Danieli

4 “Ono ni mulaghe owakalua oko mwami Nebukadneza. Akatumiragho abandu bosi, ebihanda byosi, n’abandu bosi abakabugha emibughe mbiriri-mbiriri abikere omo kihugho kyosi: Mubye n’obuholo bunene! 2 Nanzire eribaminyisya ebitiko-tiko n’emyatsi y’eriswekera eyo oMungu Ow’endata Kutsibu abirinikolera. 3 Ebitiko-tiko biwe ni bikulu, n’emyatsi yiwe y’eriswekera ni y’obutoki! Obwami bwiwe ni bwami bwa kera na kera, n’obutabali bwiwe bukendisyabyaho oko bizazi* byosi.

4 “Ingye Nebukadneza, nabya ininikere mbolere omo nyumba yaghe kandi nabya omo maisa aghuwene omo nyumba yaghe y’obwami. 5 Munalota enzoli eyaleka inasagha. Omughulu nabya ininaghotsere oko ngyingyo yaghe, ebyo nalangira n’esyonzoli syaghe mubyanisaghisya. 6 Neryo munabugha niti baniletere abalume bosi b’amenge be Babiloni batoke erinibwira ebyo niryalota nga bikamaanisayaki.

7 “Oko mughulu oyo, abahereri abakakola obukumu, abalaghuli, n’Abakaldayo,* n’abakalaghula omw’ilebya esyongununu mubasa. Omughulu nababwira ebyo niryalota, mubatatoka erinibwira nga bikamaanisayaki. 8 Oko mwiso, Danieli mwahika embere syaghe, Danieli oyo babya bakahula mo Belteshaza erikwamana n’erina ry’omungu waghe, kandi oyulimo ekirimu ky’emiungu mibuyirire. Neryo munamubwira ebyo niryalota.

9 “‘Belteshaza, omukulu w’abahereri abakakola obukumu, ninasi ndeke-ndeke ngoko ekirimu ky’emiungu mibuyirire kiri omw’iwe kandi ninasi ngoko sihali ekumbo eyo utewangatoka erikumbula. Neryo unibwire esyonzoli esyo niryalota n’amaana wasyo.

10 “‘Omo syonzoli esyo niryalota inine oko ngyingo yaghe, mungalangira omuti omo kati-kati k’ekihugho; alue muli kutsibu. 11 Omuti oyo mwakakula, amabya n’akaghala, n’akasweswe kagho kabya ikahikire elubula; omuti oyo abya iniakalangirika oko mipaka y’ekihugho kyosi. 12 Ebiti byagho byabya ibyuwene, kandi abyako amatunda mangyi, kandi abya inialiko akalyo k’abandu bosi n’ak’esyonyama syosi. Esyonyama sy’emoli syabya isikasyasondaya ekitsutsu omo ndina yagho, n’esyonyunyu sy’omo kyanya syabya isikikala oko bitahi byagho, n’ebihangyikwa* byosi ibikalya amatunda wagho.

13 “‘Omughulu nabya ngalota esyonzoli esyo inine oko ngyingo yaghe, munalangira omuteya, omubuyirire, akalua elubula. 14 Mwabugha omo mulenge muli ati: “Mukonde omuti oyo, mutweko n’ebitahi byagho, mulaghalaye ebiti byagho, n’eripanza-panza amatunda wagho! Esyonyama esiri omo ndina yagho sitibite, n’esyonyunyu esiri oko bitahi byagho sitibite. 15 Aliwe musighe ekisiki n’emilihi omo kitaka, omo biti by’emoli, kandi mubohere kukyo kw’ekyuma n’ekwivre.* Muleke ekimi ky’elubula kitsapayekyo, kandi muleke kisighale omo biti by’emoli, haghuma n’esyonyama. 16 Omutima wakyo abindulawe, isyabya ng’ow’omundu, kandi kihabawe omutima w’enyama, n’emighulu 7 yilabe. 17 Abateya bo balyabugha bati bibye bitya, n’ababuyirire bo balyasaba omwatsi oyo, abandu abaliho batoke eriminya ngoko Ow’endata Kutsibu ni Mutabali omo bwami bw’abandu kandi ngoko akahabo oyo anzire, kandi ngoko akahabo n’omundu w’ahisi kutsibu w’omo bandu.”

18 “‘Eyo y’enzoli eyo ingye mwami Nebukadneza niryalota. Neryo iwe Belteshaza, unibwire nga ikamaanisayaki, kundi abandi balume bosi b’amenge b’omo bwami bwaghe sibetatoka erinibwira nga ikamaanisayaki. Aliwe iwe ukenditoka, kundi ekirimu ky’emiungu mibuyirire kiri omw’iwe.’

19 “Neryo Danieli, oyo babya bakahula mo Belteshaza, mwakukubala omo katambi kake, neryo mwatsuka erisagha busana n’ebyabya bikalaba omo mutwe wiwe.

“Omwami mwabugha ati, ‘Belteshaza, enzoli n’amaana wayo isibyakusaghisaya.’

“Belteshaza mwasubirya ati, ‘Mukama waghe, enzoli eyo yibererere oko abakuponire, n’amaana wayo abererere oko syonzighu syaghu.

