Ezekieli

20 Neryo oko mwaka we 7 oko mwisi w’akatano ekiro kye 10, abasyakulu balebe be Israeli mubasa bamikala embere syaghe erisyabulya Yehova ng’akabugha atiki. 2 Neryo ekinywa kya Yehova mukyanihikako kiti: 3 “Mughala w’omundu, ukanaye n’abasyakulu be Israeli, ubwirebo uti, ‘Yehova, Omukama Mukulu oko Bosi ati: “Mukasa erisyanibulya? ‘Kwenene-kwenene ngoko niriho, sinendibasubirya,’ Yehova Omukama Mukulu oko Bosi atya.”’

4 “Mughala w’omundu, unayiteghekire eritswerabo?* Unayiteghekire eritswerabo? Uminyisayebo emyatsi eyikita nye eyo abotata-kulu wabo bakola. 5 Ubwirebo uti, ‘Yehova, Omukama Mukulu oko Bosi ati: “Omughulu nasombola Israeli, munalapa* oko lubuto* lw’enyumba ya Yakobo, kandi ingyuwene-wene munayiminyisya kubo omo kihugho kye Misri. Kwenene munalapa busana nabo n’eribugha niti, ‘Indi Yehova Mungu wenyu.’ 6 Ekiro ekyo, munalapa ngoko ngendilusyabo omo kihugho kye Misri inatwalabo omo kihugho ekyo nasonderayabo,* ekihugho ekikasendamo amaziwa n’obuki. Kyo kyabya kihugho ekyuwene kutsibu* oko bihugho byosi. 7 Neryo munabwirabo niti, “Litolere obuli mundu iniaghusa ebindu by’esyonye ebiri embere syenyu; isimwayitsandaya omo syosanamu sye Misri esikita nye.* Ingye indi Yehova Mungu wenyu.’

8 Aliwe mubayisamambula okw’ingye kandi mubatanza erinihulikirira. Mubataghusa ebindu ebikita nye ebyabya embere syabo, kandi mubataleka esyosanamu sye Misri esikita nye. Neryo munabugha ngoko ngendyutulira kubo kw’erihitana lyaghe n’eributulirako ndeke-ndeke ekinigha kyaghe omo kihugho kye Misri. 9 Nikwa munayira eky’erikola erina lyaghe likasyahemulwa omo kati-kati k’ebihanda eyo babya bikere. Kusangwa ingyuwene-wene munayiminyikalya kubo* embere sy’ebihanda omughulu nalusayabo omo kihugho kye Misri. 10 Neryo munalusyabo omo kihugho kye Misri, namatwalabo omo mbwarara.

11 “‘“Neryo munahabo ebihano byaghe n’eriminyisyabo ebyalayiro byaghe, omundu oyukakwamabyo inyatoka eribyaho busana nabyo. 12 Kandi munahabo n’esyosabato syaghe eribya kiminyikalo omo kati-kati kaghe nabo, neryo ibaminya ngoko ingye Yehova, n’ingye ngahighulabo eribya babuyirire.

13 Nikwa abandu b’enyumba ya Israeli mubayisamambula okw’ingye omo mbwarara. Mubatakwama ebihano byaghe, kandi mubaghana erisoha lyaghe, eryo omundu amabikwama iniakendibyaho busana nalyo. Mubatsandya kutsibu esyosabato syaghe. Neryo munabugha ngoko ngendyutulira kubo kw’erihitana lyaghe omo mbwarara, erihwerekereryabo. 14 Aliwe busana n’erina lyaghe munayira eky’erikola likasyatsandibwa omo bihanda, ebihanda ebyalangira ngabalusyayo.* 15 Kandi ibane omo mbwarara, munalahirya ngoko sinendiletabo omo kihugho ekyo nabya inabirihabo—ekihugho ekikasendamo amaziwa n’obuki, ekihugho ekyuwene kutsibu* oko bihugho byosi— 16 kundi mubaghana erisoha lyaghe, mubatakwama ebihano byaghe, mubatsandya n’esyosabato syaghe, kusangwa emitima yabo yabya ikakwama esyosanamu syabo esikita nye.

