Danieli
1 Omo mwaka w’akasatu w’obutabali bwa Yehoyakimu omwami we Yuda, omwami Nebukadneza we Babiloni mwahika e Yerusalema, amatimba kuyo atoke erilwa nayo. 2 Oko mughulu oyo, Yehova mwahira Yehoyakimu omo byala bya Nebukadneza, n’ebindu bilebe ebyabya omo nyumba* y’oMungu w’ekwenene. Mwatwalabyo omo nyumba y’omungu wiwe omo kihugho kye Shinari.* Mwahira ebindu ebyo omo kyumba ekyo bakabikamo ebindu by’obughuli by’omo nyumba* y’omungu wiwe.
3 Neryo omwami mwabwira Ashpenazi omukulu w’abakakolera oko bwikalo bwiwe ati alete Abaisraeli* balebe, alete n’ab’omo kihanda ekikaluamo abami n’esyoseghu-seghu. 4 Babya batolere ibabya balwana* abateko kahinira kosi-kosi, abuwene, abali n’amenge manene, abali n’obutoki bunene bw’eriminya emyatsi, abali n’obutoki bunene bw’eriyiteghererya n’abangatoka erikolera omo nyumba y’omwami. Ashpenazi abya atolere erikangiriryabo erihandika, n’eribugha omubughe w’Abakaldayo. 5 Kandi omwami mwabugha ati bakendibya bakalya oko bisi-bisi by’omwami n’erinywa oko divai eyo akanywa. Babya batolere ibakangiriribwa* omo myaka isatu, neryo omughulu oyo abihwa ibatsuka erikolera omwami.
6 Omw’ibo mwabya abandu balebe b’omo kihanda* kya Yuda. Mwabya Danieli,* Hanania,* Mishaeli,* na Azaria.* 7 Omukulu w’abakakolera oko bwikalo bw’omwami mwahabo awandi mena.* Mwaha Danieli y’erina rya Belteshaza, na Hanania mwamuha erya Shadrake, na Mishaeli amamuha erya Meshake, na Azaria amamuha erya Abed-Nego.
8 Aliwe Danieli mwayisogha omo mutima wiwe ngoko syendiyitsandya omo bisi-bisi by’omwami kutse omo divai eyo mwami akanywa. Neryo mwasaba omukulu w’abakakolera oko bwikalo b’omwami y’orughusa lw’eritendirya ebyalya ebyangalekire iniabya mundu oyuterire. 9 OMungu w’ekwenene mwaleka omukulu w’abakakolera oko bwikalo b’omwami iniakangania Danieli y’olukogho n’obughanyiri. 10 Aliwe omukulu w’abakakolera oko bwikalo b’omwami mwabwira Danieli ati: “Ngasagha busana n’omukama waghe kandi omwami waghe, oyo wabugha akalyo ako mutolere imwabya mukalya n’edivai eyo mutolere imwabya mukanywa. Bikendibya biti amabilangira ngoko simukyuwene ng’abandi balwana* ab’omo lubwa lwenyu? Byamabibya bitya, imukendileka inabyako* olubanza embere sy’omwami.” 11 Omukulu w’abakakolera oko bwikalo b’omwami mwahiraho omundu oyukendibya akateya Danieli, Hanania, Mishaeli na Azaria. Neryo Danieli mwabwira omuteya oyo ati: 12 “Kisi, ulenge oko baghombe baghu omo biro 10, kandi ubye ukatuha elegime yo tubye tukalya n’erituha amaghetse w’erinywa.” 13 Neryo ukendisyalebya nga situli ng’abandi balwana abakalya oko bisi-bisi by’omwami. Neryo ukendisyaminya eky’erikola erikwamana n’ebyo ukendisyalangira.”
14 Neryo omuteya oyo mwaligha ebyo bamubwira, mwabalengako omo biro 10. 15 Ebiro 10 mubyabya byabihwa, mubuwana kandi bamabya n’emibiri eyuwene kulenga ey’abalwana bosi ababya bakalya oko bisi-bisi by’omwami. 16 Neryo omuteya mwabya akabaha elegime omo mwanya w’eribya akabaha ebisi-bisi ebyo babugha ambu babye bakalya n’edivai eyo babugha ambu babye bakanywa. 17 OMungu w’ekwenene mwaha abalwana* bani abo b’obutoki bw’eriminya emyatsi, obutoki bw’eriyiteghererya ebihandiko mbiriri-mbiriri, kandi mwabaha n’amenge. Kandi oMungu mwaha Danieli y’obutoki bw’eriminya emihanda yosi y’esyonzoli esyo bandu bakalota n’erilangira.
18 Omughulu ogho mwami abugha ati bakendisyaletwa embere siwe babikangiriribwa abere abihika, omukulu w’abakakolera oko bwikalo b’omwami mwatwala abalwana abo embere sya Nebukadneza. 19 Omwami mwabya abikania nabo, mwalangira ngoko omo bosi simuli oyuli nga Danieli, Hanania, Mishaeli, na Azaria. Mubalola embere erikolera omwami. 20 Omwami iniakabya ababibulya oko mwatsi wosi-wosi owasabire amenge n’obutoki bw’eryowa emyatsi yo ndeke, iniakalangira ngoko bakalire ngendo 10 kulenga abahereri bosi abakakola obukumu n’abalaghuli bosi abali omo butabali bwiwe bosi. 21 Danieli mwasighala eyo erihika oko mwaka w’erimbere w’omwami Koreshi.