Habakuki
1 Bino ni binywa ebyo omuminyereri Habakuki* ahabawa omo nzoli:
2 Yehova, erihika mughulu wahi ngendisyakusaba niti uniwatikaye, aliwe ighutowa?
Erihika mughulu wahi ngendisyakusaba niti ubugheho obutsururu, aliwe iwatabughabo?*
3 Busanaki ukanileka nilangire emyatsi eyituwene?
Kandi busanaki ukalekaho abandu abakaghalaya abandi?
Busanaki eritoghotya n’obutsururu biri embere syaghe?
Busanaki amalwa n’eritendihulikirirana binemukanyirira?
4 Omughambo syakiwite akaghala,
N’abandu sibakikola omo ritunganene.
Kundi ababi bakatimba oko batunganene;
Kyo kyabirileka eritunganene iryatakwamwa.
5 “Mulebaye omo kati-kati k’ebihanda n’erilangira!
Musweke n’erikukubala;
Kundi oko mughulu wenyu, hakendihuluka omwatsi mulebe
Ogho mutendisyikirirya nomo bangabakanirya kugho.
6 Kundi ngendileta Abakaldayo,
Ni bandu abatsurumire kandi abatekwa obulighe.
Bakingira omo biharo binene-binene ebiri oko kihugho
Busana n’eripura amanyumba awate wabo.
7 Bakasaghisaya n’eriita obuba.
Bakahiraho eritunganene ryabo-ryabo n’olukengerwa lwabo-lwabo.
8 Esyosabayiri* syabo sitibitire kulenga esoro,
Kandi sitsurumire kulenga ngoko embwa y’emoli ikatsuruma omo kiro.
Esyosabayiri syabo sy’amalwa sinemwasa sikatibita kutsibu;
Esyosabayiri syabo sikalua hali.
Sikaghuluka ng’erisamba erikatibita rikayahamba akanyama k’erirya.
9 Abosi bakasa busana n’erikola omo butsururu.
Amusu wabo akabya abihirwa haghuma, akabya ng’erihunga erikasira oko luhande lw’eyo ryuba rikasira,
Kandi bakakuma-kuma abanyewa ngoko omundu akakuma-kuma omutsanga.
10 Bakasekereraya abami
N’erisekererya abakulu.
Bakasekereraya emyanya yosi eyo mundu ate angahikamo bweghu-bweghu;
Bakahira omutaka wo haghuma atoke eribya katwa, neryo ibahamba akatwa ako.
11 Enyuma sy’aho, ibalola embere ng’erihunga n’erilaba,
Aliwe bakendisyabyako omusango,
Kundi bakabugha bati omungu wabo yukabaha akaghala.”*
12 Yehova, si watulaho eritsuka kera na kera!
Mungu waghe, Omubuyirire waghe, sulihola.*
Yehova, muwasombolabo batoke erikola ebiryasohawa;
13 Ameso waghu erire kutsibu, neryo syangasamalira ebibi,
Kandi siwangavumilia obubi.
Neryo busanaki ukavumilia abatebya
N’eribya bukutu omughulu omubi akamera omundu oyutunganene kumulenga?
14 Busanaki ukayira abandu ng’esyosamaki syomo ngetse?
Busanaki ukabayira ng’ebihangyikwa ebikayikura oko kihugho ebitawite omutabali?
15 Akasoha* abosi abo omo ntobani.*
Akahambabo omo butimba bwiwe bw’erisohamo,
Kandi akakuma-kumabo omo butimba bwiwe
Ekyo kikaleka iniatsema kutsibu.
16 Ekyo kyo kikaleka iniaherera obutimba bwiwe bw’amahere
N’eriherera obutimba bwiwe bw’erisohamo bw’amahere;*
Kundi w’akaleka iniabya n’erighabo erikahimba omubiri,*
N’eribya n’akalyo akuwene.
17 Neryo anemwendisyabya ikwanemulusya ebyosi ebiri omo butimba bwiwe?*
Syendisyaleka eriita ebihanda butsira bulighe?