Isaya
59 Ebyala bya Yehova si bikuhi muti sibyangalamya,
Kutse okutu kwaghe si kutsiha* muti sikwangowa.
2 Amalolo wenyu w’abiribaghabula oko Mungu wenyu.
Ebibi byenyu byabirileka inyababisa obusu bwiwe,
Akaghana eribahulikirira.
3 Ebighanza byenyu byabiritsanda omo musasi
Eminwe yenyu yabiritsanda omo rilolo.
Eminywe yenyu yikabugha amabehi, olulimi lwenyu lukabugha-bugha ebibi.
4 Sihali n’omughuma oyukabirikira eritunganene,
Sihali n’oyukayatonda omo kwenene.
Banzire emyatsi eyite y’ekwenene* kandi bakabugha ebitya-bitya.
Bakaheka obuhanya mo bukule ibabuta obubi.
5 Bakatwa amayaya w’enzoka ey’esumu,
Ibahimba obukanga obw’ekisesengula.
Owosi-wosi oyukalya amayaya wasyo akahola,
N’eriyaya erikatwibawa rikaluamo emboma.*
6 Obukanga bwabo sibwangabya lukimba,
N’esyongyimba esyo bakakokotaya sibangayiswikasyo.
Emibiiri yabo ni mibi,
N’ebyala byabo bikakola emibiiri mingyi ey’obwiti.
7 Ebisando byabo bikatibita eriyakola ebibi,
Bakanguha eriyuta omusasi ow’ateko lubanza.
Amalengekania wabo ni malengekania mabi;
Omo nzira syabo muli eriherya n’obuhanya.
8 Sibetaminya enzira ey’obuholo,
Ehiyira hyabo si hy’obulignirirania.
N’esyonzira syabo sihali n’omughuma oyukalaba musyo;
Bakahengemaya esyonzira syabo,
Sihali n’omughuma oyukalaba musyo oyukabana obuholo.
9 Busana n’ekyo obulingirirania buli hali okwi’twe,
N’eritunganene siryendituhikako.
Tukalindirira ekyakakala, aliwe lebaya! hali omwirimya;
Obutuku erihenia, aliwe tukalendera omo mwirimya.
10 Tukamata-mata ahali oluhimbo ng’esyondime-time;
Tukabera erimata-mata ng’abatawite ameso.
Omw’itungyi tukatwikangala nga bwirire;
Omo kati-kati kabandu abakalire tuli ng’abandu abaholire.
11 Itwe bosi tukabera eriruruma ng’esyodubu
Tukabelekuma ng’ehirikuku.
Tukalindirira obulingirirania, aliwe si buli;
Tukalindirira omulamo, nikwa ali hali okw’itwe.
12 Kusangwa erihona ryetu ni linene embere syaghu;
Obuli kibi kyetu kikatuhandikirira.
Kusangwa amalolo wetu ali haghuma netu;
Tunasi ndeke ebibi byetu.
13 Twabirihalya n’erighana Yehova;
Twabiribindukirya oMungu wetu y’emighongo.
Twabiribugha ebikaghalaya n’eby’eriyisamambula,
Twabiriheka amabehi mo bukule n’eribugha ebinywa bibi omo mitima yetu.
14 Obulingirirania bwabirisubibwa enyuma,
N’eritunganene rimene hali,
Kusangwa ekwenene yabiritwikala omo bibugha by’omuyi,
Ekitunganene sikyangatoka eringira.
15 Ekwenene yabiribulirana,
N’owosi-wosi oyukabindukiraya ekibi ky’omughonga akatwalawa omo bunyewa.
Yehova mwaminya eki naye mwatatsema,*
Kusangwa si habya obulingirirania.
16 Mwalangira ngoko sihali mundu,
Kandi mwasweka ngoko sihali oyukakanaya oko mwatsi,
Neryo ebyala biwe iyuwene-wene mubyaleta omulamo,*
Eritunganene liwe ryo ryamuwatikaya.
17 Neryo mwambala eritunganene ng’erikoti ry’ekyuma
N’eryambala ekikeke ky’omulamo* oko mutwe wiwe.
Mwambala esyongyimba sy’erikisya mo ngyimba siwe
N’eriyiboha omuhwa ng’erikoti.*
18 Akendisyahembabo busana n’ebyo babirikola.
Erihitana oko bamuponire, n’erikisya esyonzighu siwe
Akendisyaliha n’ebitsira ekitolerebyo.
19 Bakendisyubaha erina lya Yehova
Oko luhande lw’eyo eryuba likalengera
N’olukengerwa lwiwe oko luhande lw’eyo eryuba likasira,
Kusangwa akendisyasa ng’olusi olukatibita,
Olo ekirimu kya Yehova kikakuna.
20 “Omutongolya akendisyasa e Sioni,
Akendisyasa eyiri abandu ba Yakobo abakaleka amalolo,” Yehova atya.
21 “Nikwa ingye endaghane yaghe haghuma nabo y’eno,” Yehova atya. “Ekirimu kyaghe ekiri okw’iwe n’ebinywa byaghe ebyo nabirihira omo buno bwaghu—sibyendisyalusibwa omo buno bwaghu, omo buno bw’abana baghu, n’omo buno bw’abitsikulu baghu. Eritsuka lino erihika kera na kera,” Yehova atya.