Isaya
29 Obulighe oko Arieli,* e Arieli, omuyi ogho Daudi ahiramo ekambi!
Ulolaye embere omwaka oko ghundi;
Omutimbo w’ebiro bikulu alolaye emuliro.
2 Aliwe ngendyaghalya e Arieli,
Neryo hakendibya ekiriro n’erisusumana,
Nayo ikendisyabya okw’ingye ng’eriko ry’ekiherero ky’oMungu.
3 Ngendisyakutimbyako ekambi oko mbande syosi,
Kandi ngendisyakutimbyako oluba lw’emiti eyitsongire erikubambira
Nerihangania busana naghu ebindu ebikakolesibawa eribambira.
4 Ukendisyakimibwa;
Ukendisyabugha ighune ahisi,
N’olututu lukendisyaliba-libania ebyo ukabugha.
Omulenge waghu akendisyaluira omo kitaka
Ng’omulenge w’omundu oyukakanaya n’esyombinga,
Ebinywa byaghu bikendisyaluira omo lututu ng’eritswira ly’akanyunyu.
5 Ekikumula ky’esyonzighu* syaghu kikendisyabya ng’eyisyano eyiswererere,*
N’ekikumula ky’abanubya kikendisyabya ng’omusunga buyira owakaghuluka omo rihunga.
N’ekyo kikendisyabya omo katambi kake, omw’itsumbukania.
6 Yehova w’emilondo akendisyakutungerera
Omo milumo, omo musiki, n’omo lukanda lunene,
Omo kihunga ekikabuhirira n’omo kihunga n’omo birimi by’omuliro owakahisaya.”
7 Neryo ekikumula kyosi ky’ebihanda ebikalwa na Arieli
—Abosi abakalwa nayo,
Amanyumba mali-mali awakabambirayo,
N’abakaghalayayo—
Bakendisyabya ng’erilota, esyonzoli sy’omo kiro.
8 Inga, kikendisyabya ng’omughulu omundu oyukwire enzala* akalota inyanemulya,
Aaliwe akabuka inyakinakwire enzala,
Kandi ng’omughulu omundu oyukwire enyota akalota inyanemunywa,
Aliwe akabuka inyanaluhire kandi inyanakwire enyota.*
Ko bikendisyabya bitya oko kikumula ky’ebihanda byosi
Ebikalwa n’ekitwa kye Sioni.
9 Mutunale n’erikukubala;
Muyiyire mo ndime-time n’eribya ndime-time.
Bakundire, aliwe butsira busana n’edivai.
Bakaghuna-ghuna, aliwe butsira busana n’obwabu.
10 Kusangwa Yehova abiributulirako ekirimu ky’otughotseri tunene;
Abiriliba ameso wenyu ni bugha ambu abaminyereri,
Kandi abiriswika emitwe yenyu ni bugha ambu abalangiri b’esyonzoli.
11 Obuli nzoli yabiribya okw’inywe ng’ebinywa by’ekitabu ekibohire. Bamabihakyo omundu oyo wasi erisoma, bati: “Kisi-kisi, utusomere kino omo mulenge muli,” naye iniakendisubirya ati: “Sinangatoka erisomakyo, kusangwa kibohire.” 12 Kandi bamabihakyo omundu oyutasi erisoma bati: “Kisi-kisi, soma kino,” naye iniakendibugha ati: “Sinyasi erisoma n’ahake.”
13 Yehova ati: “Abandu aba bakayitunda hakuhi naghe omo buno bwabo busa
Kandi bakanisikaya omo buno* buyira
Aliwe emitima yabo yiri hali okw’ingye;
Kandi bakanyubaha busana n’erikwama ebihano by’abandu ebyo babirikangiriribwa.
14 Neryo, n’ingye ngenditasyakolera abandu aba b’emyatsi y’eriswekera,
Omwatsi w’eriswekera oko ghundi mwatsi w’eriswekera;
N’amenge w’abandu babo b’amenge akendisyabulirana,
N’eriminya ly’abandu babo abawite obwenge likendisyabiswa.”
15 Obulighe oko bakaghenda olughendo luli eriyabisa Yehova y’emipango* yabo.
Bakakola emibiiri yabo omo mwirimya,
Ibanemubugha bati: “Oyutulangire nindi?
Kandi nindi yo wasi ebyo tukakola?”
16 Mukahengemaya emyatsi basi!*
Omubumbi anatolere inyalangirwa ng’eribumba kwehi?
Ekindu ekyakokotibawa kinatolere eribugha oko oyo wakokotayakyo kiti:
“Mwatanikokotya”?
N’ekindu ekyabumbawa kikanabugha oko oyo wabumbakyo kiti:
“Syawite amenge”?
17 Hakisiya akatambi kake, e Lebanoni ikendiyirwa mo ririma ly’amatunda,
N’eririma ly’amatunda eryo likendisyalangirwa mo musitu.
18 Ekiro ekyo, abatsiha bakendisyowa ebinywa by’ekitabu ekyo,
N’ameso w’esyondime-time akendisyalangira omo mwirimya n’omo mwirimya munene.
19 Abolo bakendisyatsemea kutsibu busana na Yehova,
N’abera omo kati-kati k’abandu bakendisyatsema busana n’Omubuyirire wa Israeli.
20 Kusangwa sihendisyasyabya omunubya,
Oyukayihalamba akendisyahwaho,
N’abosi abakabya ibanayiteghekire eryaghalya bakendisyaheribwa.
21 Abakabugha ebinywa by’amabehi neryo ibaleka abandi ibabyako olubanza,
Abakategha oyukalwira oko bandi* y’ekitegho omo lukyo lw’omuyi,
N’abakima omutunganene y’obulingirirania omo buhaka bwabo butya-butya.
22 Neryo Yehova oyo wakombola Abrahamu, akabwira enyumba ya Yakobo ati:
“Yakobo syendisyasyahemuka,
N’obusu bwiwe sibwendisyasyahinduka.*
23 Kusangwa omughulu akendisyalangira omo kati-kati kiwe abana biwe,
Omubiiri w’ebyala byaghe,
Bakendisyayira erina lyaghe mo libuyirire;
Inga, bakendisyaha Omubuyirire wa Yakobo y’olukengerwa,
Kandi bakendisyubaha oMungu wa Israeli yo kutsibu.
24 Abaherire omo mutima bakendisyabana obuyiteghererya,
N’abakayilungumula bakendisyaligha erikangiriribwa.”