Hosea
6 “Mwase, tusubire Yehova,
Kundi abitutulangamo bihande-bihande, aliwe akenditulamya.
Abirituhunza, aliwe akendiboha ebironda byetu.
2 Hakendibya habilaba ebiro bibiri, iniatusubyamo akaghala.
Ekiro akendituhangania,
Netu tukendibyaho embere siwe.
3 Tukendiminya Yehova, tukendisondya kutsibu erimuminya.
Eryasa riwe ni mwatsi w’ekwenene ngoko obutuku sibulibula erikya;
Akendisyasa eyo tuli ng’embula nene,
Ng’embula y’omwiso-mwiso eyikatsapaya ekitaka.”
4 “Nikuyire niti, Efraimu?
Nikuyire niti, Yuda?
Kundi olwanzo lwaghu oluteleghula luli ng’ebitu by’omo tututu,
Uli ng’ekimi ekikalw’ikyahwa.
5 Busana n’ekyo, ngendibakonda omo baminyereri;
Ngendibita omo binywa ebikalua omo buno bwaghe.
N’ebinywa by’eritswera ebyo ngendibabughako bikendikangabasania ng’ekyakakala.
6 Kundi olwanzo oluteleghula lo lukanitsemesaya, butsira amahere,
Kandi ngatsema omughulu mukasonda eriniminya, kulenga kw’eriniherera amahere w’eryokererya.
7 Aliwe ibo, ng’abandu bule, sibetasikya endaghane.
Omw’ikola ekyo, babirinileghulako.
8 Gileadi ni muyi w’ababi,
Aswiremo olughobe lw’omusasi.
9 Abahereri bali ng’ekikuto ky’ababandi abakalimbaya omundu.
Bakitira abandu omo nzira eyiri hakuhi ne Shekemu,
Kundi ebyo bakakola bikita esisoni.
10 Mungalangira omwatsi owakita obuba omo Baisraeli.
Efraimu anemukolera obumbalaka bw’erya;
Israeli abiriyitsandya.
11 Kandi, iwe Yuda, endambi y’erikughesa yabirihirwaho,
Omughulu ngendisubulya abanyewa b’omo bandu baghe.”