Isaya
51 “Inywe mukakwamirira eritunganene, munihulikirire,
Inywe mukasonda-sondaya Yehova.
Mutungerere olukuka olo mwabatsawamo
N’ekyuna eky’eritakulamo amabwe ekyo mwalusibawamo.
2 Mutungerere tata wenyu ye Abrahamu
Na Sara oyo wababuta.*
Abya iyuwene omughulu namubirikira,
Kandi munamutsumula n’erikanyirirya olubuto lwiwe.
3 Kusangwa Yehova akendisyakirania e Sioni.
Akendisyaleta erikirania oko bisambukalirya biwe byosi,
Akendisyayira embwarara yiwe nge Edeni
N’eriyira embwarara yiwe ng’akalima ka Yehova.
Ewiwe ikendisyabya eritsanga n’obutseme,
Eriteka ewasingya n’esyonyimbo esilumire.
4 Bandu baghe, munihulikirire ndeke,
Iwe kihanda kyaghe, uniteghe okutu,
Kusangwa omughambo akendilua okw’ingye,
Kandi ngendisyahira obulingirirania bwaghe mo kyakakala busana n’ebitunga by’abandu.
5 Eritunganene lyaghe riri hakuhi.
N’omulamo akendisyalua okw’ingye.
N’amaboko waghe akendisyatswera ebitunga by’abandu.
Ebitsira bikendisyanihirako amaha,
Kandi bikendisyalindirira okuboko* kwaghe.
6 Musumbire ameso wenyu w’elubula,
Musamalire ekihugho ahisi.
Kusangwa olubula lukendisyapanzikana mo hitswe-hitswe ng’omuki;
N’ekihugho kikendisyakula ng’olukimba,
N’abikalani bakyo bakendisyahola ng’ehisuki,*
Aliwe omulamo waghe akendisyabyaho kera na kera,
N’eritunganene lyaghe siryendisyataluka* n’ahake.
7 Munihulikirire, inywe mwasi eritunganene,
Inywe kitunga ky’abandu abo emighambo* yaghe yiri omo mitima yabo.
Isimwasagha omwagha w’abandu abakahola,
Kandi isimwahahukaya emitima busana n’ebitsumi byabo.
8 Kusangwa ehinyurughunzu hikendisyalyabo ng’olukimba;
Ehinyurughunzu* ehikalya esyongyimba hikendisyalyabo ng’olukimba l’obweya bw’embuli.
Aliwe eritunganene lyaghe rikendisyabyaho kera na kera,
N’omulamo waghe akendisyabyaho oko bizazi* byosi.
9 Ubuke! Ubuke! Wambale amaka,
Iwe kuboko kwa Yehova!
Ubuke ng’omo biro bya kera kera, ng’omughulu w’ebizazi* ebyabirilaba.
Siwe watsutsanga Rahabu* mo bitswe-bitswe,
Iwe watatsimita ekihangyikwa ky’omo ngetse ekikubahaya?
10 Iwe utumaya engetse, amaghetse w’omo mutobero munene?
Oyo wayira emitobero y’engetse mo nzira, abakombolawa batoke erisoka?
11 Abakombolawa ba Yehova bakendisyasubula.
Bakendisyasa e Sioni ibanemuta obwogho bw’obutseme,
N’obutseme obutehwa bukendisyabya mbita yabo.*
Eriyisyandira n’obutseme bikendisyabya byabo,
Obulighe n’erisimba bikendisyatibita hali.
12 Ingyuwene-wene, n’ingye ngabakiranaya.
Neryo niki kyo kyangaleka imubaha omundu buyira oyukendisyahola
Omughala w’omundu oyukendisyuma ng’ekiti kibisi?
13 Busanaki ukibirirawa Yehova Omuhangyiki waghu
Oyo wasanza ekyanya n’erihiraho efondasyo y’ekihugho?
Omo musibo wosi ighukabya ighunemubaha erihitana erikalire ery’omunubya,*
Ikyabya ng’awite obutoki bw’erikubughaho.
Neryo lino, erihitana erikalire ly’omunubya liri hayi?
14 Omundu oyuyilingire inyanabohire omo minyororo, akendibya bwiranda,
Syendihola kutse eriya omo kyuna,
Kutse omukati wiwe syendibula.
15 Nikwa indi Yehova Mungu waghu,
Oyukaghungaya engetse n’eridunga ebisunda byayo
—Yehova w’emilondo lyo rina riwe.
16 Ngendisyahira ebinywa byaghe omo buno bwaghu,
Kandi ngendisyakuswika omo kitsutsu ky’ebyala byaghe,
Nitoke erihanda ekyanya n’erihiraho efondasyo y’ekihugho
N’eribwira Sioni niti, ‘Muli bandu baghe.’
17 Ubuke! Ubuke! Uhangane, iwe Yerusalema,
Iwe wabirinywa oko kikombe ky’obuhitane erilua omo byala bya Yehova.
Wabirinywa olutehi;
Wabiribugha ekikombe ekikaletera erighuna-ghuna.
18 Oko baghala bosi abo abuta, sihali n’omughuma oyuliho erimusondola,
Kandi sihali n’omughuma w’oko bana biwe abo alembera oyukamuhamba oko bwala.
19 Emyatsi ibiri eno yabirikuhikira.
Nindi yukendikukwira obulighe?
Eritoghotibwa n’eritsandibwa, enzala n’omuyali!
Nindi yukendikukirania?
20 Abaghala baghu babirilekula.
Baghotsere ahisi oko buli ngonde y’enzira*
Ng’esyombuli sy’omoli omo butimba.
Boswiremo erihitana lya Yehova, erihaya ly’oMungu wabo.
21 Neryo hulikirira kino,
Iwe mukali oyukaghalawa kandi oyukundire aliwe butsira omo divai.
22 Yehova Omukama waghu, oMungu waghu oyukalwira oko bandu biwe ati:
Lebaya! Ngendisyalusya omo byala byaghu ekikombe ekikaleta erighuna-ghuna,
Olutehi, ekikombe kyaghe ky’obuhitane;
Siwendisyasyanywakyo n’ahake.
23 Ngandisyahirakyo omo byala by’abakakwaghalaya,
Ababya bakakubwira bati, ‘Uname tukulabeko!’
Wabiriyira omughongo waghu ng’ekitaka,
Ng’enzira yabo y’erilabamo.”