Yeremia

52 Zedekia abya n’emyaka 21 omughulu abya mwami. Mwatabala oko myaka 11 iniane e Yerusalema. Mama wiwe abya iniakahulawa mo Hamutali, abya mwali wa Yeremia we Libna. 2 Zedekia abya akakola ebituwene omo meso wa Yehova, mwakola ebyosi ebyo Yehoyakimu akola. 3 Ebyosi ebyo mubyahikira e Yerusalema ne Yuda kundi Yehova iniabirihitana, mwahika n’oko kika ky’eribalusya omo meso wiwe. Na Zedekia mwaghana erikwama obusondoli b’omwami we Babiloni. 4 Omo kiro kye 10 ky’omwisi we 10, oko mwaka we 9 w’obutabali bwa Zedekia, omwami Nebukadneza* we Babiloni mwasa n’abasuda biwe bosi, bamasyalwa n’omuyi we Yerusalema. Mubapanga hakuhi n’omuyi oyo, bamatimbya kugho kw’oluhimbo batoke erilwa nagho. 5 Mubatimba oko muyi oyo batoke erilwa nagho erihika oko mwaka we 11 w’obutabali b’omwami Zedekia.

6 Omo kiro kye 9 ky’omwisi w’akani, enzala muyakala omo muyi, neryo abandu b’omo kihugho mubabula akalyo. 7 Oko mwiso, oluhimbo lw’omuyi mulwatobolwamo ekitobo, neryo abasuda bosi mubatibita, bamalua omo muyi m’omo kiro, bamalaba omo lukyo oluli omo kati-kati k’esyombimbo ibiri hakuhi n’erirrima ry’omwami. Abasuda mubatibita Abakaldayo ibanatimbire oko muyi, mubayalaba omo nzira eyikalolera e Araba. 8 Aliwe abasuda Bakaldayo mubakwamirira omwami, mubayahambira Zedekia omo ribanda eriri ng’embwarara rye Yeriko. Abasuda biwe bosi mubapanzikana, bamaya hali okw’iye. 9 Neryo abasuda Bakaldayo mubahamba omwami, bamamutwalira omwami we Babiloni e Ribla, omo kiharo kye Hamati. Neryo omwami we Babiloni mwamutswerera eyo. 10 Omwami we Babiloni mwakera abana ba Zedekia, Zedekia inianalangire. Kandi mwakerera n’abakulu bosi be Yuda e Ribla. 11 Enyuma sy’aho, omwami we Babiloni mwayira Zedekia mo ndime-time, amamuboha omo minyororo* y’ekwivre,* n’erimutwala e Babiloni. Mwamusigha omo ngomo erihika ekiro ahola.

12 Omo kiro kye 10 ky’omwisi w’akatano, ni bugha ambu omo mwaka we 19 w’obutabali b’omwami Nebukadneza* we Babiloni, Nebuzaradani omukulu w’abateya, oyo wabya akakolera omwami we Babiloni, mwahika e Yerusalema. 13 Mwahisya enyumba ya Yehova, enyumba y’omwami, n’amanyumba wosi we Yerusalema. Mwahisya n’amanyumba wosi manene-manene. 14 N’abasuda bosi Bakaldayo ababya haghuma n’omukulu w’abateya mubahimbula esyombimbo esyabya sitimbire oko Yerusalema.

15 Nebuzaradani, omukulu w’abateya, mwatwala omo bunyewa mw’abandu balebe b’ahisi n’abandu abasighala omo muyi. Mwatwalayo n’abandu abatswa n’eriyayighunga n’omwami we Babiloni, amatwalayo n’abafundi abasaka. 16 Aliwe Nebuzaradani, omukulu w’abateya, mwasigha omo kihugho mw’abandu balebe ababya bera kutsibu batoke eribya bakalima emizabibu n’erikola emibiiri y’erikaswa.

