Isaya

61 Ekirimu kya Yehova Omukama Mukulu oko Bosi kiri okw’ingye,

Kusangwa Yehova abirinihirako amaghuta nitoke eritula engulu mbuya oko bolobolo.

Abirinituma erisyalunga ab’emitima eyibunikire,

Eribwira abali omo muliki ngoko bakendibya bwiranda

N’erilibula ndeke ameso w’abali omo muliki,

 2 Eritula omwaka wa Yehova ow’olukogho,

N’ekiro ky’erikisya ky’oMungu wetu,

Erikirania abosi abakalira,

 3 Eriha abakalira busana na Sioni,

Eribaha eky’eryambala oko mutwe omo mwanya w’eribu,

Amaghuta w’eriyisyandira omo mwanya w’ekiriro,

Olukimba lw’eripipa omo mwanya w’ekirimu ekibunikire.

Nabo bakendisyahulwa mo miti minene-minene y’eritunganene,

Eyo Yehova ahera atoke eribana olukengerwa.*

 4 Bakendisyasyahimba ebisambukalirya bya kera;

Bakendisyahangania amatongo wa kera.’

Kandi bakendisyasubya emiyi eyatoghotibawa,

Emyanya eyabya iyabiribya matongo omo bizazi n’ebizazi.*

 5 Ab’ehandi bakendisyahangana n’eribya balisya b’ebihangulo byenyu,

N’ababunga bekendisyabya balimi benyu n’abalimiriri benyu b’emizabibu.

 6 Nikwa inywe mukendisyahulwa mo bahereri ba Yehova;

Bakendisyabahula mo baghombe b’oMungu wetu.

Mukendisyalya ebindu by’ebihanda,

N’eriyihalamba omo lukengerwa* lwabyo.

 7 Omo mwanya w’esisoni mukendisyahabwa amaghabo abiri,

N’omo mwanya w’erihemuka bakendisyuta obwogho bw’obutseme busana n’erighabo lyabo.

 8 Kusangwa ingye Yehova, nyanzire obulingirirania;

Niponire obwibi n’obutatunganene.

Ngendisyalihabo obuhingyi bwabo omo butaleghula,

Kandi ngendisyakola haghuma nabo endaghane ya kera na kera.

 9 Abana babo bakendisyaminywa omo bihanda

N’abitsikulu babo omo kati-kati k’ebitunga by’abandu.

Abosi abakendisyalangirabo bakendisyaminyererabo,

Ngoko ni bana abo Yehova abiritsumula.”

Kusangwa abirinyambalya esyongyimba sy’omulamo;

Abirinyambalya ekanzu* y’eritunganene,

Ng’iba w’omuheruki oyumbite esapu y’ekilemba eyiri ng’ey’omuhereri,

Kandi ng’omuheruki oyukayipamba omo mapambo wiwe.

11 Kusangwa ngoko ekitaka kikanahulukaya ehiti hilere-hilere

Kandi ngoko eririma likanalasaya ebiryaherawa mulyo,

Na Yehova Omukama Mukulu oko Bosi

Kw’akendisyaleka atya eritunganene n’eripipa ibyalasa embere sy’ebihanda byosi.