Tau Mena Tutupu mai he 2011 Yearbook
“Fai Hūhū Au”
Ko e matakainaga fifine paionia motua mai i Cyprus ne tohi: “He mogo pogipogi he Aho Lotu ne nakai malolō lahi au, ka e he nakai nofo i kaina, kua manako lahi ni au ke gahua fakamatala he puhalatū. Ti liogi au ki a Iehova mo e ole ke fakafano mai e ia taha tagata ne fai magaaho ke hau ke nofo he nofoa he tapa haaku, ke maeke ia au ke kamata e fakaako Tohi Tapu. Nakai leva ti hau e fuata taane mai i Nepal. Ne totō e au e tau mekasini he lima haaku, ka e fakamua to tala au ki a ia, ne hūhū a ia ko e hagaao ke he heigoa e tau mekasini. Magaaho ne tala age e au ko e tau tohi kua fakavē ke he Tohi Tapu, ne pehē a ia: ‘Matua fifine, fai magaaho au, maeke nakai au ke nofo he tapa haau? Fai hūhū au hagaao ke he Tohi Tapu ne manako au ke hūhū ki a koe.’
“Ne talia mooli e au, ha ko e mena tonu ia ni ne ole au ki a Iehova! Ti matutaki atu e tagata: ‘Ko e hūhū fakamua haaku, Ko e heigoa ne fakaako mooli he Tohi Tapu?’ Ne ofo lahi au ti uka lahi au ke tali! Ne tamai e au e tohi Ko e Heigoa ne Fakaako Moli he Tohi Tapu? he kato haaku ti fakakite age ki a ia. Onoono a ia ke he tohi, onoono mai ki a au, ti hūhū, ‘Nakai kia ko e mataulu he tohi nei, ko e hūhū ne hūhū atu laia e au mogoia ki a koe?’ Ti kamata e au e fakaako Tohi Tapu he nofoa he paaka! Kua fakaako tumau e ia mogonei e Tohi Tapu ti pihia foki ke he tau feleveiaaga, ti kua talahau e ia e manako haana ke hu he Aoga Fekafekau Fakateokarasi. Kua loto fakaaue lahi au ke he uho he falanaki katoatoa ke he malolō mo e takitakiaga ha Iehova ka taute e fekafekauaga faka-Kerisiano, pete ni kua mategugu e tino he falu magaaho.”
Taufetului mo e Tau Agaaga Kelea
Ko Soare Maiga ne nofo he maaga kavi ke 50 e kilomita mai i Port Moresby, Papua Niu Kini, mo e kua matakutaku lahi he tau agaaga kelea haana. Ka e pete ia, ne manako a ia ke he tau taofiaga he Tau Fakamoli a Iehova ti kamata ke fakalataha atu ke he tau matakau fakaako Tohi Tapu. Nakai leva ti talia e ia e kupu mooli mo e tiaki e tau puhala tuai haana. Ka e magaaho ne lali a ia ke tiaki e tau koloa fakataulatua haana, ka e he falu puhala matakehe ne liu mai ni! Moha ia, ne manako lahi a Soare ke ‘totoko ke he tiapolo,’ ti taha aho ne fafao oti e ia e tau koloa i loto he kato, fakamamafa aki e maka, mo e liti atu ke he tahi i Port Moresby. (Iako. 4:7) Magaaho ia ko e tau koloa haana ne nakai liliu mai. Fakamui, ko e tagata taane loto malolō nei kua eke mo taha Fakamooli fakamakutu he Atua mooli, ko Iehova.
Ko Kora Leke ne fakaaoga e puhala he taulatua mo e tau vai lakau ke tului aki e tau gagao. Pete ia ko e magaaho ne kamata e tagata taane nei ke fakaako Tohi Tapu, ne taufetului a ia ke hola kehe mai he agaaga ne lagomatai a ia mo e tau gahua taulatua haana. Tuga a Soare, ne eketaha a Kora ke fakaoti e matutakiaga haana mo e tau temoni—ti kautū a ia mai he lagomataiaga ha Iehova. He magaaho fakamui, ne paionia mau a ia ti eke foki mo paionia pauaki. Pete he motua a ia mo e lolelole haana tau hui, ne fakatumau e matakainaga loto fakamooli nei ke fakailoa e tala mitaki ke he tau katofia haana.
Hoko atu fēfē a Kora ke he matakavi mahuiga haana ke fakamatala? Ne toho he tau matakainaga a ia he huilapa, ko e puhala na ia ne hagahaga mitaki. He magaaho fakamui, ne talaga he matakainaga lotomatala he la ofisa e nofoa fakataveli ma haana mai he tau lapatoa he nofoa, tau hui pasikala, mo e lā ke lata mo e nofoa. Ko e puhala faifano foou ha Kora kua tuku age ki a ia, lahi e malolō ke fano tokotaha, ti fakaaoga fakamitaki e ia! E, ko e omoomoi ha ia he fakafifitakiaga ha lautolu ia ne kua momotua, ti kua fakafiafia mooli ha ia e lautolu e loto ha Iehova!—Fakatai 27:11.