Zekaria
7 Omo mwaka w’akani w’obutabali bw’omwami Dario, Yehova mwakania na Zekaria. Mwakania naye omo kiro ky’akani ky’omwisi we 9, ni bugha ambu, omwisi we Kislevu.* 2 Abandu be Beteli mubatuma Sharezeri na Regemu-meleki haghuma n’abalume biwe bati bayalembe-lembe Yehova atoke eribakangania olukogho.* 3 Mubababwira bati babwire abahereri abakakolera omo nyumba ya Yehova w’emilondo n’abaminyereri bati: “Mwanzire inalira n’eritendirya akalyo oko mwisi w’akatano, ngoko nabirikola omo miaka mingyi?”
4 Kandi Yehova w’emilondo mwakania naghe, amanibwira ati: 5 “Ubwire abandu bosi b’omo kihugho n’abahereri uti, ‘Omughulu mwakola amafungo n’erilira omo mwisi w’akatano n’omwisi we 7, omo myaka 70, oko kwenene-kwenene, n’ingye mwanabya mukakolera amafungo? 6 N’omughulu mwabya mukalya n’erinywa, sindi mbino mwabya mukalya n’erinywa busana n’endundi yenyu. 7 Simwangakwama ebinywa ebyo Yehova abugha ati abaminyereri ba kera babughe, omughulu Yerusalema n’emiyi eyitimbire kuyo yabya yikeremo abandu kandi iyine omo buholo, n’omughulu e Negebu ne Shefela yabya yikeremo abandu?’”
8 Kandi Yehova mwakania na Zekaria, amamubwira ati: 9 “Yehova w’emilondo ati, ‘Mubye mukatswera omo ritunganene ry’ekwenene, kandi mubye mukakolerana omo lwanzo oluteleghula n’erighanyirana. 10 Isimwiba omukwa-kali kutse omwana oyutawite baba,* omugheni, n’omwera; kandi isimwabya mukasoherana erikolerana obubi omo mitima yenyu.’ 11 Aliwe mubaghana erihulikirira, mubabera eribya bakamubindukirya emighongo yabo, kandi mubahoma amatwi wabo bakasyamwowa. 12 Mubayira emitima yabo ng’ediama,* kandi mubaghana erikwama emighambo* n’ebinywa ebyo Yehova w’emilondo ababwira erilabira ekirimu kiwe n’erilabira abaminyereri ba kera. Neryo Yehova w’emilondo mwahitana kutsibu.”
13 “‘Ngoko mubatahulikirira omughulu nababirikira,* naghe kutya munatabahulikirira omughulu banibirikira,’ Yehova w’emilondo atya. 14 ‘Neryo munapanza-panzirabo omo bihugho byosi ebyo batabya basi omo kihunga kinene. Ekihugho mukyasighala matongo babighenda. Sihabya omundu oyukalaba mukyo kutse oyukasuba mukyo; kundi mubayira ekihugho ekyuwenenga mo kindu ekikita obuba.’”