Habakuki
3 Ono ni musabe w’omuminyereri Habakuki, ogho akola ng’akimba esyonyimbo sy’ekiriro.
2 Yehova, munowa engulu yaghu.
Yehova, ebyo ukakola bikaleka inasagha.
Utasyakolabyo omo myaka!*
Uminyikalayebyo omo myaka!*
Omughulu hamabya obutsumbu-tsumbu, sighubye ukibirirwa eritughanyira.
3 OMungu mwasira e Temani,
Omubuyirire mwalua oko Kitwa kye Parani. (Sela)*
Olukengerwa lwiwe mulwaswika olubula;
N’ekihugho kyosi mukyamupipa.
4 Abya iniakangabasenie ng’ekyakakala.
Emisalali ibiri yabya ikalua omo byala biwe,
Ahabya ihabisire akaghala kiwe.
5 Ekihunzo kyabya kikaghenda embere siwe,
N’erihuhana rinene ry’omubiri ryabya rikamukwama.
6 Mwimana, amatitimania ekihugho.
Mwasamalira ebihanda, byamatsuka erititimana.
Ebitwa bya kera na kera mubyapondwa-pondwa,
N’ehitwa hya kera muhyunama.
Esyonzira sya kera ni siwe.
7 Munalangira amaligho omo mahema wa Kushani.
Amahema w’omo kihugho kya Midiani mwatitimana.
8 Yehova, esyonyusi,
Esyonyusi syo wabirihitanako kutsibu?
Kutse engetse yo wabirihitanako kutsibu?
9 Obuta bwaghu sibuswikire kandi bune tayari.
Esyofimbo* syabirihabwa omubiiri omw’ilapa.* (Sela)
Muwatula ekitaka omo syonyusi.
10 Ebitwa mubyayiminyongolya busana n’obulumi byabikulangira.
Embula nene muyawa.
Omutobero w’amaghetse mwaruruma.
Mwasumbira ebyala byagho by’endata.
11 Eryuba n’omughenda mubyimana omo bwikalo bwabyo bw’endata.
Emisali yaghu muyasirayo ng’ekyakakala.
Eritumo ryaghu muryakangabasania ng’obupalyo.
12 Muwalaba omo kihugho ighunahitene kutsibu,
Muwalyatangira* ebihanda ighunahitene.
13 Muwayasabula abandu baghu, muwayasabula omundu waghu oyuhirirweko amaghuta.
Muwaponda-ponda omusondoli* w’enyumba y’ababi.
Muyatsandibwa eritsuka endata* erihika oko fondasyo. (Sela)
14 Muwatobola omutwe w’abasuda biwe omo bindu biwe-biwe by’amalwa,*
Omughulu basa bakahumayira bakasyanipanza-panza.
Babya ibanemuyisyandira bakatomera omo bubiso-biso m’oyukaghalawa.
15 Muwalaba omo ngetse n’esyosabayiri* syaghu,
Muwalaba omo maghetse mangyi awaghungire.
16 Munowa, neryo namatsuka erititimana emwisi syaghe;*
Omulenge oyo mwaleka eminywa yaghe iyatitimana.
Ekihondo mukingira omo makuha waghe;
Amaghulu waghe mwatsuka erititimana.
Aliwe ninemulindirira ekiro ky’obuhanya ininatulere.
Kundi kikendihikira abakalwa netu.
17 Nomo omuti w’esyotini angaghana eryasako omusanga,
Nomo emiti y’emizabibu yangaghana eryasako amatunda;
Nomo emizeituni yangaghana eryera,
Nomo amalima angaghana eryerya akalyo;
Nomo esyonyama syangahwa omo luba,
Nomo esyonde syangahwa omo bibanda;
18 Aliwe ingye, ngendiyisyandira busana na Yehova;
Ngendisyatsema kutsibu busana n’oMungu oyukanisabula.
19 Yehova Omukama Mukulu oko Bosi yo kaghala kaghe;
Akendisyanguhya ebisandu byaghe ng’eby’engabi
Akendisyanilabya omo myanya y’endata.
Oko musondoli; luwatawe omo byombo byaghe by’omuziki by’esyosinga.