Ezekieli
21 Kandi ekinywa kya Yehova mukyanihikako kiti: 2 “Mughala w’omundu, ubinduke, uloleraye obusu bwaghu bwe Yerusalema, neryo utulaghanaye eritswera erikendihika oko myanya eyibuyirire, kandi omo obuminyereri ubughe ebikendihika oko kihugho kye Israeli. 3 Ubwire ekihugho kye Israeli uti, ‘Yehova ati: “Hano ngalwa naghu, kandi ngalusaya omuyali omo lubo lwagho n’erilusya ewaghu abatunganene n’ababi. 4 Kundi ngendilusya ewaghu abatunganene n’ababi, omuyali waghe akendilusibwa omo lubo lwagho busana n’abandu* bosi, erilua oko luhande lw’eyikwa erihika oko luhande lw’endata. 5 Abandu bosi bakendisyaminya ngoko ingye Yehova, nabirilusya omuyali waghe omo lubo lwagho. Syendisyasubamo.”’
6 “Naghu mughala w’omundu, usimbe ighunemutitimana,* inga usimbe kutsibu embere syabo. 7 Nabo bamabikubulya bati, ‘Ukasimba busanaki?’ iwasubiryabo uti, ‘Ngasimba busana n’engulu.’ Kusangwa oko kwenene ikendisyabererera n’emitima yosi ikendisyalua omo nda busana n’obuba, n’obuli byala bikendisyanoghokala, n’obuli kirimu kikendisyalembera n’obuli lirwi likendisyasononokamo amaghetse.* ‘Mulebaye! Ekyo kikendisyabya—kikendisyabererera,’ Yehova, Omukama Mukulu oko Bosi atya.”
8 Kandi ekinywa kya Yehova mukyanihikako kiti: 9 “Mughala w’omundu, ubughe obuminyereri n’eribugha uti, ‘Yehova, Omukama Mukulu oko Bosi ati: “Ubughe uti, Omuyali! Omuyali aghusungwire, kandi atwire. 10 Atwire atoke eriita abandu bangyi; aghusungwire atoke erikangabasania ng’akarabyo.’”’”
“Ekyangaleka itutatsema niki?”
“Anemwendighana* omutso w’obwami* w’omughala waghe-waghe, ngoko akaghana obuli muti?”
11 “‘Akaletawa busana n’erighusungulwa n’erihungibwa omo byala. Omuyali oyo atwire kandi aghusungwire, busana n’erihirwa omo byala by’oyukita.
12 “‘Mughala w’omundu, ulake n’erilira, kusangwa omuyali abiryasa erilwa n’abandu baghe; akalwa n’abakulu bosi be Israeli. Aba bakendisyahola omo muyali haghuma n’abandu baghe. Neryo uyihumange oko ndungu busana n’obulighe. 13 Kusangwa eritsopolibwa lyabiribya, neryo bikendibya biti omuyali amabighana omutso w’obwami? Inyakendihwaho,* Yehova Omukama Mukulu oko Bosi atya.
14 “Naghu mughala w’omundu, ubughe obuminyereri n’eribanda oko byala. Kandi ubughe kasatu uti, ‘Omuyali!’ Ni muyali w’abakitawa, omuyali w’erikera linene, owatimbire kubo. 15 Emitima yabo ikendisyalua omo nda busana n’obuba n’abandu bangyi bakendisyawa oko syongyo sy’omuyi wabo; ngendisyakerabo omo muyali. Inga akangabasenie ng’akarabyo kandi aghusungwire busana n’eriita! 16 Utwe kutsibu oko luhande lw’amali! Ubindukire oko luhande lw’amalembe! Uye ehosi-hosi eyo oboya bwaghu bulolere. 17 Ngendisyakangatira ebyala n’eritulerya erihitana lyaghe. Ingyuwene-wene, ingye Yehova nabiribugha.”
18 Kandi ekinywa kya Yehova mukyanihikako, kiti: 19 “Naghu mughala w’omundu, utsore esyonzira ibiri esyo omuyali w’omwami we Babiloni akendyasiramo. Esyosi sikendiluira omo kihugho kighuma, n’enduyi y’ekiminyikalo ikendihirwa ahali amahwa aho esyonzira esyo sikalolera oko miyi ibiri. 20 Utsore enzira nguma busana n’omuyali owakasyalwa ne Raba y’Abaamoni, n’eyindi nzira busana n’omuyali owakasyalwa ne Yerusalema, omuyi we Yuda owakongotere. 21 Kusangwa omwami we Babiloni imene, akalaghulira omo mahwa w’esyozira ibiri, aho sikatahulira. Akasuka-sukanaya emisoha.* Akabulaya esyosanamu* siwe; akatsopolaya obukindi.* 22 Omughereko owali omo byala biwe alolere e Yerusalema, erihiraho emipundo,* erilayira ati abandu bakerawe, eribuya olukanda lw’amalwa, erisambula esyongyo omo mipundo, erihimba oluba busana n’eribambira, erihimba oluhimbo batoke eribambiragho. 23 Nikwa omo meso w’ababirilahirya* embere syabo, erilaghula eryo likendisyalangirika ng’ery’amabehi. Aliwe akibuka olubanza* lwabo naye akendisyahambabo.
24 “Busana n’ekyo, Yehova Omukama Mukulu oko Bosi, ati: ‘Mwabirileka olubanza lwenyu ilwibukwa mukabisula ebibi byenyu, n’erileka amalolo wenyu inyalangirwa omo byosi ebyo mukakola. Neryo lino kundi mwabiryibukwa, mukendihekwa kinyanganga.’*
25 “Aliwe ekiro kyaghu kyabirihika, iwe wabirihutalibwa kutsibu, iwe musondoli mubi we Israeli, endambi y’erisuyirwa lyaghu ery’enduli. 26 Yehova Omukama Mukulu oko Bosi ati: ‘Ulusaye esapu y’ekilemba, n’erilusya embita. Emyatsi siyendisyasighala ngoko yine. Uhamaye oyuli ahisi, n’erikimya oyuli endata. 27 Ngendisyayiragho mo bisambulkalirya, ngendisyayiragho mo bisambukalirya, ngendisyayiragho mo bisambukalirya. Syendisyahabwa omundu wosi-wosi erihika aho oyusingene kugho akendisyasira, naghe ngendisyamuhagho.’
28 “Naghu mughala w’omundu, ubughe obuminyereri uti, ‘Bino byo Yehova Omukama Mukulu oko Bosi akabugha oko Baamoni n’oko bitsumi byabo.’ Ubughe uti, ‘Omuyali! Omuyali abirilusibwa omo lubo busana n’erikera; aghusungwire busana n’eriita n’erikangabasania ng’akarabyo. 29 Nomo bakanalangira esyonzoli sy’amabehi n’erilaghula eby’amabehi busana naghu, ukendisyahirwa oko kilundo ky’ebinda,* abandu babi abo ekiro kyabo kyabirihika, endambi y’erisuyirwa lyabo ery’enduli. 30 Usubayegho omo lubo lwagho. Ngendisyakutswerera aho wahangyikirawa, omo kihugho ekyo waluamo. 31 Ngendisyakutulirako erihitana lyaghe. Ngendisyakubuhirako omuliro w’erikarama lyaghe, n’erikuhira omo byala by’abandu abakalire, abasi eritoghotya. 32 Ukendisyabya ngwi sy’eryakyako omuliro; omusasi waghu akendisyasenda omo kihuhgho, naghu siwendisyasyibukwa, kusangwa ingyuwene-wene, ingye, Yehova nabiribughakyo.’”