Danieli

3 Omwami Nebukadneza mwakokotya esanamu y’ehoro y’amaboko 60* oko buli n’amaboko 6* oko bughali. Mwimaniayo omo ribanda rye Dura, omo ngabiro* ye Babiloni. 2 Enyuma sy’aho, omwami Nebukadneza mwabirikira abakulu b’esyongabiro,* abimaniri, abaguvernere, abahani, abimanire ebindu by’obughuli, abatsweri, abakateghaya isihabya obutsumbu-tsumbu, n’abimaniri bosi b’esyongabiro, ati base oko kisendebele ky’erikangula esanamu eyo omwami Nebukadneza alyasingyika.

3 Neryo abakulu b’esyongabiro,* abimaniri, abaguvernere, abahani, abimanire ebindu by’obughuli, abatsweri, abakateghaya isihabya obutsumbu-tsumbu, n’abimaniri bosi b’esyongabiro mubasa oko kisendebele ky’erikangula esanamu eyo omwami Nebukadneza asingyika. Mubimana embere sy’esanamu eyo omwami Nebukadneza asingyika. 4 Omutula-ngulu w’omwami mwabugha omo mulenge muli ati: “Inywe bandu, inywe bihanda, n’inywe bandu abakabugha emibughe mbiriri-mbiriri, kino kyo mukendikola: 5 Omughulu mukendyowa omulenge w’erihembe, w’enyabulere, w’esitare,* w’enanga eyiri ng’etriangle, w’ekyombo ky’omuziki ky’esyosinga, w’ekornemize,* n’ow’ebindi byombo byosi by’omuziki, mutolere imwawa ahisi n’eriramya esanamu y’ehoro eyo omwami Nebukadneza alyasingyika. 6 Oyutendiwa ahisi n’eriramyayo, akendelw’iniaghuswa omo riko eririmo omuliro owakire kutsibu.” 7 Neryo omughulu abandu bosi bowa omulenge w’erihembe, w’enyabulere, w’esitare,* w’enanga eyiri ng’etriangle, w’ekyombo ky’omuziki ky’esyosinga, n’ow’ebindi byombo byosi by’omuziki, abandu bosi, ebihanda byosi, n’abandu bosi abakabugha emibughe mbiriri-mbiriri mubawa ahisi n’eriramya esanamu y’ehoro eyo omwami Nebukadneza asingyika.

8 Neryo oko mughulu oyo, Abakaldayo balebe mubasyatsongera* Abayahudi. 9 Mubabwira omwami Nebukadneza bati: “Mwami wetu, ukote. 10 Mwami wetu, mughukabugha uti obuli mundu oyukendyowa omulenge w’erihembe, w’enyabulere, w’esitare,* w’enanga eyiri ng’etriangle, w’ekyombo ky’omuziki ky’esyosinga, w’ekornemize,* n’ow’ebindi byombo byosi by’omuziki atolere iniawa ahisi n’eriramya esanamu y’ehoro; 11 kandi mughukabugha uti oyutendiwa ahisi n’eriramya esanamu eyo atolere iniaghuswa omo riko eririmo omuliro owakire kutsibu. 12 Aliwe hane Abayahudi balebe abo ulyayira mo bimaniri b’engabiro* ye Babiloni, ni bugha ambu ye Shadrake, Meshake, na Abednego. Mwami, abalume abo sibetasikya ekinywa kyaghu. Sibalikolera emiungu yaghu, kandi bakaghana eriramya esanamu y’ehoro eyo ulyasingyika.”

13 Neryo Nebukadneza mwahitana kutsibu, amabugha ati balete Shadrake, Meshake, na Abednego. Neryo mubaletabo embere sy’omwami. 14 Nebukadneza mwabababwira ati: “Shadrake, Meshake, na Abednego, kwenene-kwenene simulikolera emiungu yaghe kandi mukaghana eriramya esanamu y’ehoro eyo niryasingyika? 15 Neryo lino, omughulu mukendyowa omulenge w’erihembe, w’enyabulere, w’esitare,* w’enanga eyiri ng’etriangle, w’ekyombo ky’omuziki ky’esyosinga, w’ekornemize,* n’ow’ebindi byombo by’omuziki, mwamabiwa ahisi n’eriramya esanamu eyo niryakokotaya, aho ikyuwene. Aliwe mwamabighana eriramyayo, imukendilw’imwaghuswa omo riko eririmo omuliro owakire kutsibu. Hane omungu oyo wangabasabula omo byala byaghe?”