20 “‘Omuti ogho ulyalangira, owalyabya munene n’eribya n’akaghala, ogho kasweswe kagho kalyahika elubula n’owabya akalangirika omo kihugho kyosi, 21 owalueko ebiti ebyuwene, amatunda manene, n’akalyo k’abandu bosi n’esyonyama syosi, ogho esyonyama sy’emoli syabya isikikala omo ndina yagho, n’ogho esyonyunyu sy’omo kyanya syabya isikikala oko bitahi byagho, 22 omuti oyo n’iwe mwami, kundi wabiribya mukulu n’eribya n’akaghala, n’obukulu bwaghu bwabiribya bunene n’erihika elubula, n’obutabali bwaghu bwabirihika oko mipaka y’ekihugho.

23 “‘Kandi omwami mwalangira omuteya, omubuyirire, akalua elubula. Omuteya oyo mwabugha ati: “Mukonde omuti oyo n’eritsandyagho, aliwe musighe ekisiki n’emilihi omo kitaka, omo biti by’emoli, kandi mubohere kukyo kw’ekyuma n’ekwivre.* Muleke ekimi ky’elubula kitsapayekyo, kandi muleke kisighale haghuma n’esyonyama sy’emoli erihika omughulu emighulu 7 ikendilaba.” 24 Mwami, amaana w’enzoli eyo y’emyatsi eyo Ow’endata Kutsibu abiriyisogha ati yikendihikira omukama waghe kandi omwami waghe. 25 Ukenditibitwako omo bandu, neryo ukendiyikala haghuma n’esyonyama sy’emoli, kandi ukendibya ukahabwa ebiti n’eriryabyo ng’esyonume sy’esyonde; kandi ekimi ky’elubula kikendikutsapya, kandi hakendisyalaba emighulu 7, erihika omughulu ukendisyaminya ngoko Ow’endata Kutsibu ni Mutabali omo bwami bw’abandu kandi ngoko akahabo oyo anzire.

26 “‘Aliwe kundi mubakabugha bati ekisiki n’emilihi y’omuti oyo bisighale, ukendisyasyasubira obwami bwaghu wabiminya ngoko olubula lo lukatabala. 27 Neryo, mwami waghe, ulighe erihano eryo ngakuha. Uleke amalolo waghu neryo ukole ebyuwene; uleke obubi bwaghu neryo ukwire abera b’obulighe. Kwa muhwa wanganatasyatsemera engebe yaghu omo mughulu muli.’”

28 Ebyosi ebyo mubyahikira omwami Nebukadneza.

29 Emisi 12 yabere yabilaba, omughulu abya akalaba-laba oko lutwe lw’enyumba y’obwami ye Babiloni, 30 omwami abya akabugha ati: “Eno si ye Babiloni Mukulu, omuyi ogho ingyuwene-wene nahimba omo kaghala kaghe n’omo butoki bwaghe atoke eribya nyumba y’obwami n’olukengerwa lw’obukulu bwaghe?”

31 Omwami iniakinabugha ebinywa ebyo, omulenge mwasira elubula, amabugha ati: “Mwami Nebukadneza, omulaghe ono ni waghu: ‘Wabirisaghulwa obwami, 32 kandi ukenditibitwako omo bandu. Ukendikala haghuma n’esyonyama sy’emoli, kandi ukendibya ukahabwa ebiti n’eriryabyo ng’esyonume sy’esyonde, n’emighulu 7 ikendilaba, erihika omughulu ukendisyaminya ngoko Ow’endata Kutsibu ni Mutabali omo bwami bw’abandu kandi ngoko akahabo oyo anzire.’”

33 Oko ndambi eyo nyisa-nyisa, ebinywa ebyo mubyabererera oko Nebukadneza. Mubamutibitako omo bandu, amatsuka eribya akalya ebiti ng’esyonume sy’esyonde, n’ekimi ky’elubula mukyatsapya omubiri wiwe, erihika oko kika esyonzwiri siwe syamabya nyiri-nyiri ng’ebipupa by’amasamba n’esyonyala siwe syamabya ng’esyonyala sy’ehinyunyu.

34 “Omughulu oyo abere abihwa, ingye Nebukadneza munasamalira elubula, n’obwenge bwaghe mubwasubamo. Neryo munapipa Ow’endata Kutsibu, kandi munapipa n’eriha olukengerwa lw’oMungu oyuliho kera na kera, kundi obutabali bwiwe ni butabali bwa kera na kera n’obwami bwiwe bukendisyabyaho omo bizazi* byosi. 35 Abikalani bosi b’oko kihugho si kindu embere siwe, kandi akakola ngoko anzire omo kati-kati k’abamalaika b’elubula n’omo kati-kati k’abikalani b’oko kihugho. Sihali oyo wangamukakirya kutse erimubwira ati, ‘Mughukakola ki?’

36 “Oko mughulu oyo, obwenge bwaghe mubwasubamo, kandi munatasyabya n’olukengerwa lw’obwami bwaghe, obukulu bwaghe, n’obusike bwaghe. Abakulu b’omo butabali bwaghe n’esyoseghu-seghu mubanisondya-sondya n’omuhwa. Munatasyasubira obwami bwaghe, kandi namayirwa mo mukulu kulenga ngoko nabya aho mbere.

37 “Neryo lino, ingye Nebukadneza, ngapipa, ngahalamba, n’eriha olukengerwa Omwami w’elubula, kundi ebyosi ebyo akakola ni by’ekwenene n’esyonzira siwe situnganene, kandi kundi ali n’obutoki bw’erisubya ahisi abakayiheka.”