Danieli

12 “Oko mughulu oyo, Mikaeli* akendisyahangana,* omukulu oyukalwira oko bandu baghu.* Hakendisyabya omughulu w’obuhanya owate atabya eritsuka omughulu habya isihehatabya ekihanda kyosi-kyosi n’erihika oko mughulu oyo. N’oko mughulu oyo, abandu baghu bakendisyabala, abandu bosi abo amena wabo ahandikire omo kitabu. 2 N’abandu bosi abaghotsere omo lututu l’oko kihugho bakendisyabuka, abandi bakendisyabuka busana n’erihabwa engebe y’erikota n’abandi busana n’erihemuka n’eripokibwa kera na kera.

3 “Abandu b’amenge bakendisyakangabasania ng’ekyanya, n’abakawatikaya abandu bangyi eribya batunganene bakendisyakangabasania ng’esyongununu, kera na kera.

4 “Aliwe iwe Danieli, isiwabisula ebinywa ebyo, kandi uhire oko kitabu kw’akashe erihika oko mughulu w’enduli. Abandu bangyi bakendisyaya eyi n’eyi,* n’eriminya emyatsi y’ekwenene rikendisyakanyirira.”

5 Neryo ingye Danieli, munalangira abandi bandu babiri ibanimene aho, omughuma abya inianimene oko musike ono w’olusi n’oghundi abya inianimene oko ghundi musike w’olusi. 6 Neryo omughuma wa kubo mwabwira omulume oyo wabya ambite olukimba lw’ekitani, oyo wabya endata oko maghetse w’olusi, ati: “Hakisiya omughulu mungahi emyasi y’eriswekya eyi imoyahika oko nduli?” 7 Enyuma sy’aho, munowa omulenge w’omulume oyo wabya ambite olukimbwa lw’ekitani, oyo wabya endata oko maghetse w’olusi. Mwasumbira ebyala biwe by’amali n’eby’amalembe by’elubula n’erilapa omo rina ry’Oyuliho kera na kera ati: “Hakendisyalaba omughulu mughuma owabirihirwaho, emighulu eyabirihirwaho, n’enusu y’omughulu.* Akaghala k’ababuyirire kakendisyabya kabinatsutsangwa, emyatsi yosi eyo ikendisyahwa.”

8 Ingye Danieli, munowa, aliwe munataminya nga bikamaanisayaki; neryo munabugha niti: “Mukama waghe, oko nduli, emyatsi ikendisyabya yiti?”

9 Neryo mwanibwira ati: “Danieli, ghenda, kundi ebinywa ebyo sibitolere bikabisulwa kandi bitolere ibyahirwako akashe erihika oko mughulu w’enduli. 10 Abandu bangyi bakendisyayerya, bakendisyayiyira mo b’omusohe,* n’erilusibwako omutsafu. N’ababi bakendisyakola omo bubi, sihali n’omubi oyukendisyowa amaana w’emyatsi eyo; aliwe abandu b’amenge bakendisyowa amaana wayo.

11 “Eritsuka omughulu obuhere obukahererawa mughulu wosi bwalusibawaho n’eritsuka omughulu ekindu ekikita esyonye ekikatoghotaya kyahirawaho, hakendisyalaba ebiro 1 290.

12 “Oyukabya inianemulindirira* n’erihika oko mwiso w’ebiro 1 335 atsemire!

13 “Aliwe iwe, ubye mutaleghula erihika oko mwiso. Ukendisyaluhuka, aliwe oko mwiso w’ebiro, ukendisyahangana busana n’erihabwa ekiharo* kyaghu.”