Danieli

5 Omwami Belshaza mwakolera abandu 1 000 b’omo syoseghu-seghu siwe b’efete nene. Abya akanywa edivai embere syabo. 2 Edivai eyo Belshaza abya akanywa muyabya yabihika omo mutwe, mwabugha ati bamuletere ebindu by’ehoro n’eby’efeza,* ebyo baba wiwe Nebukadneza imaya omo hekalu mwe Yerusalema. Mwabugha ati baletebyo kusudi iye, esyoseghu-seghu siwe, n’abandi bakali biwe banywire mubyo. 3 Neryo mubaleta ebindu by’ehoro ebyalwa omo habuyirire h’enyumba y’oMungu e Yerusalema. Neryo omwami, esyoseghu-seghu siwe, n’abandi bakali biwe mubanywira mubyo. 4 Mubanywa edivai, bamapipa n’emiungu y’ehoro n’ey’efeza,* ey’ekwivre,* ey’ekyuma, ey’emiti, n’ey’amabwe.

5 Aho n’aho, eminwe y’omundu muyabutuka, yamatsuka erihandika oko luhimbo olusiripire lw’enyumba y’omwami, olusamalirene n’ekindu ky’erihirako etala. Omughulu ebyala byabya bikahandika, omwami abya akalangira oluhande lw’enyuma lw’ebyala. 6 Neryo omwami mwatumba,* n’ebyabya bikalaba omo mutwe wiwe mubyamusaghisya. Embindi yiwe muyatsuka erititimana, n’amaru wiwe amatsuka erihumangana.

7 Omwami mwabugha omo mulenge muli ati babirikire abalaghuli, Abakaldayo,* n’abakalaghula omw’ilebya esyongununu. Omwami mwabwira abandu b’amenge be Babiloni ati: “Oyukenditoka erisoma ebihandiko ebi, n’eribugha amaana wabyo, akendimbalibwa esyongyimba sy’erangyi y’olubono-bono,* akendimbalibwa eshenete y’ehoro omo bikya biwe, kandi akendibya w’akasatu omo bwami.”

8 Neryo abalume bosi b’amenge b’omwami mubasa, aliwe mubatatoka erisoma ebihandiko, kutse eribwira omwami y’amaana wabyo. 9 Neryo omwami Belshaza mwasagha kutsibu n’obusu bwiwe mubwatumba; n’esyoseghu-seghu siwe musyahandabuka.

10 Omughole mwabya abyowa ebinywa ebyo omwami n’esyoseghu-seghu babugha, mwingira omo kyumba ekyabyamo efete. Omughole mwabugha ati: “Mwami, ukote. Ebikalaba omo mutwe waghu isibyakusaghisaya, kutse isibyaleka obusu bwaghu bukatumba. 11 Omo bwami bwaghu mune omulume* oyuliko ekirimu ky’emiungu mibuyirire. Omughulu baba waghu abya akatabala, abandu mubalangira ngoko omulume oyo anganawatikya abandu erilangira ekyakakala, ngoko ali n’ehakili n’amenge awali ng’amenge w’emiungu. Baba waghu, omwami Nebukadneza, mwamuyira mo mukulu w’abahereri abakola obukumu, w’abalaghuli, w’Abakaldayo,* w’abakalaghula omw’ilebya esyongununu. Mwami waghe, baba waghu mwakola ekyo. 12 Kundi Danieli, oyo omwami aha erina rya Belteshaza, abyako ekirimu ekikaswekaya, abya asi myatsi mingyi, kandi abya n’amenge w’eriminya amaana w’esyonzoli, w’erikumbula esyondekerano, n’erisoha esyombanza esikala-kalire.* Ubirikire Danieli, akendikubwira amaana w’enzoli yaghu.”