17 Abakaldayo mubatsutsanga esyonduyi sy’ekwivre* esyabya omo nyumba ya Yehova, esyongurubani, n’Engetse y’ekwivre eyabya omo nyumba ya Yehova. Mubahekera ne Babiloni y’ekwivre yosi. 18 Mubaheka n’ebindu by’erihekamo eribu, ebipao, ehindu hy’erilimyamo muliro, ebibakuli,* ebikombe, n’ebindi bindu byosi by’ekwivre* ebyabya bikakolesibwa omo mibiiri y’oko hekalu. 19 Omukulu w’abateya mwimya ebibase, ebindu by’erihekamo muliro, ebibakuli,* ebindu by’erihekamo eribu, ebindu by’erihirako esyotala, ebikombe, n’ebibakuli ebyakokotibawa omo horo nyisa-nyisa n’omo feza* nyisa-nyisa. 20 Omundu isyangatoka eripima ekwivre* eyakolesibawa erikokotya esyonduyi ibiri, Engetse, esyonume 12 sy’esyonde sy’ekwivre esyabya eyikwa w’Engetse, n’esyongurubani esyo omwami Solomona akokoteraya enyumba ya Yehova.

21 Obuli nduyi yabya y’amaboko* 18 oko buli. Omundu eritimba oko buli nduyi akapimayo, iniakakolesaya ekamba y’obuli bw’amaboko 12. Obunene bwayo bwabya bw’eminwe* ini, kandi yabyamo ekyuna. 22 Embita eyabya oko mutwe-mutwe w’obuli nduyi yabya y’ekwivre;* obuli mbita y’oko nduyi yabya y’obuli bw’amaboko atano; eminyororo eyiluka-lukene n’amakomamanga ebyabya bitimbire oko buli mbita y’oko nduyi byabya by’ekwivre. Enduyi y’akabiri nayo ko yabya yitya, n’amakomamanga nagho kwanabya atya. 23 Oko syombande sy’oko syombita sy’oko syonduyi kwabya amakomamanga 96; amakomamanga wosi awabya oko minyororo eyiluka-lukene abya 100.

24 Omukulu w’abateya mwaheka na Seraya omuhereri mukulu, Zefania omuhereri oyumusubukire, n’abandu basatu abakatsunga emilango. 25 Mwaheka n’omo muyi mo mukulu mughuma oyukakolera oko bwikalo bw’omwami oyo wabya imanire abasuda, mwaheka n’abira 7 b’oko mutima b’omwami ababya omo muyi; mwaheka n’omusekretere w’omukulu w’abasuda, oyo wabya akahindania abasuda b’omo kihugho, mwaheka n’omo kihugho mw’abandu 60 ba kawaida ababya ibakine omo muyi. 26 Nebuzaradani, omukulu w’abateya, mwahekabo, amatwalirabo omwami we Babiloni e Ribla. 27 Omwami we Babiloni mwitirabo e Ribla, omo kiharo kye Hamati. Abandu be Yuda ko batwalawa batya omo bunyewa hali n’ekihugho kyabo.

28 Bano b’abandu abo Nebukadneza* atwala omo bunyewa: Omo mwaka we 7 w’obutabali bwiwe, Abayahudi 3 023.

29 Omo mwaka we 18 w’obutabali bwa Nebukadneza,* abandu* 832 mubalusibwa e Yerusalema.

30 Omo mwaka we 23 w’obutabali bwa Nebukadneza,* Nebuzaradani, omukulu w’abateya, mwatwala Abayahudi b’omo bunyewa, babya bandu* 745.

Abandu* bosi abatwalawa omo bunyewa babya 4 600.

31 Ekiro 25 ky’omwisi we 12 omo mwaka we 37, omwami Yehoyakimu we Yuda iniane omo bunyewa, Evil-merodaki omwami we Babiloni mwalusya Yehoyakini omwami we Yuda y’omo ngomo. Oko mwaka oyo ko Evil-merodaki abya mwami. 32 Omwami we Babiloni abya iniakabugha ndeke na Yehoyakimu, kandi mwamuyira mo mukulu kulenga abandi bami ababya naye e Babiloni. 33 Neryo Yehoyakini mwalusya esyongyimba esyo bandu bakambalira omo ngomo, kandi mwabya akalira oko mesa y’omwami omo biro byosi ebyo abya inianeho. 34 Obuli kiro, omwami we Babiloni iniakamuha akalyo; abya akamuhako biro byosi erihika omughulu ahola.