Ezekieli

6 “‘Nikwa omuteya amabilangira omuyali akasa, aliwe inyatabuha engubi* n’abandu ibatowa omulenge wosi-wosi ow’eribakunga, neryo omuyali inyasa inyabughaho obuyingo* b’omughuma wa kubo, omundu oyu akendisyahola busana n’ekibi kiwe, aliwe omusasi wiwe ngendisyabulyagho omuteya* oyo.’

7 “Neryo iwe mughala w’omundu, nabirikusombola eribya muteya w’abandu b’enyumba ya Israeli; neryo omughulu ukowa ekinywa kikalua omo buno bwaghe, ritolere iwanibwirirabo uti, ‘Oheee!’ 8 Omughulu ngabwira omundu mubi niti, ‘Iwe mundu mubi, ahate eritika-tika ukendihola! aliwe iwahuna, ighutakunga omundu mubi oyo uti abinduke aleke enzira yiwe nyibi, omundu mubi oyo inyakendohola busana n’ekibi kiwe. Aliwe ingendisyakusaba omusasi wiwe. 9 Nikwa wamabikunga omundu mubi uti abinduke, aleke enzira yiwe nyibi, naye inyaghana eribinduka, inyakendihola busana n’ekibi kiwe. Aliwe iwe ighukendilamya engebe* yaghu.

10 “Naghu mughala w’omundu, ubwire ekihanda kya Israeli uti: ‘Mwabiribugha muti: “Amalolo wetu n’ebibi byetu byabiritulitohera kutsibu, byabiritusukamira; byabirileka itwasendekerera. Neryo twangatoka tuti eritendihola?” 11 Ubwirebo uti Yehova Omukama Mukulu oko Bosi ati, “‘Kwenene-kwenene ngoko niriho, sinditsema omughulu omundu mubi akahola, aliwe omo mwanya w’ekyo nganza niti kumbe omundu mubi inyabindula esyonzira siwe neryo inyaleka erihola. Mubinduke, mubinduke muleke esyonzira syenyu nyibi. Ekyangaleka imwahola niki inywe bandu b’enyumba ya Israeli?”’

12 “Nghu iwe mughala w’omundu, ubwire abaghala b’abandu baghu uti, ‘Eritunganene ry’omutunganene siryangamulamya amabikola ekibi; kutse obubi bw’omundu mubi sibwangaleka akatwikala amabibinduka n’erileka ebibi biwe. N’omutunganene syangalola embere eribyaho busana n’eritunganene liwe amabikola erilolo. 13 Omughulu ngabwira omutunganene niti: “Oko kwenene siwendihola,” naye inyayiketera eritunganene liwe neryo inyakola ekibi, sihali n’ekighuma ky’oko bitunganene biwe ebyo abirikola ekikendisyibukwa. Aliwe inyakendihola busana n’ekibi ekyo alyakola.

14 “‘Kandi omughulu ngabwira omundu mubi niti: “Oko kwenene ukendihola,” naye inyabinduka n’erileka ekibi kiwe, neryo inyakola ekyuwene n’ekitunganene, 15 n’omubi oyo inyasubulya ebyo imaya mo muwato,* inyaliha n’ebyo anyegha n’erilendera omo bihano by’engebe, inyaleka erikola ekibi, oko kwenene isyendihola. Iniakendibyaho. 16 Syangaghanzirwa* n’erighuma ry’oko malolo agho akola. Busana n’erikola ekyuwene n’ekihikire, isyendihola.’

17 “Aliwe abandu baghu babiribugha bati, ‘Enzira ya Yehova siyitunganene,’ ibwa oko kwenene enzira yabo iyo itatunganene.

18 “Omutunganene amabileka eritunganene liwe, neryo inyakola ekibi, litolere inyahola busana n’ekyo. 19 Nikwa omundu mubi amabileka ekibi kiwe, neryo inyakola ekitunganene, busana n’erikola atya, isyendihola.

