Emibiiri y’Abakwenda
21 Twabere twabitoka eriyilusya kubo, mutwingira omo bwato, twamaghenda butsir’ikita, twamahika e Kose. Ekiro ekikwamire, twamahika e Rode, n’eriluaho, twamaya e Patara. 2 Twabere twabisunga obwato obwabya bukaya e Foiniki, mutwasambiramo n’erighenda. 3 Mutwabya twabilangira ekisanga* kye Kipro, mutwasighakyo oko lundi luhande, neryo twamalolera oko luhande lw’amalembe, twamalolera e Siria, n’enyuma sy’aho twamayimana e Tiro, eyo bangalusirye emizigo omo bwato. 4 Mutwasondya abigha. Neryo twabere twabisungabo, twamabughaho ebiro birinda (7). Aliwe, busana n’ebyo kirimu kibuyirire kyababisulira, mubabya bakabwira Paulo yo kangyi-kangyi ambu isyanatapima erilyata e Yerusalema. 5 Ebiro ebyo twabya tupangire eribughayo byabere byabihwa, mutwaluayo neryo twamaendelea n’olughendo lwetu. Abosi, abalume, abakali, n’abana mubatukwamanisya, bamatuhikya eyihya w’omuyi. Twabere twabihika oko musike w’engetse,* twamakukama n’erisaba. 6 N’enyuma sy’aho, mutwalaghana, neryo mutwingira omo bwato, nabo bamasuba ewabo.
7 Neryo mutwalua e Tiro y’omo bwato, twamahika e Tolemai. Mutwaramukya abaghala betu b’eyo, twamabugha nabo ekiro kighuma. 8 Ekiro ekikwamire, mutwaghenda, twamahika e Kaisaria. Neryo mutwingira omo nyumba ya Filipo, omuhubiri w’engulu mbuya. Abya mughuma w’oko balume irinda (7). Mutwasighala aho wiwe. 9 Abya n’abali biwe bani ababya isibatahibwe,* ababya bakabugha obuminyereri. 10 Twabere twabibughaho ebiro binene, omuminyereri oyukahulawamo Agabo, mwalua e Yudea. 11 Mwasyatubana, neryo amimya omukaba wa Paulo, amaboha mw’ebisando n’ebyala biwe, n’eribugha ati: “Ekirimu kibuyirire kikabugha kiti, ‘Omwinye omukaba ono kw’akendibohwa atya n’Abayahudi e Yerusalema, kandi bakendimuhira omo byala by’abandu b’ebihanda.’” 12 Twabere twabiowa ekyo, itwe n’abandi ababyaho, mutwatsuka erimulemba-lemba tuti isyahetukira e Yerusalema. 13 Aliwe, Paulo mwamusubirya ati: “Busanaki mukalira kandi busanaki mukasonda erinibuna mutima? Muminye ndeke-ndeke ngoko nine tayari eribohwa nibya n’eriholera e Yerusalema busana n’erina ry’Omukama Yesu.” 14 Twabere twabimutalukako, twamaleka erimuhatikana,* twamabugha tuti: “Erisonda rya Yehova* rikoleke.”
15 Neryo ebiro ebyo byabere byabilaba, mutwateghekania olughendo, neryo twamaghenda e Yerusalema. 16 Abigha balebe be Kaisaria mubaghenda netu, bamatutwala ewa Mnasoni we Kipro. Abya w’oko bigha b’erimbere-mbere. Mutwasighala aho wiwe. 17 Twabere twabihika e Yerusalema, abigha mubatukokya n’obutseme. 18 Ekiro ekikwamire, Paulo mwaghenda netu ewa Yakobo. Abasyakulu bosi babya ibaneyo. 19 Abere abiramukyabo, amatsuka erikaniryabo emyatsi mingyi eyo Mungu alyakola omo kati-kati k’ebihanda erilabira omubiiri wiwe w’erihubirya.
