Danieli
10 Omo mwaka w’akasatu w’obutabali b’omwami Koreshi we Persia, Danieli oyo babya bakahula mo Belteshaza mwabisulirwa omwatsi mulebe, n’omwatsi oyo abya w’ekwenene, kandi abya akakangania ngoko hakendibya amalwa manene. Danieli mwowa amaana w’omwatsi oyo wo ndeke-ndeke, kandi mubamubwira ebyo alyalangira nga bikamaanisayaki.
2 Oko mughulu oyo, ingye Danieli, nabya inamabibugha amayenga asatu awahwererere inine omo kiriro. 3 Mundalya ekindu kyosi-kyosi ekyangahimba omubiri, mundalya enyama kutse erinywa edivai, kandi munabugha amayenga asatu awahwererere isindinatahira amaghuta w’oko mubiri. 4 Omo kiro kye 24 ky’omwisi w’erimbere, inine oko musike-sike w’olusi lunene, ni bugha ambu Olusi lwe Tigre,* 5 munasumba ameso waghe, namalangira omulume oyumbite esyongyimba sy’ekitani, kandi abya ambite omukaba w’ehoro ye Ufazi. 6 Omubiri wiwe abya ng’eribwe ry’ekrisolito, obusu bwiwe bwabya ng’ekyakakala, ameso wiwe abya ng’ehiti ehiriko ebirimi;* amaboko wiwe n’amaghulu wiwe abya ng’ekwivre* eyabiryeribwa, n’omulenge wiwe abya ng’omulenge w’abandu banene. 7 Ingye Danieli, ingye musa, ingye nalangira enzoli eyo; abalume ababya haghuma naghe mubatalangira enzoli eyo. Aliwe mubatitimana kutsibu, neryo mubatibita n’eriyayibisa.
8 Neryo munasighala ingyuwene. Omughulu nalangira enzoli eyo eyikaswekaya, akaghala kosi mukanihwamo, munatumba kutsibu, n’akaghala kaghe kosi mukanihwamo. 9 Enyuma sy’aho, munowa omulenge wiwe akakania; aliwe munabya nabyowa akakania, munakwa ehighotseri hinene obusu bwaghe ibune oko kitaka. 10 Enyuma sy’aho, ebyala mubyanitulako, byamanibukya nitoke erihanganira oko byala byaghe n’oko maru waghe. 11 Neryo mwanibwira ati:
“Danieli, iwe mundu w’omughaso munene kutsibu,* uhulikirire ndeke ebinywa ebyo ngakubwira. Neryo lino, hangana, kundi mubakanituma okw’iwe.”
Mwabya abinibwira atya, munahangana ininemutitimana.
12 Enyuma sy’aho, mwanibwira ati: “Danieli, sighusaghe. Eritsuka ekiro watsuka eriyisogha omo mutima waghu erisonda eriminya amaana w’emyatsi eyi n’eriyikehya embere sy’oMungu waghu, oMungu waghu mwowa ebinywa byaghu, n’ebinywa byaghu byo biryaleka inasa. 13 Aliwe omukulu w’obwami bwe Persia mwakalwa naghe omo biro 21. Nikwa Mikaeli,* omughuma w’oko bakulu b’embere-mbere,* mwakasyaniwatikaya; mungasighala aho hakuhi n’abami be Persia. 14 Niryasyakubwira ebikendisyahikira abandu baghu omo biro by’enduli, kundi enzoli eyo ikendisyaberera omo biro ebikasa.”
15 Mwabya abinibwira ebinywa ebyo, monunamirya obusu bwaghe bw’oko kitaka, namabya mumu. 16 Neryo omumalaika* oyo wabya asosire omundu mwatula oko minywa yaghe; munakingula obuno bwaghe, namabwira oyo wabya imene embere syaghe niti: “Mukama waghe, ninemutitimana busana n’enzoli eyo niryalangira, kandi sinikiwite kaghala. 17 Ingye mughombe w’omukama waghe, ngenditoka niti erikania naghu, iwe mukama waghe? Kundi lino sinikirimo kaghala, n’omuka abirinihwamo.”
18 Kandi omumalaika* oyo wabya asosire omundu mwanitulako, amanihiramo akaghala. 19 Enyuma sy’aho, mwanibwira ati: “Isiwasagha, iwe mundu w’omughaso munene kutsibu.* Ubye n’obuholo. Ubye n’akaghala, niti ubye n’akaghala.” Omughulu abya akakania naghe, munabyamo akaghala, neryo munabugha niti: “Mukama waghe, bugha, kundi wabirinihiramo akaghala.”
20 Enyuma sy’aho, mwanibwira ati: “Unasi ekiryaleka inasa eyo uli? Lino ngasubula busana n’eriyalwa n’omukulu we Persia. Ngendibya nabighenda, omukulu w’Obugiriki iniasa. 21 Aliwe ngendikubwira emyatsi eyihandikire omo kitabu ky’ekwenene. Sihali oyukaniwatikaya omo myatsi eyo, Mikaeli musa, omukulu* waghu, yukaniwatikaya.