Malaki
2 “Neryo lino, inywe bahereri, ngabaha ekyalayiro kino: 2 Mwamabighana erihulikirira kandi mwamatendiyisogha omo mutima wenyu eriha erina ryaghe ry’olukengerwa,” Yehova w’emilondo atya, “ingendibatakira, kandi ingendibindula emiyisa yenyu mw’itakira. Inga, nabiribindula emiyisa mw’itakira, kundi simwetayisogha omo mutima erikwama ekyalayiro ekyo.”
3 “Mulebaye! Busana nenyu, ngenditsandya* embuto eyo mwahera, kandi ngendighusa omo busu bwenyu mw’ebise, ebise by’ebiro byenyu bikulu; kandi mukendisyatwalwa eyiri ebise ebyo.* 4 Neryo mukendisyaminya ngoko munabaha ekyalayiro eki kusudi endaghane eyo nakola na Lawi isiyahwa,” Yehova w’emilondo atya.
5 “Endaghane eyo nakola haghuma naye yabya ndaghane y’engebe n’ey’obuholo, n’ebyo byo namuha, n’ekyo mukyaleka iniabyamo buba.* Mwanisagha, inga, mwasikya erina ryaghe ryo kutsibu. 6 Omughambo* w’ekwenene abya omo buno bwiwe, n’oko minywa yiwe sikwabya eritatunganene. Mwalendera naghe omo buholo n’omo ritunganene, kandi mwalusya abandu bangyi b’omo kosa. 7 Litolere eminywa y’omuhereri iyakangirirya abandu b’emyatsi y’oMungu, n’obuno bwiwe bo bandu batolere ibabulya bakasonda eriminya emighambo* nga yikabugha yitiki, kundi ni mutumwa wa Yehova w’emilondo.
8 “Aliwe inywe mwabirilua omo nzira eyo. Mwabirileka abandu bangyi ibatakwama emighambo.* Mwabiritsandya endaghane ya Lawi,” Yehova w’emilondo atya. 9 “Busana n’ekyo, ngendisyaleka imwapokibwa n’erileka abandu bosi ibabalangira mo bandu bule, kundi mumwatakwama esyonzira syaghe, aliwe mumwabya mukasolola abandu omughulu mwabya mukakolesya emighambo.”
10 “Itwe bosi situwite baba mughuma? OMungu mughuma yo watatuhangyika? Neryo busanaki tukatebana n’erikolerana muhanda, neryo itwatsandya endaghane y’abotata-kulu wetu? 11 Yuda abirileghula, n’omwatsi owakita esyonye abirikolwa omo Israeli n’omo Yerusalema; kundi Yuda abiritsandya obubuyirire* bwa Yehova, obo Mungu anzire, kandi abiriyira mwali w’omungu w’ehandi mo mukali wiwe. 12 Obuli mundu oyukakola ekyo, nomo angabya ndi,* Yehova akendisyamulusya omo syohema sya Yakobo, nomo angaletera Yehova w’emilondo y’ekihembo.”
13 “Hane oghundi mwatsi* ogho mukakola, owakaleka ekiherero kya Yehova ikyusulako emisonia, ekiriro, n’erisimba, neryo ekyo ikyaleka iniatatsomana ekihembo kyenyu kutse iniatatsemera ekyosi-kyosi ekyo mukamuletera. 14 Ibwa mukabulaya muti, ‘Busanaki?’ Ni busana Yehova abirikangania ebyo ulyakola, kundi wabirileghula oko mukali w’omo bulwana bwaghu, nomo y’omunwani waghu kandi y’omukali oyo walaghana naye.* 15 Aliwe hane oyo watakola atya, kundi abya n’ekiryasighalira oko kirimu. Abya akasondya ki? Abya akasondya olubuto* lw’oMungu. Neryo muteghaye obwenge bwenyu, kandi isimwaleghula oko mukali w’omo bulwana bwenyu. 16 Kundi niponire* eritwa endwa,” Yehova oMungu we Israeli atya, “kandi niponire oyukaswika oko lukimba lwiwe k’obutsururu,”* Yehova w’emilondo atya. “Muteghaye obwenge bwenyu, kandi isimwatebana n’erikolerana muhanda.
17 “Mwabiriluhya Yehova y’omo binywa byenyu. Aliwe mukabugha muti: ‘Tulyamuluhaya tuti?’ Mukamuluhaya omw’ibugha muti: ‘Obuli mundu oyukakola ekibi, Yehova akamulangira mo mundu oyuwene kandi akamutsemera;’ kandi mukamuluhaya omw’ibugha muti: ‘OMungu w’eritunganene ali hayi?’”