16 Shadrake, Meshake, na Abednego mubasubirya omwami bati: “Nebukadneza, nibya si ky’omughaso erikusubirya oko mwatsi oyo. 17 Mwami, kyamabya ikitolere itwaghuswa omo riko eririmo omuliro owakire kutsibu, oMungu oyo tukakolera ali n’obutoki bw’eritusabula omo riko eryo n’eritusabula omo byala byaghu. 18 Aliwe nibya amatenditusabula, mwami, uminye ngoko sitwendikolera emiungu yaghu kutse eriramya esanamu y’ehoro eyo ulyasingyika.”

19 Neryo Nebukadneza mwahitana oko Shadrake, Meshake, na Abednego ko kutsibu erihika oko kika obusu bwiwe bwamahinduka, kandi mwabugha ati bahire omo riko mw’ekihuhania ngendo 7 kulenga ngoko babya ibabeghere erikola. 20 Mwabwira abaghuma b’oko basuda biwe b’amaka ati babohe Shadrake, Meshake, na Abednego, n’eribaghusa omo riko eririmo omuliro owakire kutsibu.

21 Neryo mubaboha abalume abo ibakinambite esyokanzu syabo, esyongyimba syabo, esyosapu syabo, n’esindi ngyimba syabo syosi, neryo bamabaghusa omo riko eririmo omuliro owakire kutsibu. 22 Ebyo omwami abugha byabya ibikalire n’eriko ryabya iryabirihuha kutsibu, neryo abalume abaghusa Shadrake, Meshake, na Abednego omo riko bo bahola omo birimi by’omuliro. 23 Aliwe abalume basatu abo, ye Shadrake, Meshake, na Abednego, mubatoghera omo riko eririmo omuliro owakire kutsibu ibanabohire.

24 Neryo omwami Nebukadneza mubaha kutsibu, amalw’iniahangana n’eribwira abakulu b’omo butabali bwiwe ati: “Si mutukaboha abalume basatu n’eribaghusa omo muliro!” Mubasubirya omwami bati: “Inga, mwami.” 25 Omwami mwabugha ati: “Ka namalangira abalume bani ibanemulaba-laba omo muliro isibabohire, kandi sibetahya, n’owakani ali ng’omughala w’emiungu.”

26 Nebukadneza mwaseghera hakuhi n’omulango w’eriko eryabyamo omuliro owakire kutsibu, neryo amabugha ati: “Shadrake, Meshake, na Abednego, inywe baghombe b’oMungu Ow’endata Kutsibu, mulue omo muliro n’eryasa hano!” Shadrake, Meshake, na Abednego mubalua omo muliro. 27 Abakulu b’esyongabiro,* abimaniri, abaguvernere, n’abakulu b’omo butabali b’omwami ababya bahindene aho mubalangira ngoko omuliro syetahisya emibiri y’abalume abo; nibya n’oluywiri n’olughuma l’oko mitwe yabo mulwatahya, esyokanzu syabo syabya isine ngoko sinalue, nibya sibabyako n’ekikumbo ky’omuliro.

28 Neryo Nebukadneza mwabugha ati: “OMungu wa Shadrake, Meshake, na Abednego, oyulyatuma omumalaika wiwe atoke erisabula abaghombe biwe, apipawe. Mubakayiketera iye, mubatitasikya omughambo w’omwami kandi mubakaligha erihola omo mwanya w’erikolera kutse eriramya oghundi mungu ate iyo Mungu wabo. 29 Neryo ngahiraho omughambo niti: Abandu bosi-bosi, ekihanda kyosi-kyosi, kutse abandu abakabugha omubughe wosi-wosi bamabibugha omwatsi mubi oko Mungu wa Shadrake, Meshake, na Abednego, batolere ibalusibwako ebitsuko by’oko mibiri yabo, na manyumba wabo iniayirwa mo hibine hy’abandu bosi,* kundi sihali oghundi mungu oyo wangatoka erisabula ng’oMungu oyu.”

30 Neryo omwami mwahira Shadrake, Meshake, na Abednego omo bitumbi by’endata* omo ngabiro* ye Babiloni.