20 “Aliwe mwabiribugha muti, ‘Enzira ya Yehova siyitunganene.’ Ngenditswera obuli mughuma w’okwinywe erikwamana n’esyonzira siwe, inywe kihanda kya Israeli.”

21 “Oko nduli, oko mwaka we 12 omwisi we 10 oko kiro ky’akatano ky’omwisi w’obunyewa bwetu, omundu oyo wabala e Yerusalema mwasa eyo niri. Mwanibwira ati: “Omuyi abiritoghotibwa!”

22 Neryo omo righolo, embere omulume oyo ahike, ebyala bya Yehova mubyanibyako, kandi abya inyabirikumbula obuno bwaghe embere omulume oyo ase eyo niri omo tututu. Neryo obuno bwaghe mubwakumbulwa, munatasyatoka eribugha, nabya isinikiri mumu.

23 Neryo ekinywa kya Yehova mukyanihikako kiti: 24 “Mughala w’omundu, abandu abikere omo bisambukalirya ebi banemubugha oko kihugho kya Israeli bati, ‘Abrahamu abya mulume mughuma musa, aliwe mwimya ekihugho kyamabya kiwe. Ibwa itwe tuli bangyi; oko kwenene twabirihabwa ekihugho kino mo kyetu.’

25 “Neryo ubwirebo uti, ‘Yehova Omukama Mukulu oko Busi ati: “Munemulya akalyo n’omusasi, kandi munemusumbira ameso* wenyu esyosanamu syenyu esikita nye,* kandi ko munemuta omusasi. Neryo ekyangaleka imwimya ekihugho, ikyabya kyenyu niki? 26 Mwabiriyiketera emiyali yenyu, mukakola emyatsi eyikita nye, n’obuli mughuma w’okwinywe abiritsandya omukali wa mulikyabo. Neryo ekyangaleka imwimya ekihugho mo kyenyu niki?

27 “Bino byo ukendibwirabo, ‘Yehova, Omukama Mukulu oko Bosi ati: “Kwenene-kwenene ngoko niriho, abandu abikere omo bisambukalirya bakendisyakwa omo muyali; abali omoli, ngendisyahabo esyonyama syomoli, isyalyabo; n’abali omo myanya eyikongondere, n’abali omo myangalu bakendisyahola omo ndwala. 28 Ngendisyayira ekihugho mo matongo kandi mo mulala, n’eriyihalamba lyakyo omo righundu likendisyumbya. Ebitwa bya Israeli bikendisyabya matongo, isihali oyukalaba mubyo. 29 Nabo bakendisyaminya ngoko indi Yehova omughulu ngendisyayira ekihugho mo matongo ndeke-ndeke kandi mo mulala, busana n’emyatsi yosi eyikita nye eyo babirikola.”

30 “Naghu mughala w’omundu, abandu baghu banemukanirania. Banemukukaniako enyuma w’esyombimbo, n’omo syongyo sy’amanyumba. Obuli mundu anemubwira mulikyabo ati, ‘Asa tuyahulikirire ekinywa ekikalua oko Yehova.’ 31 Bakendyasa mo kikumula, ibikala embere syaghu ng’abandu baghe. Bakendihulikirira ebinywa byaghu, aliwe sibendikolabyo. Kusangwa ebinywa ebyo bakakubwira ni by’ekisehya,* aliwe emitima yabo yirimo omururu w’eribana endundi eyite y’ekwenene. 32 Lebaya! Okw’ibo uli ng’olwimbo l’olwanzo olukimbawa omo mulenge oghuwene, n’eriwatwa ndeke omo kyombo ky’omuziki eky’esinga. Ebinywa byaghu banemwenditowabyo, aliwe sihali n’omughuma oyukendikola erikwamana nabyo. 33 N’omughulu bikendisyabererera—na kwenene bikendisyabererera—bakendisyaminya ngoko omuminyereri anabya omo kati-kati kabo.”