13 Neryo mubaleta Danieli embere sy’omwami. Omwami mwabulya Danieli ati: “N’iwe Danieli, ow’oko banyewa be Yuda, oyo mwami baba waghe alusaya e Yuda? 14 Mungowa ambu uliko ekirimu ky’emiungu, kandi ngoko muwawatikya abandu erilangira ekyakakala, kandi ngoko uli n’ehakili n’amenge manene. 15 Abalume b’amenge n’abalaghuli mubakaletawa embere syaghe batoke erisoma ebihandiko ebyo n’erinibwira amaana wabyo, aliwe sibetatoka erinibwira nga bikasonda eribugha bitiki. 16 Aliwe mungowa ambu wanganatoka erinibwira amaana wabyo n’erisoha esyombanza esikala-kalire.* Neryo wamabya iwanganatoka erisoma ebihandiko ebi n’erinibwira amaana wabyo, ibakendikwambalya esyongyimba sy’erangyi y’olubono-bono,* ibakendikwambalya eshenete y’ehoro omo bikya byaghu, kandi ighukendibya w’akasatu omo bwami.”

17 Neryo Danieli mwasubirya omwami ati: “Usighale n’ebihembo byaghu, uhebyo abandi. Aliwe, ngendisomera omwami y’ebihandiko ebyo n’erimubwira amaana wabyo. 18 Naghu, iwe mwami, oMungu Ow’endata Kutsibu mwaha baba waghu Nebukadneza y’obwami, obukulu, olukengerwa, n’obusike. 19 Busana n’obukulu obo oMungu amuha, abandu bosi, ebihanda byosi, n’abandu bosi abakabugha emibughe mbiriri-mbiriri ibakatitimana embere siwe busana n’obuba. Iniakita omundu oyo anzire n’erisighaho oyo anzire; iniakahira omo mwanya w’endata n’erihira omo mwanya w’ahisi mo mundu oyo anzire. 20 Aliwe omutima wiwe mwabya abibyamo emiyiheko kandi mwabya abibyamo erighundu erihika oko kika amayilabirirya, mwalusibwa oko kitumbi kiwe ky’obwami, amasaghulwa n’olukengerwa lwiwe. 21 Mwatibitwako omo kati-kati k’abandu, n’omutima wiwe amayirwa ng’ow’enyama, amayikala haghuma n’esyopunda sy’emoli. Mwabya akahabwa ebiti by’erirya ng’syonume sy’esyonde, n’ekimi ky’elubula mukyatsapya omubiri wiwe, erihika omughulu aminya ngoko oMungu Ow’endata Kutsibu ni Mutabali omo bwami bw’abandu kandi ngoko akahabo oyo anzire.

22 “Aliwe, iwe mughala wiwe Belshaza, siwetayikehya omo mutima waghu, nomo unalue wasi ebyosi ebi. 23 Omo mwanya w’ekyo, mughukayihalamba embere sy’Omukama w’elubula, wamabugha uti bakuletere ebindu by’omo nyumba yiwe. Neryo iwe, esyoseghu-seghu syaghu, n’abandi bakali baghu mwamanywira mubyo mw’edivai n’eripipa emiungu y’efeza,* y’ehoro, y’ekwivre,* y’ekyuma, y’emiti, n’ey’amabwe, emiungu eyitelangira, eyityowa, kandi eyitasi kindu. Aliwe siwetaha oMungu y’olukengerwa, oyukaleka iwahumula n’erileka iwatoka erikola ebyosi ebyo ukakola. 24 Kyo kiryaleka iniatuma ebyala bihandike ebihandiko ebyo. 25 Ebihandiko ebiryahandikawa bya bino: MENE, MENE, TEKELI, ne PARSINI.

26 “Amaana w’ebihandiko ebyo w’ano: MENE, ni bugha ambu, oMungu abirighanza ebiro by’obwami bwaghu n’erikolyabo oko mwiso.

27 “TEKELI, ni bugha ambu, wabiripimwa oko kilo, neryo wabirilangirika ngoko sighulimo bilo.

28 “PERESI, ni bugha ambu, obwami bwaghu bwabirighabwa n’erihabwa Abamedi n’Abaperse.”

29 Neryo Belshaza mwabugha ati bambalaye Danieli esyongyimba sy’erangyi y’olubono-bono* kandi bamwambalaye eshenete y’ehoro omo bikya biwe; kandi mubabwira abandu ngoko Danieli akendibya w’akasatu omo bwami.

30 Omo kiro ky’ekiro ekyo kisa-kisa, Belshaza, omwami Mukaldayo, mwitibwa. 31 Neryo Dario Omumedi mwahabwa obwami; abya n’emyaka hakuhi 62.