17 “‘“Nikwa munakwirabo obulighe, kandi munitaheryabo; munitahwerekereryabo omo mbwarara. 18 Omo mbwarara munabwira abana babo niti, ‘Isimwakwama ebighenderwako by’abotata-kulu wenyu kutse eritswera lyabo kandi isimwayitsandaya omo syosanamu syabo esikita nye. 19 Indi Yehova Mungu wenyu. Mukwame ebihano byaghe, n’erisikya erisoha lyaghe, kandi muteghayebyo. 20 Kandi mulangire esyosabato syaghe mo kindu ekibuyirire, nasyo sikendisyabya kiminyikalo omo kati-kati kaghe nenyu, imwatoka eriminya ngoko indi Yehova Mungu wenyu.’

21 “‘“Nikwa abana babo mubatsuka erighana erinyowa. Mubatakwama ebihano byaghe, kandi mubatakwama kutse erisikya erisoha lyaghe, ebyo omundu amabikwama iniakendibyaho busana nabyo. Mubatsandya esyosabato syaghe. Neryo munayilagha ngoko ngendisyabutulirako erihitana lyaghe n’eributulirako ndeke-ndeke ekinigha kyaghe omo mbwarara. 22 Aliwe munayikakirya kandi munayira eky’erikola busana n’erina lyaghe, likasyatsandibwa omo kati-kati k’ebihanda, ebihanda ebyalangira ngabalusyayo.* 23 Kandi munalahirya ngoko ngendisyapanza-panzirabo omo bihanda n’eripanza-panzirabo omo bihugho, 24 kusangwa mubatakola erisoha lyaghe kandi mubaghana ebihano byaghe, mubatsandya esyosabato syaghe, kandi mubakwama* esyosanamu sy’abotata-kulu wabo esikita nye. 25 Kandi munabaleka bakwame ebighenderwako ebituwene n’erisoha erite ryangabaha engebe. 26 Munalekabo batsande omo mahere wabo—omughulu babya bakalabya obuli mwana wabo w’erimbere omo muliro—eriheryabo, neryo ibaminya ngoko indi Yehova.”’

27 “Neryo mughala w’omundu, ukanaye n’abandu b’enyumba ya Israeli, ubwirebo uti, ‘Yehova Omukama Mukulu oko Bosi ati: “Abotata-kulu wenyu nabo mobanitsuma batya bakataluka eribya bataleghula okw’ingye. 28 Munaletabo omo kihugho ekyo nalahiraya niti ngendisyahabo. Babere balangira ehitwa hiri-hiri n’emiti eyiriko ebiti bingyi,* mubatsuka eriherera amahere wabo n’esyohongo syabo esikahitanaya. Eyo, mubaleta ekikumbo ekyuwene* ky’amahere wabo n’eriherera amahere wabo w’obwabu. 29 Neryo munabulyabo niti, ‘Omwanya w’endata ogho mukabya mukayako, mukabya imukayira muti? (Erihika na munabwire akinahulawa mo mwanya w’endata.)’”’

30 “Neryo ubwire abandu b’enyumba ya Israeli uti, ‘Yehova Omukama Mukulu oko Bosi ati: “Mukendiyitsandya ngoko abotata-kulu wenyu bakola omw’ikwama esyosanamu syabo esikita nye erikola nasyo obumbalaka bw’obunya-kirimu kwehi? 31 Kandi erihika munabwire mukinayitsandaya mukaherera esyosanamu esikita nye sy’amahere, mukalabya abana benyu b’obulume b’omo muliro? Neryo inywe bandu b’enyumba ya Israeli, naghe oko ndambi ngumerera eyo, linatolere inasubirya oko misabe yenyu?”’

“Yehova Omukama Mukulu oko Bosi ati, ‘Oko kwenene ngoko niriho, sinendisyasubirya oko misabe yenyu. 32 N’ebyo mukalengekanaya omughulu mukabugha muti, “Muleke tubye ng’ebihanda, ng’ebitunga by’omo bindi bihugho, ebikaramaya emiti n’amabwe,” sibyendisyabya n’ahake.’”

