Danieli

8 Omo mwaka w’akasatu w’obutabali b’omwami Belshaza, ingye Danieli, munalangira eyindi nzoli, si y’enzoli eyo nalangira aho mbere. 2 Ininemulangira enzoli eyo, munayilangira inine omo bwikalo bw’omwami bwe Shushani, omo ngabiro* ye Elamu. Ininemulangira enzoli eyo, munayilangira inine hakuhi n’olusi lwe Ulai. 3 Munabya nabisumba ameso waghe, munalangira embangale iyinimene embere sy’olusi olo, yabya n’amahembe abiri. Amahembe abiri ayo abya mali-mali, aliwe erighuma ryabya riri kulenga erindi, erihembe eryabya riri oko rindi ryo ryalasa linyuma. 4 Munalangira embangale eyo ikaghusa amahembe wayo* oko luhande lw’eyo ryuba rikalengera, oko luhande lw’endata, n’oko luhande lw’eyikwa; sihabya enyama y’emoli eyangayihanda oko mbangale eyo, kandi sihabya n’omundu oyo wangalusya kuyo kw’ekindu ekyo yabirihamba. Yabya ikakola ekyo yanzire kandi iyikayiheka.

5 Inikinasamalira, munalangira embaya ikasira oko luhande lw’eyo ryuba rikalengera n’erilaba omo kihugho kyosi isiyetatulya ahisi. Embaya eyo yabya n’erihembe erilangirikire ndeke-ndeke omo kati-kati k’ameso wayo. 6 Yabya yikalolera eyiri embangale eyabya n’amahembe awabiri eyo nalangira iyinimene embere sy’olusi; embaya eyo yabya ikatibita eyiri embangale iyabiritsuruma kutsibu.

7 Munalangirayo ikahika hakuhi n’embangale eyo, iyabiritsurumira kuyo ko kutsibu. Muyalwa n’embangale eyo, yamatwa amahembe abiri w’embangale eyo, n’embangale eyo muyitatoka eriyihanda oko mbaya eyo. Embaya eyo muyikya embangale eyo y’ahisi n’erilyatangirayo, habya isihali oyo wangasabula embangale eyo oko mbaya eyo.

8 Neryo embaya eyo muyayihalamba kutsibu, aliwe muyabya yabinabya n’akaghala, erihembe ryayo rinene muryatwika, neryo ahabya erihembe eryo muhalasa amahembe ani awakalangirika ndeke-ndeke, n’amahembe ayo abya inialolirye eyiri amahunga ani w’elubula.

9 Erindi rihembe muryalasa oko righuma ry’oko mahembe ayo, ryabya rike, kandi muryakula kutsibu, ryamalolera oko luhande lw’eyikwa, oko luhande lw’eyo ryuba rikasira, n’eyiri Obubuya.* 10 Erihembe eryo muryabya rinene, ryamahika oko bindu ebiri elubula,* kandi muryatogherya oko kihugho kw’ebindu bilebe by’oko bindu ebiri elubula, ryamatogheryako n’esyongununu nyilebe, n’erilyatangirabyo. 11 Nibya muryayihalamba embere sy’Omukulu w’ebindu ebiri elubula,* n’obuhere obwabya bukahererwa mughulu wosi mubwalusibwaho, n’ahabuyirire ahabya ihabirihanda emilihi muhasambulwa. 12 Busana n’ekosa, ebindu ebiri elubula n’obuhere obukahererawa mughulu wosi mubyahabwa erihembe eryo; n’erihembe eryo muryabya rikaghusa ekwenene y’oko kihugho, kandi muryatoka ebyosi ebyo ryabya rikakola.

13 Munowa omubuyirire mughuma akabugha, n’oghundi mubuyirire mwamubulya ati: “Enzoli eyi eyilebirye obuhere obukahererawa mughulu wosi kandi eyilebire ekosa eyikaleka emyatsi iyatsanda, n’erilyatangira ahabuyirire n’ebindu ebiri elubula, ikendisyabugha mughulu mungahi?” 14 Neryo mwanisubirya ati: “Ikendisyabugha amagholo-gholo n’esyotutu 2 300; enyuma sy’aho, ahabuyirire hakendisyakokotibwa n’erisubibwa ngoko hatolere ihabya.”

15 Omughulu ingye Danieli nabya inikinalangira enzoli eyo n’erisonda eriminya amaana wayo, aho n’aho munalangira embere syaghe ihanimene omumalaika* oyo wabya iniasosire omundu. 16 Neryo munowa omulenge w’omundu akasira omo kati-kati k’olusi lwe Ulai. Mwabugha omo mulenge muli ati: “Gabrieli, uwatikaye omundu oyo eriminya amaana w’ebyo alyalangira.” 17 Neryo mwaseghera hakuhi n’aho nabya nimene, aliwe omughulu ahikaho, munatitimana kutsibu neryo namakukama n’erihira obusu bwaghe bw’oko kitaka. Mwanibwira ati: “Mughala w’omundu, umininye ngoko enzoli eyo yilebirye omughulu w’enduli.” 18 Aliwe omughulu abya akakania naghe, ehighotseri hinene muhyanihamba obusu bwaghe ibune oko kitaka. Neryo mwanitulako, amanihanganirya aho nilue nimene. 19 Neryo mwanibwira ati: “Ngakuminyisaya ebikendisyabya omo mughulu w’enduli w’erihitana ry’oMungu, kundi bikendisyahika oko mughulu w’enduli owabirihirwaho.

20 “Embangale y’amahembe abiri eyo ulyalangira ikasosekanaya abami be Media ne Persia. 21 Embaya eyiriko obweya bunene ikasosekanaya omwami w’Ebugiriki; n’erihembe rinene erilue omo kati-kati k’ameso wayo rikasosekanaya omwami w’erimbere. 22 N’erihembe eriryatwika, neryo amahembe ani amalasa aho rilue, ni bugha ambu hakendisyabya amami ani awakendisyalua omo kihugho kiwe, aliwe amami ayo syendisyabya n’akaghala kiwe.

23 “N’oko nduli y’obutabali bw’abami abo, amakosa akendisyabya abihika oko lulengo lw’omwiso, hakendisyahuluka omwami oyusosire obutsibu kandi oyukowa ebinywa ebitowikire ndeke.* 24 Akendisyabya n’obutoki bunene, aliwe butsira omo kaghala kiwe. Akendisyatsandya kutsibu, kandi akendisyatoka ebyo akakola. Akendisyatoghotya abawite obutoki n’ababuyirire. 25 Kundi ni w’amayele, akendisyakolesya amabehi eritoka ebyo akakola; akendisyayiheka omo mutima wiwe, kandi akendisyatoghotya abandu bangyi omo mughulu w’obuholo.* Nibya akendisyalwa n’Omukulu w’abakulu; akendisyabunangwa, aliwe syendisyabunangwa omo byala by’abandu.

26 “Ebiryabughawa omo nzoli ebilebirye amagholo-gholo n’esyotutu ni by’ekwenene, aliwe isiwabisula ebyo ulyangira omo nzoli eyo, kundi bilebirye omughulu owakine hali.”

27 Nikwa ingye Danieli, munaluha kandi munalwala omo biro bilebe. Enyuma sy’aho, munahangana neryo namakola omubiiri w’omwami; munahangya-hangya busana n’ebyo nalangira, aliwe habya isihali oyo wangaminya amaana w’enzoli eyo.