Isaya
41 “Inywe bitsira, munihulikirire imune bukutu;*
Ebihanda bitasyabana akaghala kabyo.
Biseghere hakuhi; neryo bibughe.
Tuyihindanaye haghuma busana n’eritswera.
2 Nindi yo wabirihangania omundu erilua oko luhande lw’eyo eryuba likahuluka,*
Erimubirikira omo ritunganene ati ase ahali ebisando Biwe,*
Erimuha ebihanda
N’erileka aghondaye abami?
Oyukayirabo mo lututu embere sy’omuyali wiwe,
Ng’esyombuba esikaghuluka embere sy’obuta bwiwe?
3 Akakwamirirabyo, inialaba buholo
Omo nzira eyo ebisando biwe bitebyatalabamo.
4 Nindi oyo wabirikola n’eritoka omwatsi oyu,
Eribirikira ebizazi* eritsuka oko nzuko?
Ingye Yehova, indi w’Erimbere;
N’oko b’enduli nina ngye.”
5 Ebitsira byabirilangirakyo n’eryubaha.
Esyonduli sy’ekihugho musyatsuka erititimana.
Bikayitunda hakuhi n’eryasa embere.
6 Bikawatikanaya
N’eribwirana biti: “Usike.”
7 Neryo omufundi akabwira omuhesi w’ekyuma ati asike;
Oyukakomereraya omo nyondo y’omuhesi,
Akabwira oyukahesera oko rihesero omo nyondo y’omuhesi ati asike
Akabugha oko kyuma ekyamabimatanibwa ati: “Kyuwene.”
Neryo kikamatanibawa omo misumari kikasyatera.
8 “Nikwa iwe Israeli, uli mughombe waghe,
Iwe Yakobo, iwe nabirisombola,
Olubuto* lw’omwira waghe ye Abrahamu,
9 Iwe nalusaya oko nduli-nduli sy’ekihugho,
Kandi iwe nabirikira erilua hali-hali.
Munakubwira niti, ‘Uli mughombe waghe;
Nabirikusombola, sinitakughana.
10 Isughubaha, kusangwa nine haghuma naghu.
Isiwahangahangaya, kusangwa niri Mungu waghu.
Ngendikuha amaka, kwenene ngendikuwatikya,
Oko kwenene ngendikuwatirira omo byala byaghe by’amali by’eritunganene,’
11 Lebaya! Abosi abakuhiteneko bakendisyakuta-kuta n’erihemuka.
Abakalwa naghu, bakendisyabya kindu buyira, n’erihera.
12 Ukendisyasonda-sonda abakalwa naghu, aliwe siwendisyabasunga;
Abandu abakalwa naghu bakendisyabya ng’ekindu ekite kyatabyaho, ekindu buyira.
13 Kusangwa ingye Yehova Mungu waghu, ngakuwatirira oko byala byaghu by’amali,
Oyukakubwira ati, ‘Sighubahe. Ngendikuwatikya.’
14 Yakobo, iwe munyole, sighubahe,
Inywe balume be Israeli, ngendibawatikya,” Yehova Omutongolya waghu, Omubuyirire wa Israeli atya.
15 “Lebaya! Nabirikuyira mo kindu ky’erinyughusula engano,
Ekindu kihya-kihya ekiwite amoya abiri.
Ukendisyalyatangira ebitwa n’erinoyabyo
Kandi ukendisyayira ehitwa ihyabya ng’omusunga.
Ukendisyatsema busana na Yehova,
Kandi ukendisyayihalamba omo Mubiyirire we Isyaeli.
17 “Abera n’ab’obwagha bakasonda-sonda amaghetse, aliwe amaghetse syaliho.
Olulimi lwabo lwabiryuma busana n’enyota.
Ingye Yehova ngendisubiryabo.
Ingye Mungu wa Israeli sinendisighaniabo.
18 Ngendileka esyonyusi isyasenda oko hitwa ehiteko kindu
N’ehinunga omo misya.
Ngendisyayira embwarara mo kitsinga ky’amaghetse n’olubingu
N’ekitaka ekyumire mo ngununuko sy’amaghetse.
19 Ngendisyahera omuti w’omuerezi omo lukwesese,
Omuti w’olughando n’omuti w’omuhadasi n’omuti we paini.*
Omo bwerere bw’olukwesese ngendisyaheramo omuti w’ekilaghu,
Haghuma n’omuti w’omutizari n’omuti w’ekisusuti,
20 Neryo abandu bosi ibalangira n’eriminya
N’eritegha amatwi n’eriminya
Ngoko ebyala bya Yehova byabirikola eki,
N’Omubuyirire wa Israeli abirikokotyakyo.”
21 Yehova ati, “Mulete olubanza lwenyu.”
Omwami wa Yakobo ati, “Mutonde.
22 Mulete obwimiri mutubwire emyatsi eyikendibya.
Kutse mutubwire emyatsi eyikendisyabya.
23 Mutubwire ebikendibya oko biro ebikasa,
Itwaminya ngoko muli miungu.
Inga, mukole omwatsi mulebe, abye mubuya kutse mubi,
Twangakukubala tukalangiragho.
24 Mulebaye! Muli kindu buyira ekiteho,
N’emibiiri yenyu si kindu.
Owosi-wosi oyukayisogha iwe ni w’esyonye.
25 Nabirihangania omundu erilua oko luhande lw’endata, naye akendyasa,
Erilua okw’ihuluka ly’eryuba* akendisyabirikira oko rina lyaghe.
Akendisyalyatangira abatabali* ng’eribumba,
Ngoko omubumbi akanalyatangira ebyondo by’eribumba.
26 Nindi yo wakanaya okw’eki eritsuka oko nzuko, tutoke eriminya,
Kutse oyo wakanaya kukyo erilua emighulu ya kera tutoke eribugha tuti, ‘Asingene?
Oko kwenene sihali oyo watulagho!
Sihali oyo watulaghanayakyo!
Sihali oyo wowa ekyosi-kyosi ekyo mukabugha!”
27 Ingye nabya w’erimbere eribwira Sioni niti: “Lebaya hano ho bali!”
Ne Yerusalema ngenditumirayo omukwenda w’engulu mbuya.
28 Munalola embere eritungerera, aliwe sihabya n’omughuma;
Omo kati-kati kabo sihabya n’omughuma oyukateka erihano.
Kandi munabya ngabwirabo niti basubiraye.
29 Lebaya! Abosi ni matebo.*
Emibiiri yabo ni busa.
Esyosanamu* syabo sy’ekyuma ni rihunga, kandi ni kindu ekiteho.