Habakuki
2 Ngendisyabya inine omo mwanya waghe w’erikoleramo obuteya,
Ngendisyimana oko luhimbo lw’omuyi.
Ngendisyabya ininemuteya nitoke erilangira ebyo anzire inabugha
N’ebyo ngendisubirya omughulu ngendikungwa.
2 Neryo Yehova mwanisubirya ati:
“Uhandike ebyo ukalangira omo nzoli, kandi uhandikebyo ndeke oko bibambali
Oyukasomabyo omo mulenge muli atoke erisomabyo bweghu-bweghu.
3 Kundi ebyo ukalangira omo nzoli bikendisyabya oko mughulu wabyo owabirihirwaho,
N’omughulu ogho bikendisyaberererako* anemwasa luba, kandi sibyendisyabugha amabehi.
Nibya byamabitselewa,* isiwaleka erilindirirabyo!*
Kundi sibyendisyabula eribererera.
Sibyendisyatselewa!
4 Lebaya omundu w’emiyiheko;*
Syatunganene omo mutima wiwe.
Aliwe omutunganene akendisyabyaho busana n’obutaleghula* bwiwe.
5 Oko kwenene, kundi edivai yanganaleka omundu iniayiwata kitya-kitya,*
Omundu w’emiyiheko syendisyahikira ebyo akalandamirira.
Akabya inianemuhindania ebihanda byosi
N’eriyikuma-kumira abandu bosi.
6 Abosi abo banemwendisyabula erimubughako omusyo, erimusekererya, n’erimubughako esyondekerano?
Bakendisyabugha bati:
‘Bulighe oko oyo wayikuma-kumira ebindu ebite biwe
Kandi oyukinayira edeni yiwe mo nene?
Erihika mughulu wahi?
7 Abakubweka sibendisyasa kitsumbukirania?
Bakendisyabuka n’erikutsingya-tsingya luhanya-hanya,
Kandi bakendisyapura ebindu byaghu.
8 Abandu bosi abasighalira bakendisyapura ebindu byaghu
Kundi muwapura ebindu by’ebihanda bingyi,
Kundi mughuta omusasi w’abandu
Kandi kundi muwakolera ekihugho omo butsururu,
N’erikolera emiyi n’abosi abikere muyo omo butsururu.
9 Bulighe oko oyukabanira ekihanda kiwe ky’endundi omo nzira eyituwene,
Atoke erihira oluto lwiwe lw’endata,
Obuhanya bukasyamuhamba!
10 Esyombita syaghu musyaleka ekihanda kyaghu ikyahemuka.
Ukayihalayako* omw’ibughaho abandu bangyi.
11 Eribwe rikendisyalakira oko luhimbo,
N’omuti owali oko lutwe akendisyasubiryaryo.
12 Bulighe oko oyukahimba omuyi omo bwiti,
Oyukatsukisaya omuyi omo ritatunganene!
13 Yehova w’emilondo yuteleka abandu ibanubira ebindu ebikendihwerera omo muliro,
Kandi yuteleka ebihanda ibyayiluhya omo bindu ebite na mughaso?
14 Kundi engulu y’olukengerwa* lwa Yehova ikendyusula omo kihugho kyosi
Ngoko amaghetse akusula omo ngetse.
15 Bulighe oko oyukaha abalikyabo b’eky’erinywa,
N’eriongezya mukyo mw’ekinigha kinene n’erihitana, batoke eritamira,
Kusudi asamalire obusoni bwabo!
16 Ukendisyughuta esisoni omo mwanya w’olukengerwa.
Naghu unywe n’erikangania* ngoko sighubanibwe.
Ekikombe ekiri omo byala by’amali bya Yehova kikendisyasa eyo uli,
N’esisoni sikendisyaswika olukengerwa lwaghu.
17 Obutsururu obwakolerawa Lebanoni bukendisyakuswika,
N’eritoghotya eryasaghisaya esyonyama rikendisyakuhikira,
Kundi mughuta omusasi w’abandu
Kandi muwakolera ekihugho omo butsururu,
N’erikolera emiyi n’abandu abikere muyo omo butsururu.
18 Esanamu eyibatsire ikabya n’endundi yahi
Oyukakokotayayo abibatsayo?
Oyukakangiriraya amabehi n’esanamu y’emetale eyo balyayeyukaya biri n’endundi yahi
Nomo oyukakotayayo akabya iniayiketereyo,
Omw’ikokotya emiungu eyitawite mughaso kandi eyitebugha?
19 Bulighe oko oyukabwira ekihande ky’omuti ati: “Buka!”
Kutse oyukabwira eribwe eritebugha ati: “Hangana! Utukangiriraye!”
Babirihakako ehoro n’efeza,*
Kandi isiyirimo n’ehyuka n’ehike,
20 Aliwe Yehova ane omo hekalu yiwe nyibuyirire.
Ekihugho kyosi kibye bukutu embere siwe!’”