Danieli

9 Omo mwaka w’erimbere wa Dario omughala wa Ahasuero—ow’omo lubuto lw’Abamedi oyo wayirawa mo mwami w’obwami bw’Abakaldayo—, 2 omo mwaka w’erimbere w’obutabali bwiwe, eritsopolya ebitabu* muryaniwatikya ingye Danieli eriminya emighanzo y’emyaka eyo Yehova abwira omuminyereri Yeremia ati ikendisyalaba omuyi we Yerusalema iniane matongo, ni bugha ambu emyaka 70. 3 Neryo munalolerya obusu bwaghe eyiri Yehova oMungu w’ekwenene, namamulemba-lemba omo musabe, namakola amafungo, n’amambala olukimba lw’esaki,* n’erikala omo ribu. 4 Munasaba Yehova oMungu waghe, namaungama, n’eribugha niti:

“Yehova oMungu w’ekwenene, oMungu mukulu kandi oyukasaghisaya, oyukasikaya endaghane yiwe n’erikangania olwanzo oluteleghula abamwanzire n’erisikya emighambo yiwe, 5 twabirikola amalolo, twabirikola amakosa, twabirikola ebibi, n’erighana erikwama obusondoli bwaghu; kandi sitwetakwama emighambo yaghu n’ebyalayiro byaghu. 6 Sitwetahulikirira abaghombe baghu abaminyereri, ababugha n’abami betu, abakulu betu, abotata-kulu wetu, n’abandu bosi b’omo kihugho omo rina ryaghu. 7 Yehova, iwe utunganene, aliwe itwe twabirihemuka, ngoko kiri munabwire, itwe bandu be Yuda, abikalani be Yerusalema, n’abandu bosi be Israeli abikere hakuhi n’abikere hali, omo bihugho byosi ebyo wabapanza-panziramo busana n’erileghula okw’iwe.

8 “Yehova, twabirihemuka, itwe, abami betu, abakulu betu, n’abotata-kulu wetu, kundi mutwakukolera erilolo. 9 Yehova, oMungu wetu, ukakwa obulighe kandi uli mughanyiri, kundi mutwaghana erikwama obusondoli bwaghu. 10 Mutwatakwama omulenge wa Yehova oMungu wetu kundi mutwatakwama emighambo yiwe eyo atuha erilabira abaghombe biwe abaminyereri. 11 Abaisraeli bosi mubatitasikya Emighambo yaghu kandi babirileghula omw’itendisikya omulenge waghu. Neryo wabiritutulirako eritakirwa n’erilapa erikanibweko omo Mighambo ya Musa omughombe w’oMungu w’ekwenene, kundi mutukakukolera erilolo. 12 Wabiriberererya emyatsi eyo wabugha uti ikendisyatuhikira n’erihikira abatabali abatutabala,* omw’ituletera obuhanya obukalire; oko kihugho kyosi sikwekwatabya omwatsi owakalire ng’owahikira omuyi we Yerusalema. 13 Obuhanya bosi obu bwabirituhikira, ngoko kihandikire omo Mighambo ya Musa, aliwe Yehova oMungu wetu, sitwetwatakulemba-lemba tuti utukanganaye olukogho,* omw’itsira ekosa yetu n’omw’isonda eriminya ndeke-ndeke ekwenene* yaghu.

14 “Neryo Yehova mwabya inianemuteya kandi mwatuletera obuhanya, kundi Yehova oMungu wetu atunganene omo byosi ebyo akakola; aliwe itwe mutwatakwama omulenge wiwe.