33 “‘Kwenene-kwenene ngoko niriho,’ Yehova Omukama Mukulu oko Bosi atya, ‘Ngendisyabatabalako ng’omwami omo byala by’amaka, okuboko okusumbire, n’omw’ihitana rinene. 34 Ngendisyabalusya omo bihanda n’eribahindania haghuma erilua omo bihugho eyo mwapanza-panzirawa omo byala by’amaka, omo kuboko okusumbire, n’erihitana eryutawa. 35 Ngendisyabaleta omo bwerere bw’ebihanda n’eribatswera imunatungererene.

36 “‘Ngoko nanatswera abotata-kulu wenyu omo bwerere bwe Misri, nenyu ko ninemwendibatswera nitya,’ Yehova Omukama Mukulu oko Bosi atya. 37 ‘Ngendisyabalabya omo mutso w’omulisya, n’eribakasa* erisikya endaghane. 38 Aliwe ngendisyalusya ewenyu y’abakaghana erinyowa, n’abakanikosera. Kusangwa ngendisyabalusya omo kihugho ekyo bikalamo mo babunga, nikwa sibendisyingira omo kihugho kya Israeli; nenyu mukendisyaminya ngoko indi Yehova.’

39 “Nikwa inywe bandu b’enyumba ya Israeli, Yehova Omukama Mukulu oko Bosi ati: “Obuli mughuma w’okw’inywe aghende eriyakolera esyosanamu siwe esikita nye. Nikwa enyuma sy’aho, mwamatendinihulikirira, simwendisyasyatoka eritsandya erina lyaghe eribuyirire omo mahere wenyu n’omo syosanamu syenyu esikita nye.

40 “Yehova Omukama Mukkulu oko Bosi ati, ‘Oko kitwa kyaghe ekibuyirire, oko kitwa kiri kya Israeli, ho abandu bosi b’enyumba ya Israeli, ibo bosi, bakendisyanikolera omo kihugho. Eyo ngendisyatsemerabo, kandi ngendisyasaba ebihembo byenyu, n’eby’erimbere-mbere by’amahere wenyu, ebindu byenyu byosi ebibuyirire. 41 Ekikumbo ekyuwene kikendisyaleka inabatsemera ngabalusya omo bihanda n’eribahindania haghuma erilua omo bihugho eyo mwapanza-panzirawa, naghe ngendisyabya mubuyirire omo kati-kati kenyu omo meso w’ebihanda.’

42 “‘Nenyu mukendisyaminya ngoko indi Yehova omughulu ngendisyabaleta omo kihugho kya Israeli, omo kihugho ekyo nalahiraya ngoko ngendisyaha abotata-kulu wenyu. 43 N’eyo mukendisyibuka emighendere yenyu n’emikolere yenyu yosi eyo mwayitsandayamo, nenyu mukendisyayikwa* esyonye busana n’ebibi byosi ebyo mwakola. 44 Neryo inywe bandu b’enyumba ya Israeli, mukendisyaminya ngoko indi Yehova omughulu ngendisyayira eky’erikola busana n’erina lyaghe, butsira erikwamana n’emighendere yenyu mibi kutse erikwamana n’emikolere yenyu eyitsandire,’ Yehova Omukama Mukulu oko Bosi atya.”

45 Kandi ekinywa kya Yehova mukyanihikako kiti: 46 “Mughala w’omundu, ubinduke uloleraye obusu bwaghu oko kiharo ky’oko luhande lw’eyikwa, utulaghanaye ekinywa busana n’oluhande lw’eyikwa, kandi ubughe omo buminyereri ebikendihikira omusitu w’omoli ow’oko luhande lw’eyikwa. 47 Ubwire omusitu w’oko luhande lw’eyikwa uti, ‘Uhulikirire ekinywa kya Yehova. Yehova Omukama Mukulu oko Bosi ati: “Ngakaya oluhindi busana nenyu, nalo lukendihisya ewaghu obuli muti mubisi n’obuli muti oghumire. Ekirimi ky’omuliro oyo sikyendisyalimibwa, nagho akendihisya amusu wosi, erilua oko luhande lw’eyikwa erihika oko luhande lw’endata. 48 N’abandu* bosi bakendisyalangira ngoko ingye Yehova, ingyuwene-wene, nabiryakya omuliro, isyalimibawa.”’”

49 Naghe munabugha niti: “Ingye muhanya, Yehova, Mukama Mukulu oko Bosi! Banemunibughako bati, ‘Akabera eribugha omo syondekerano.’”*