Isaya
9 Nikwa omwirimya munene syendisyabya ng’omughulu ekihugho kyabya omo bulighe, ng’omo mighulu ya kera omughulu ekihugho kya Zebuloni n’ekihugho kya Naftali byabya bikapokibwa. Nikwa enyuma sy’aho, akendisyaleka ikyabana olukengerwa—enzira eyikalolaya oko ngetse, omo kiharo kye Yordani, e Galilaya y’ebihanda.
2 Abandu ababya bakalendera omo mwirimya
Babirilangira ekyakakala kinene.
N’abandu abikere omo kihugho ekirimo ekyutsutsu kinene,
Ekyakakala kyabirikoleryabo.
3 Wabirikanyirirya ekihanda;
Wabirileka ikyatsema kutsibu.
Bakatsema embere syaghu
Ngoko abandu bakatsema omughulu w’erighesa
Ng’abakatsema bakaghaba ebyo balyanyegha.
4 Kusangwa omuketo* w’omuheke wabo wabiritsutsangagho mo bitswe-bitswe,
Omwigho owali oko bitigho byabo, omutso w’omukama,
Ng’omo kiro kya Midiani.
5 Obuli kiryato ky’abasuda ekikasukanaya ekitaka kikabasula
N’obuli lukimba olwabirilubikwa omo musasi
Bikendisyabya ngwi sy’eryakya omuliro.
6 Kusangwa omwana abiributwa busana netu,
Twabirihabwa omwana w’obulume;
N’obutabali* bukendisyabya oko kitigho kiwe.
Akendisyahulwa mo Muhani w’Eriswekera, Mungu Mutoki, Tata w’Erikota, Munya-mwami w’Obuholo.
7 Sihendisyabya nduli
Okw’ikanyirira ly’obutabali* bwiwe n’oko buholo,
Oko kitumbi ky’obwami kya Daudi n’oko bwami bwiwe
Erihanganiabo ndeke n’erisikyabo
Omo bulingirirania n’eritunganene
Eritsuka lino erihika kera na kera.
Omuhwa wa Yehova w’emilondo akendisyakola eki.
8 Yehova mwatuma ekinywa ky’eritswera Yakobo,
Nakyo kyabirihika oko Israeli.
9 N’ebitunga byosi by’abandu bikendisyaminyakyo
—Efraimu n’abikalani be Samaria—
Abakabugha omo miyiheko yabo n’omo bukiru bw’emitima yabo bati:
10 “Esyombiriki syabiritera,
Nikwa tukendihimba omo mabwe awabatsire.
Emiti y’emikuyu yabirikondwa,
Aliwe tukendisubya omo mwanya wayo emiti y’emierezi.”
11 Yehova akendisyahangania abaponire Rezini ibalwa na Rezini
Kandi akendisyatsotsya esyonzighu siwe erikola omwatsi mulebe
12 E Siria ikendisyasira oko luhande lw’eyo eryuba rikasira n’Abafilistini bakendisyasira oko luhande lw’eyo eryuba likalengera,*
Bakendisyalya e Israeli omo muno awatandire
Busana n’ebyosi ebi, erihitana liwe siririryumbya
Nikwa ebyala biwe bikinasumbire busana n’erihunza.
13 Kusangwa abandu sibetasuba oko oyukahunzabo;
Sibetasonda-sonda Yehova w’emilondo.
14 Yehova akendisyatwa omo Israeli
Omutwe n’omukira, erisasa n’erisesa,* oko kiro kighuma.
15 Omutwe, yo musyakulu n’omundu oyusikibwe kutsibu,
N’omuminyereri oyukakangiriraya eby’amabehi yo mukira.
16 Abakasondola abandu aba bakaleka ibaghanga-ghanga,
N’abakasondolawa bakabula nga baghendere oko kyahi.
17 Busana n’ekyo, Yehova syendisyatsemera abalwana babo,
Kandi syendikwira abana babo abatawite abise* n’abakwa-kali babo bo bulighe
Kusangwa abosi bakayisamambula kandi ni bakoli b’ebibi
N’obuli buno bukabugha ebinywa bitya-bitya.
Busana n’ebyosi ebi, erihitana liwe siririryumbya,
Nikwa ebyala biwe bikinasumbire busana n’erihunza.
18 Kusangwa obubi bukaka ng’omuliro,
Bukahisaya ekisaka ky’amahwa n’ebiti.
Bikendihisya ebisaka by’omusitu,
Nabyo bikenditumbukya omuki omo kyanya.
19 Omw’ihitana lya Yehova w’emilondo
Ekihugho kyabirihisibwa omo muliro,
N’abandu bakendibya syongwi sy’eryakya omuliro.
Sihali omundu oyukendibalya oghundi, nibya na mughala wabo.
20 Omundu akenditwa oko luhande lw’amali
Aliwe iniabya inianakwire enzala;
N’omundu akendirya oko biri oko luhande lw’amalembe
Aliwe iniatughuta.
Obuli mundu akendirya omunyoku w’okuboko kwiwe-kwiwe,
21 Manase akendirya Efraimu,
Na Efraimu inyalya Manase.
Abosi haghuma bakendilwa na Yuda.
Busana n’ebyosi ebi, erihitana liwe siririryumbya,
Nikwa ebyala biwe bikinasumbire busana n’erihunza.