Ezekieli

14 Abasyakulu balebe b’Abaisraeli mubasa bamasyikala embere syaghe. 2 Neryo ekinywa kya Yehova mukyanihikako, kiti: 3 “Mughala w’omundu, abalume aba bayisoghire kundu erikwamirira esyosanamu syabo esikita nye, kandi babirihira embere sy’abandu y’ekindu ekikatwikalaya ekikaleka abandu ibakola erilolo. Ninalekebo banibulaye omwatsi wosi-wosi? 4 Neryo ukanaye nabo ubwirebo uti, ‘Yehova, Omukama Mukulu oko Bosi ati: “Omuisraeli amabiyisogha kundu erikwama esyosanamu siwe esikita nye, kandi amabihiraho ekindu ekikatwikalaya ekikaleka abandu ibakola erilolo, neryo inyasa erisyabulya omuminyereri, ingye, Yehova ingendisyamusubirya erikwamana n’obungyi bw’esyosanamu siwe esikita nye. 5 Ingendisyahira obuba omo mutima w’abana ba Israeli,* kundi imubanisighania bamakwama esyosanamu syabo esikita nye.”’

6 “Neryo ubwire abana ba Israeli uti, ‘Yehova, Omukama Mukulu oko Bosi, ati: “Musubule, muyihighule oko syosanamu syenyu esikita nye, kandi muleke emikolere yenyu yosi eyikita nye. 7 Kusangwa Omuisraeli kutse omubunga oyo wikere omo Israeli amabinisighania aliwe ibwa inyayisogha kundu erikwama esyosanamu siwe esikita nye n’erihiraho ekindu ekikatwikalaya ekikaleka abandu ibakola erilolo, neryo inyasa erisyabulya omuminyereri, ingye, Yehova, ingendimusubirya ingyuwene-wene. 8 Ingendibya nzighu y’omundu oyo n’erimuyira mo kindu ky’erilangirirako ekikakunga, n’oyo abandu bakendibya bakabugha omo hisimo hyabo. Kandi ingendimulusya omo kati-kati k’abandu baghe; nenyu imukendiminya ngoko indi Yehova.”’

9 “‘Aliwe omuminyereri amabitebwa neryo inyasubirya, ingye Yehova, n’ingye ingendibya inabiriteba omuminyereri oyo. Neryo ingendikakya ebyala byaghe erilwa naye kandi ingendimulusya omo bandu ba Israeli. 10 Olubanza lwabo ilukendibya okw’ibo; olubanza lw’oyulyabulaya n’olubanza lw’omuminyereri, lukendisyabya lughumerera, 11 Abandu b’enyumba ya Israeli baleke erighanga-ghanga hali okw’ingye n’erileka eriyitsandya omo bibi byabo. Neryo bakendibya bandu baghe, naghe ngendibya Mungu wabo,’ Yehova, Omukama Mukulu oko Bosi atya.”

12 Kandi ekinywa kya Yehova mukyasyanihikako, kiti: 13 “Mughala w’omundu, ekihugho kilebe kyamabikola erilolo omw’inileghulako, ingendisyasumba ebyala byaghe erilwa nakyo n’eritsandya aho kikalusaya akalyo,* kandi ingendisyatuma kukyo kw’enzala n’eriita mukyo omundu n’enyama.” 14 “Nibya n’abalume basatu bano—ye Noa, na Danieli, na Yobu—bamabya mukyo, ibakendiyilamya* ibo basa busana n’eritunganene lyabo,’ Yehova Omukama Mukulu oko Bosi atya.”

15 “‘Kutse tubughe tuti inaleka esyonyama esikalire silabe-labe omo kihugho ekyo n’eribugha mukyo* mw’abandu n’eriyirakyo mo matongo, isihali omundu oyo wangasyalaba mukyo busana n’esyonyama sy’omoli. 16 Kwenene-kwenene ngoko niriho,’ Yehova, Omukama Mukulu oko Bosi atya, ‘Nibya n’abalume basatu aba nomo bangabya mukyo, isibendilamya abana babo b’obulume kutse abana babo b’obukali; ibakendiyilamya ibo basa, n’ekihugho ikikendibya matongo.’”

17 “‘Kutse tubughe tuti inaleta omuyali oko kihugho ekyo n’eribugha niti: “Omuyali alabe-labe omo kihugho,” neryo inabugha omo kihugho mw’omundu n’enyama, 18 nibya n’abalume basatu aba nomo bangabya mugho, kwenene-kwenene ngoko niriho,’ Yehova, Omukama Mukulu oko Bosi atya, ‘isibendilamya abana babo b’obulume kutse abana babo b’obukali; ibakendiyilamya ibo basa.’”

19 “‘Kutse tubughe tuti inatuma oko kihugho ekyo kw’ekihunzo n’eryutulira kukyo kw’erihitana lyaghe erilabira eryutika ly’omusasi, eribugha mukyo mw’omundu n’enyama, 20 nibya na Noa, Danieli, na Yobu nomo bangabya mukyo, kwenene-kwenene ngoko niriho,’ Yehova, Omukama Mukulu oko Bosi atya, ‘isibendilamya abana babo b’obulume kutse abana babo b’obukali; ibakendiyilamya* ibo basa busana n’eritunganene lyabo.’”

21 “Kusangwa Yehova, Omukama Mukulu oko Bosi ati: ‘Ko binemwenedisyabya bitya oko Yerusalema omughulu ngendisyatuma kuyo kw’emyatsi yaghe ini* eyo ngendisyakolesya erisuyirayo—omuyali, enzala, esyonyama esikalire, n’ekihunzo—eribugha omo Yerusalema mw’omundu n’enyama. 22 Nikwa abandu balebe abakendisyasighala muyo bakendisyabala neryo bakendisyalusibwamo, abana b’obulume n’ab’obukali. Banemwasa eyo muli, nenyu mukendibya mwalangira esyonzira syabo n’emikolere yabo, oko kwenene mukendikiranibwa oko buhanya obo naleta oko Yerusalema, oko myatsi yosi eyo nakolerayo.’”

23 “‘Bakendibakirania omughulu mukendilangira esyonzira syabo n’emikolere yabo, nenyu mukendiminya ngoko ebyosi ebyo nakolayo munitakolabyo isihali ekikaleka,’ Yehova, Omukama Mukulu oko Bosi atya.”