Ebaruha oko Abaebrania
8 Neryo enzumwa y’emyatsi eyo tukabugha yeno: Tuwite omuhereri mukulu oyo, kandi abirikala oko luhande lw’amali lw’ekitumbi ky’obwami ky’oMungu Mukulu omo lubula. 2 Ni mughombe* oyukakolera ahabuyirire, n’omo hema y’ekwenene eyo Yehova* ahiraho, butsira omundu. 3 Kundi obuli muhereri mukulu akahirawaho busana n’eriherera ebihembo n’amahere, neryo kyabya kitolere n’omuhereri mukulu oyu naye iniabya n’ekindu ky’eriherera. 4 Angabere oko kihugho, syangabere muhereri, kundi habya ihabiribya abandu abakaherera ebihembo erikwamana n’Emighambo. 5 Abandu abo bakakolera omubiiri mubuyirire omo kisosekanio n’ekitsutsu ky’emyatsi y’elubula, ngoko ekyalayiro kino ekyo Mungu aha Musa omughulu Musa asonda erihimba ehema kikakanganaya. Mwamubwira ati: “Ukole emyatsi yosi ngoko niryakukanganaya oko kitwa.” 6 Aliwe lino, Yesu abiribana omubiiri* owuwene kutsibu, kundi kandi ni musangania w’erilaghana eryuwene kwilaba ery’ahombere, erilaghana eri ryahirawaho erilabira Emighambo, kandi risikire ndeke.
7 Erilaghana ry’erimbere nga ritabya n’obulema, sitwangalaghire oko ry’akabiri. 8 Kundi akasunga oko bandu k’obulema omughulu akabugha ati: “‘Omo biro ebikasa,’ Yehova* atya, ‘ngendisyakola endaghane nyihya-nyihya n’enyumba ye Israeli n’enyumba ye Yuda. 9 Endaghane eyo siyendisyabya ng’eyo nakola n’abo tata-kulu wabo ekiro nahambabo oko byala nitoke eribalusya omo kihugho kye Misri. Kundi mubatasikya endaghane yaghe, munatasyatsomanabo,’ Yehova* atya.
10 “‘Kundi eno y’endaghane eyo ngendisyakola n’enyumba ye Israeli enyuma sy’ebiro ebyo,’ Yehova* atya, ‘ngendisyahira emighambo yaghe omo bwenge bwabo, kandi ngendisyahandikayo omo mitima yabo. Ngendisyabya Mungu wabo, nabo bakendisyabya bandu baghe.
11 “‘Kandi sihendisyabya omundu oyukendisyasyabya akakangirirya omukalani nga ye, kutse omulikyabo ati: “Uminye Yehova!”* Kundi abosi bakendisyaniminya, eritsuka oko mulere erihika oko mukulu. 12 Ngendisyaghanyira ebibi byabo, kandi sinendisyasyibuka amalolo wabo.’”
13 Omughulu akabugha ati “erilaghana rihya-rihya,” akabya iniakakanganaya ngoko erya kera ryamabilaba. Ngoko twasi ekindu ekyabirilaba n’ekinemukula kikabya ikiri okw’ihwaho.