20 Babere babyowa emyatsi eyo, mubatsuka eripipa oMungu. Aliwe, mubamubwira bati: “Hano hali amaelfu w’Abayahudi ababirikirirya, kandi abosi bakakwama Emighambo yo kutsibu. 21 Aliwe, babiryowa ambu unemukangirirya Abayahudi bosi omo kati-kati k’ebihanda uti baleke erikwama Emighambo ya Musa, omw’ibabwira uti isibabanaya abana babo, kandi uti isibakwama emyatsi eyo Abayahudi babeghere erikola. 22 Neryo ritolere iwakolaki? Oko kwenene, sibendibula eryowa ngoko wabirihika. 23 Neryo ukole ekyo tukakubwira: Tuli n’abalume bani ababiriyilagha.* 24 Uyeraye haghuma nabo erikwamana n’Emighambo, kandi ulihirebo batoke erisiswa, neryo abandu bosi bakendiminya ngoko ebyo balue bakakubughako si kwenene. Aliwe, bakendiminya ngoko unemuyighendya ndeke n’erikwama Emighambo. 25 Aliwe, oko mwatsi owalebirye abandu b’ebihanda ababirikirirya, twabiribatumira ebaruha eyiri mw’ebyo tulyayisogha. Mutwabahandikira tuti bayihighule oko biryahererawa oko syosanamu, bayihighule oko musasi, oko nyama eyiryanyolawa,* n’oko buraghane.”*
26 Ekiro ekikwamire, Paulo mwaghenda n’abalume abo, amayerya iye haghuma nabo erikwamana n’Emighambo, n’enyuma sy’aho amingira omo hekalu eriyabugha ebiro by’eriyerya nga bikendihwa mughulu wahi kandi nga ni kiro ki kyo ritolere ibateka ekihembo busana n’obuli mughuma wa kubo.
27 Aliwe, ebiro birinda (7) byabere bikasonda erihwa, Abayahudi be Azia mubamulangira omo hekalu. Neryo mubatsotsya abandu bosi bamayahamba Paulo. 28 Babya bakabugha bati: “Balume be Israeli, mutuwatikaye! Ono yo mulume oyunemukangirirya abandu bosi b’ehosi-hosi emyatsi eyikalwa n’ekihanda kyetu, eyikalwa n’Emighambo, n’eyikalwa n’omwanya ono owabuyirire. Kandi nibya abiringirya n’Abagiriki b’omo hekalu n’eritsandya omwanya ono owabuyirire. 29 Embere sy’aho, mubamulangira omo muyi iniane na Trofimo Omunya Efeso. Neryo ekyo mukyaleka ibalengekania bati alinga Paulo mwakingira naye omo hekalu. 30 Omuyi wosi mwabyamo efuyo n’abandu bosi mubatibita eyiri Paulo, bamamuhamba, n’erimukurubanira ehihya w’ehekalu, n’erilw’ibakinga emilango y’ehekalu. 31 Omughulu basonda eriita Paulo, omukomanda mwowa ngoko e Yerusalema yosi yabiribyamo efuyo. 32 Aho n’aho mwimya abasuda n’abakulu b’abasuda. Mubandaghalira eyiri abandu ibanemutibita. Abandu babere babilangira omukomanda haghuma n’abasuda, mubaleka erihunza Paulo.
33 Neryo omukomanda w’abasuda mwahikaho, amabugha ati bahambe Paulo, kandi ati bamubohe omo minyororo ibiri. N’enyuma sy’aho, mwabulya Paulo nga nindi, kandi nga mwakakolaki. 34 Aliwe omo kati-kati k’abandu, mwabya abandu ababya bakabugha kino n’abandi ibabugha kirya. Busana n’efuyo y’abandu, omukomanda mwatatoka eriminya ekiryabya nga niki. Neryo mwabugha ati batwale Paulo ahali ekambi y’abasuda. 35 Aliwe, omughulu Paulo ahika oko mimbari, abasuda mubalangira ikitolere erimuheka kusangwa abandu babya ibabiritsuruma kutsibu. 36 Kundi abandu babya ibanemubakwama ibanemubugha omo mulenge muli bati: “Akwe!”
37 Babere bakasonda erimwingirya omo kambi y’abasuda, Paulo mwabulya omukomanda ati: “Nanganakania naghu?” Omukomanda mwamusubirya ati: “Ukanabugha Ekigiriki? 38 Siwe Mumisri oyo hamabilaba ebiro bilebe, mwatsukisya omulele n’eritwala abandu 4 000 ababya bahekire emiyali omo mbwarara?” 39 Paulo mwamusubirya ati: “Oko kwenene, niri Muyahudi we Tarso ye Kilikia. Niri mukalani w’omo muyi owasibwe. Neryo kisi, nanzire inakania n’abandu.” 40 Omukomanda mwamuhamula erikania n’abandu. Neryo Paulo mwahangana oko mimbari, mwabwira abandu omo byala ati bahune. Mubabya babihuna, amabugha nabo omo mubughe w’Ekiebrania ati: