Maeke Nakai he Akau kua Hio ke Liu Tuputupu?

FAKATATAI ke he akau arasi fulufuluola i Lepanona, ko e akau olive ne kua maloku mo e mavilovilo ne tuga kua nakai nava lahi ki ai. Ka kua ofoofogia e malolō he tau akau olive ke tumau e moui he tau tuaga uka. Falu ne kavi ke 1,000 tau he moui. Ko e tau hokohoko he akau olive kua loloa hifo he kelekele, ti maeke he akau ke liu moui pete kua popo e matapatu. Ka tumau e moui he tau hokohoko, to tumau e akau ke tuputupu.

Ko e tagata fakamooli ko Iopu ne mauokafua ka mate a ia, to liu a ia ke moui foki. (Iopu 14:13-15) Fakaaoga e ia e fakataiaga he akau, liga ko e akau olive, ke fakakite e mauokafua haana ke he lotomatala he Atua ke fakaliu tu mai a ia. Pehē a Iopu: “Ko e mena ka hio e akau kua amaamanaki ai ke tuputupu foki.” Ka tō e uha he mole e to laā, ko e matapatu he olive ne magomago kua maeke ke liu moui foki mo e tupu mai e “tau la, tuga ne lakau mui.”​—Iopu 14:7-9.

Tuga ne tagata gahua fonua ne makai ke kitia e akau olive ne hio kua liu tuputupu, ko Iehova ko e Atua kua makai ke fakaliu tu mai haana tau fekafekau mo e tokologa atu foki. (Mataio 22:31, 32; Ioane 5:28, 29; Gahua 24:15) Manamanatu la ke he olioli ka moua e tautolu he liu fakafeleveia a lautolu ne mamate mo e kitia a lautolu kua liu momoui!