Ebaruha y’akabiri oko Abanya Tesalonika
3 Oko nduli baghala betu, mutusabire ekinywa kya Yehova* kitoke erihikira abandu bangyi bo luba-luba, kandi abandu batoke erilighakyo n’olukengerwa ngoko nenyu mwalighakyo n’olukengerwa, 2 kandi tutoke erilusibwa omo byala by’abatsibu n’ababi, kundi si b’abandu bosi bo bali n’obwikirirya. 3 Aliwe, Omukama ni mutaleghula. Akendibaha akaghala n’eribateya oko mubi. 4 Kundi tuli bigha b’Omukama, tuyiketere inywe. Tuyiketere ngoko munemukolesya ebyo twabakangiriraya, kandi ngoko simwendisyaleka erikolesyabyo. 5 Omukama abye akasondola emitima yenyu, mutoke eryanza oMungu n’eriyiyinia busana na Kristo.
6 Baghala betu, tukabahana omo rina ry’Omukama wetu Yesu Kristo tuti muyihighule oko mughala wetu wosi-wosi oyutesikaya n’erikwama ebyo twabakangiriraya.* 7 Kundi inyw’ibene-bene munasi nga mwangakwama emibere yetu yo muti, kundi mututayighendya muhanda omo kati-kati kenyu. 8 Mututalya akalyo k’omundu ko bule,* aliwe itukakola kutsibu omo kiro n’omw’itungyi, n’eritwa olunza tukasyabya muheke oko mundu n’omughuma. 9 Tusingene eribasaba oko bindu byenyu. Aliwe, situlikola tutya kusudi tubye ebyerileberyako ebyuwene. 10 Kusangwa omughulu twabya haghuma nenyu, itubeghere eribahana tuti: “Omundu amabya isyanzire erikola omubiiri, siritolere akalya.” 11 Kundi tunemwowa ngoko omw’inywe mune abandu abanemuyighendya kitya-kitya. Sibalikola omubiiri, aliwe bakayingiraya omo bitabalebirye. 12 Abandu abo tukabahana n’eribakunga omo rina ry’Omukama wetu Yesu Kristo tuti babye bakakola omubiiri ibanatulere, n’erirya akalyo ako ibibene-bene balyatumikira.
13 Baghala betu, inywe simuleke erikola ebyuwene. 14 Aliwe, omundu atitasikya ebyo tukababwira omo baruha eno, mumuhandeko omunwe. Kandi muleke erikola obwira haghuma naye, n’ekyo kikendileka iniakwa esisoni. 15 Isimwamulangira ng’enzighu, aliwe mubye mukamukunga, kundi ni mughala wenyu.
16 Omukama w’obuholo, iyuwene-wene abye akabaha obuholo omughulu wosi, n’omo nzira syosi. Omukama abye haghuma nenyu inywe bosi.
17 Ingye Paulo, ingye ngahandika ebinywa bino by’eribaramukya, esyoherufi nene-nene esyo ngakolesaya sikaminyikalaya obuli baruha eyo ngahandika.
18 Olukogho lw’Omukama wetu Yesu Kristo lubye haghuma nenyu, inywe bosi.