15 “Yehova oMungu wetu, iwe walusaya abandu baghu omo kihugho kye Misri omo byala by’amaka n’erikumayirya erina ryaghu erihika na munabwire, twabirikola erilolo n’erikola obubi. 16 Yehova, kundi ebyosi ebyo ukakola bitunganene, kisi lusaya ekinigha n’erihitana ryaghu rinene oko muyi waghu we Yerusalema, ekitwa kyaghu kibuyirire, kundi amalolo n’amakosa w’abotata-kulu wetu abirileka e Yerusalema n’abandu baghu ibabya kindu ky’erisekererya oko bandu bosi abatutimbireko. 17 Neryo lino, Mungu wetu, uhulikirire omusabe w’omughombe waghu n’emisabe yiwe y’erikulemba-lemba. Yehova, uleke obusu bwaghu bukoleraye ahabuyirire haghu ahali matongo, busana n’erina ryaghu. 18 Mungu waghe, uteghe okutu kwaghu, kandi uhulikire! Ukingule ameso waghu n’erilangira ngoko tuli omo hali eyikita obulighe kandi ulangire omuyi owaliko erina ryaghu, kundi si bugha ambu tukakulemba-lemba kundi tuli batunganene, aliwe tukakulemba-lemba kundi ukaghanyira kutsibu. 19 Yehova, uhulikirire. Yehova, ughanyire. Yehova, uhulikirire n’erikola! Mungu waghe, isiwatseleghawa busana n’erina ryaghu, kundi erina ryaghu ryabirihirwa oko muyi waghu n’oko bandu baghu.”

20 Omughulu nabya inikinabugha, erisaba, n’eriungama amakosa waghe n’amalolo w’abandu baghe Abaisraeli, n’omughulu nabya ngasaba niti Yehova oMungu waghe anikanganaye olukogho busana n’ekitwa kiwe kibuyirire, 21 omughulu nabya inikinasaba, omulume oyukahulawa mo Gabrieli, oyo nalangira embere omo nzoli, mwasa oho niri inabiriluha kutsibu; mwasa oho niri oko ndambi eyo bakahererako ekihembo ky’erigholo-gholo. 22 Mwaniwatikya eryowa emyatsi. Mwabugha ati:

“Danieli, lino namasa nitoke erikuha amenge n’erikuwatikya eryowa emyatsi. 23 Omughulu ulyatsuka omusabe waghu w’erilemba-lemba, mungabana omulaghe, neryo niryasa busana n’erisyakubwiragho, kundi uli mundu w’omughaso munene kutsibu.* Neryo uhulikirire omulaghe oyo n’eryowa amaana w’enzoli eyo.

24 “OMungu abirihiriraho abandu baghu n’omuyi waghu mubuyirire amayenga* 70, atoke eribughaho ekosa, eribughaho erilolo, erihanulira ekosa, erihiraho eritunganene rya kera na kera, erihira oko nzoli n’oko buminyereri* kw’akashe, n’erihira Ahabuyirire h’Ahabuyirie h’amaghuta.* 25 Litolere iwaminya n’eryowa omwatsi ono wo ndeke: Eritsuka omughulu bakendisyabugha bati e Yerusalema yitasyakokotibawa n’eritasyahimbwa erihika omughulu Masiya* Omusondoli akendisyahuluka, hakendisyabya amayenga 7, n’amayenga 62. Omuyi we Yerusalema akendisyatasyakokotibwa n’eritasyahimbwa, haghuma n’omwanya w’abandu bosi n’omughende, aliwe ebyo bikendisyabya omo mughulu w’obuhanya.

26 “Amayenga 62 akendisyabya abilaba, Masiya akendisyitibwa, sibendisyamusighira kindu.

“N’abasuda b’omusondoli oyukasa bakendisyatsandya omuyi n’ahabuyirire. N’eribwagha ry’amaghetse ryo rikendisyabughaho ahabuyirire. Kandi hakendisyabya amalwa erihika oko nduli; oMungu abiriyisogha ati hakendibya eritsandya.

27 “Kandi akendisyasigha endaghane y’oho omo yenga nguma busana n’abandu bangyi; eyenga ikendisyabya yahika omo kati-kati, iniabughagho amahere n’ebihembo.

“N’oyukatsandaya akendisyabya oko kipupa ky’emyatsi eyikita esyonye. N’ebyabirisohwa bikendisyutwa oko oyukatsandaya erihika omughulu w’eritsandya.”