Engulu mbuya eyahandikawa na Luka
17 Yesu mwabwira abigha biwe ati: “Emyatsi eyikaleka abandu ibatwikala siyendisyabula eribyaho. Aliwe obulighe oko yukendisyaleka emyatsi eyi iyabya! 2 Ikikendibya kibuya omo bikya by’omundu oyu mwamabiboherwa oluso, neryo iniaghuswa omo ngetse, omo mwanya w’eritwikalya omughuma w’oko balere aba. 3 Muyiteghaye! Omulikyenyu amabikola ekibi iwamukunga. Kandi amabibindula omutima, iwamughanyira. 4 Nomo angakukosera ngendo irinda (7) oko kiro, kandi ngendo irinda (7) iniasa n’eribugha ati, ‘Unganyire kisi,’ litolere iwamughanyira.”
5 Neryo abakwenda mubabwira omukama bati: “Ukanyaye obwikirirya bwetu.” 6 Omukama mwasubirya ati: “Mwamabya n’obwikirya bungana n’akaghuma k’embuto y’eharadali, imukendibwira omuti w’omukuyu oyu muti, ‘Ukulike hano uyayihere omo ngetse!’ nagho iniakendibowa.
7 “Omughuma w’okw’inywe amabya awite omughombe wiwe oyukalima kutse oyukalisaya esyombuli: Omughombe oyo abikuluka, nindi okw’inywe yo wangamubwira ati, ‘Ulue wase, ulye’? 8 Omo mwanya w’ekyo iniakendimubwira ati, ‘Wambale ekanzu, uniteghekaniraye akalyo. Unikolere erihika aho ngendibughira erirya n’erinywa; enyuma syaho naghu ukendirya n’erinywa.’ Ko bite bitya? 9 Isyendisima omughombe oyo; kundi mwakakola ebyo alue atolere erikola. Ko bite bitya? 10 Nenyu kutya, omughulu mwamakola emyatsi yosi eyo musabirwe erikola, mubughe muti: ‘Tuli baghombe buyira. Ebyo twamakola, byo tunalue tutolere erikola.’”
11 Omughulu Yesu abya akaya e Yerusalema, mwalaba omo kati-kati ke Samaria ne Galilaya. 12 Omughulu ingira omo mulongo mughuma, abahagha ikumi mubahindana naye. Aliwe abahagha abo mubimana hali. 13 Mubabirikira bati: “Yesu, Mukangirirya, utuwatikaye!”* 14 Neryo abere abibalangira mwabwirabo ati: “Mughende muyayikangaye oko bahereri.” Neryo babere bane omo nzira mubalama.* 15 Omughuma wa kubo mwabya abilangira ngoko amabilama, mwasuba enyuma, inianemupipa oMungu omo mulenge muli. 16 Neryo mwunama embere sya Yesu, amamusima. Omuhagha oyo abya Musamaria. 17 Yesu mwasubirya ati: “Abahagha ikumi bosi mubakalamibawa, ko bite bitya? Neryo abandi mwenda (9) bali hayi? 18 Sihali n’oghundi oyo wamasubula akasyapipa oMungu ate iyo n’omulume oyu ow’omo kindi kihanda?” 19 Neryo mwabwira omulume oyo ati: “Hangana ughende, obwikirirya bwaghu bwabirikulamya.”
20 Omughulu Abafarisayo babulaya Yesu Obwami bw’oMungu nga bukendisyasa mughulu wahi, mwasubiryabo ati: “Obwami bw’oMungu sibwendisyasa omo nzira eyilangirikire; 21 kutse abandu sibendisyabugha bati, ‘Buli hano!’ kutse, ‘Buli halya!’ Kusangwa Obwami bw’oMungu bune omo kati-kati kenyu.”
22 Neryo Yesu mwabwira abigha biwe ati: “Hane omughulu mukendisyanza erilola oko kighuma ky’oko biro by’Omughala w’omundu, aliwe simwendisyalola kukyo. 23 Kandi abandu bakendisyababwira bati, ‘Ane halya!’ kutse, ‘Ane hano!’ Isimwayayo kutse isimwabakwama. 24 Kusangwa ngoko akarabyo* kakanapalaya eritsuka oko luhande lughuma lw’ekyanya erihika oko lundi luhande, Omughala w’omundu kw’anemwendisyabya atya oko kiro kiwe. 25 Aliwe, litolere iniatsuka eryaghalwa kutsibu n’erighanwa n’abandu b’omo kizazi* kino. 26 Kandi ngoko byanabya oko mughulu wa Noa, ko binemwendisyabya bitya omo biro by’Omughala w’omundu: 27 abandu babya bakalya, babya bakanywa, abalume babya bakatahya, n’abakali babya bakatahibwa erihika ekiro Noa ingira omo bwato; n’eribwagha ly’amaghetse muryasa, n’eriherya abosi. 28 Kutya ngoko byanabya omo biro bya Loti: abandu babya bakalya, babya bakanywa, babya bakaghula, babya bakaghulya, babya bakahera, babya bakahimba. 29 Nikwa omughulu Loti alua e Sodomo, elubula muyalua omuliro n’amabwe awakaka, n’eriherya abosi. 30 Ko binemwendisyabya bitya omughulu Omughala w’omundu akendisyabisulwa.
31 “Oko kiro ekyo, omundu oyuli oko nyumba kw’endata nikwa ebindu biwe ibine omo nyumba, isyakima ati akasyendabyo. N’oyuli omw’irima, isyasuba enyuma ati akasubira ebindu ebiri eka. 32 Mwibuke omukali wa Loti. 33 Oyukasonda eriteya engebe yiwe akendisyaheryayo, nikwa oyukaheraya engebe* yiwe akendisyabya iniamateyayo. 34 Ngababwira, omughulu oyo omo kiro, abandu babiri bakendisyabya ibanaghotsere oko ngyingo nguma. Bakendisyaghenda n’omughuma, nikwa oghundi iniasighala. 35 Abakali babiri bakendisyabya ibanemuswa oko luso lughuma, bakendisyaghenda n’omughuma, nikwa oghundi iniasighala. 36* —— 37 Neryo mubamubulya bati: “Hayi, Mukama?” Mwabwirabo ati: “Ahali ekinda, ho amasamba akendisyayikuma-kumira haghuma.”