Zekaria
4 Omumalaika oyo wakanaya naghe kandi mwasa. Mwanibukya ngoko omundu akabukaya oyughotsere. 2 Enyuma sy’aho, mwanibulya ati: “Wamalangiraki?”
Neryo munamusubirya niti: “Namalangira ekindu ky’erihirako esyotala ekikokotibwe omo horo nyisa-nyisa, n’ekibakuli* ikine oko mutwe-mutwe wakyo. Kiriko esyotala 7, inga esyotala 7. N’esyotala esiri oko mutwe-mutwe wakyo siriko ehitiyo 7. 3 N’ahakuhi n’ekindu ekyo ky’erihirako esyotala, hali emiti ibiri y’emizeituni, omuti mughuma ali oko luhande lw’amali lw’ekibakuli,* n’oghundi oko luhande lw’amalembe.”
4 Neryo munabulya omumalaika oyo wabya akakania naghe niti: “Mukama waghe, emyatsi eyi yikamaanisayaki?” 5 Omumalaika oyo wabya akakania naghe mwanibulya ati: “Siwasi emyatsi eyi nga yikamaanisayaki?”
Neryo munasubirya niti: “Mukama waghe, sinasi.”
6 Neryo mwanibwira ati: “Bino byo Yehova akabwira Zerubabeli: ‘“Si b’abasuda kutse akaghala k’abandu ko kandisyaleka emyatsi eyo iyatokekana, aliwe ekirimu kyaghe kyo kikendisyaleka emyatsi eyo iyatokekana,” Yehova w’emilondo atya. 7 Ulindi, iwe kitwa kinene? Ukendisyabya kihugho ekitemo bitwa* embere sya Zerubabeli. Kandi akendisyaleta eribwe erikaya endata abandu ibanemubugha omo mulenge muli bati: “Ryuwenenga! Ryuwenenga!”’”
8 Kandi Yehova mwakania naghe, amanibwira ati: 9 “Ebyala bya Zerubabeli byabirihimba efondasyo y’enyumba eyi, kandi byo binemwendisyabugha erihimba enyumba eyi. Neryo oko kwenene-kwenene, mukendisyaminya ngoko Yehova w’emilondo yo wanituma okw’inywe. 10 Kundi hane oyukapokaya emyatsi eyikatsuka bolo-bolo?* Ekiro kinemwasa, omughulu bakendisyalangira ekamba y’eripima ekindu nga kinalungukere iyine omo byala bya Zerubabeli n’eritsema kutsibu. Ebindu 7 ebyo w’ameso wa Yehova awakabya inianemulaba-laba omo kihugho kyosi.”
11 Neryo munamubulya niti: “Omuti w’omuzeituni owali oko luhande lw’amali n’owali oko luhande lw’amalembe lw’ekindu ky’erihirako esyotala yikamaanisayaki?” 12 Munamubulya n’engendo y’akabiri niti: “Ebisanza* by’emiti ibiri y’emizeituni ebikuta amaghuta awali ng’ehoro erilabira ehitiyo hibiri hy’ehoro bikamaanisayaki?”
13 Neryo mwanibulya ati: “Siwasi ebindu ebi nga bikamaanisayaki?”
Munamusubirya niti: “Mukama waghe, sinasi.”
14 Mwabugha ati: “Ebindu ebyo bikasosekanaya abandu babiri abahirirweko amaghuta abimene hakuhi n’omukama w’ekihugho kyosi.”