Hosea
13 “Omughulu Efraimu abugha, abandu mubatitimana;
Abya seghu-seghu omo Israeli.
Aliwe mwabyako omusango busana n’eriramya Baali, naye mwahola.
2 Erihika na lino, bakinakola amalolo,
Bakakokotaya esyosanamu sy’emetale eyabiriyeyukibwa omo feza* yabo;
Bakakokotaya esyosanamu syo ndeke, esyosi sikakolawa n’abafundi.
Bakabwirasyo bati: ‘Abandu abakaherera amahere bahe ebyana by’esyonde by’ebizu.’
3 Busana n’ekyo, bakendisyabya ng’ebitu by’omo tututu.
Bakendisyabya ng’ekimi ekikahwa omo tututu,
Bakendisyabya ng’omusunga owali oko kihumbiro owakahekawa n’ekihunga.
Kandi bakendisyabya ng’omuki owakasira omo kitobo ekiri omo lutwe.
4 Aliwe ingye, niri Yehova oMungu waghu eritsuka e Misri;
Siwabya wasi oghundi Mungu ate ingye,
Kandi sihali Omusabuli ate in’ingye.
5 Nakuminyira omo mbwarara, omo kihugho ekitemo amaghetse.
6 Mubughuta ebyo basunga omo myanya yabo y’erilisiryamo,
Mubughuta, n’omutima wabo amabyamo emiyiheko.
Neryo bamanibirirwa.
7 Okw’ibo, ngendisyabya ng’esimba nyilere,
Ngendisyabya ng’esoro eyikalimbiraya hakuhi n’enzira.
8 Ngendisyalwa nabo ng’edubu eyabiriherya ebyana byayo,
Kandi ngendisyatula ekikuba kyabo.*
Ngendisyamerabo ng’esimba;
Enyama y’omoli yikendisyatulangabo mo bihande-bihande.
9 Iwe Israeli, enyama eyo yikendisyakutoghotya,
Kundi muwanileka, ingye muwatikya waghu.
10 Neryo omwami waghu ali hayi, atoke erikusabula omo miyi yaghu yosi?
N’abasondoli* baghu bali hayi, abo wayisabira omughulu wabugha uti:
‘Umbe omwami n’abakulu’?
11 Munakuha omwami ininahitene,
Kandi ngendisyamulusyaho ininahitene.
12 Ekosa ya Efraimu yisengire;*
Erilolo riwe ribikire.
13 Akendisyaghalwa ng’omukali oyukasonda eributa.
Aliwe omwana mukiru;
Endambi yiwe y’erilua omo nda yikabya yahika, iniaghaniramo.
14 Ngendisyabasabula omo Yisinda.*
Ngendisyabalusya omo luholo.
Luholo, erihutalya ryaghu riri hayi?
Yisinda, obutoki bwaghu bw’eritoghotya buli hayi?
Ameso waghe syendibakwira obulighe.
15 Nomo angaboghera omo siseke,
Erihunga ry’oko luhande lw’eyo ryuba rikasira rikendisyasa, erihunga rya Yehova,
Rikasira omo mbwarara, busana n’erisyumya eribulu riwe n’engununuko yiwe.
Oyo akendisyapura ebindu biwe byosi by’obughuli ebiri omo kyumba kiwe ky’eribikamo ebindu by’obughuli.
16 Samaria akendisyalangirwa mo mundu oyuli n’ekosa,
Kundi abirighana erikwama obusondoli bw’oMungu wiwe.
Bakendisyakwa omo muyali,
Abana babo bakendisyatulangwa mo bihande-bihande,
N’esyonda sy’abakule babo sikendisyatulangwa.”