaaga he moui: Ko hai a ia? Ko hai e higoa haana? Fēfē a ia? Ko e heigoa haana kua taute? Ko e heigoa kua manako a ia ke taute e tautolu?a

Manako e Atua ke he tau tagata ke nakai ni gahua, kai, fefeua, mo e feaki e magafaoa. Maeke a tautolu ke iloa e Tufuga ha tautolu ti eke mo kapitiga haana. Fakakite e tautolu e fakaalofa ki a ia he taute haana finagalo. Pehē a Iesu: “Ko e moui tukulagi foki hanai, kia iloa e lautolu a koe, ko e Atua moli tokotaha ni.”​—Ioane 17:3.

TAUTE E LAKAAGA FAKAMUA HE FENOGA HAAU

He fakaako ke fakafiafia e Atua mooli tokotaha ni kua liga lata ke taute e tau hikiaga pauaki. Tuga kua uka e mena ia. Ka ko e mooli, ko e fenoga fulufuluola ka kamata ke ō i ai. Ke lagomatai a koe ke moua e tau tali ke he tau hūhū aoga hagaao ke he Atua, kua foaki he Tau Fakamoli a Iehova e fakaakoaga Tohi Tapu ne nakai totogi he magaaho mo e matakavi kua hagahaga mitaki ki a koe. Maeke a koe ke matutaki ki a mautolu he fakaaoga ha mautolu a faahi kupega hila he www.pr418.com.