Zekaria

8 Kandi Yehova w’emilondo mwakania naghe, amanibwira ati: 2 “Yehova w’emilondo ati, ‘Ngendilwira oko Sioni n’omuhwa munene. Ngendimulwirako n’omuhwa, kandi omo buhitane bunene.’”

3 “Yehova ati, ‘Ngendisyasuba e Sioni n’erikala e Yerusalema. Yerusalema akendisyahulwa mo muyi w’ekwenene,* n’ekitwa kya Yehova w’emilondo kikendisyahulwa mo kitwa kibuyirire.’”

4 “Yehova w’emilondo ati, ‘Abasyakulu n’abakekulu bakendisyatasyikala omo myanya y’abandu bosi e Yerusalema, obuli mughuma wa kubo iniane n’omutso wiwe omo byala biwe busana n’erikekeluha.* 5 Emyanya y’abandu bosi y’omuyi ikendusyusulamo abalwana n’abambesa ibanemutsangiramo.’”

6 “Yehova w’emilondo ati, ‘Oko mughulu oyo, abakendisyasighalira b’oko bandu aba bakendisyalengekania bati ekyo sikyangatokekana, aliwe ingye nanganabugha niti ekyo sikyangatokekana?’ Yehova w’emilondo atya.”

7 “Yehova w’emilondo ati, ‘Ngendisabula abandu baghe n’erilusyabo omo bihugho by’oko luhande lw’eyo ryuba rikasira n’eby’oko luhande lw’eyo ryuba rikalengera. 8 Ngendisyabaleta e Yerusalema, neryo bakendisyikalayo; bakendisyabya bandu baghe, naghe ngendisyabya oMungu wabo ow’ekwenene* n’oyutunganene.’”

9 “Yehova w’emilondo ati, ‘Musike,* inywe mukahulikirira munabwire ebinywa ebi ebikalua omo buno bw’abaminyereri, ebinywa bighumerera ebyabughawa ekiro efondasyo y’enyumba ya Yehova w’emilondo yahirawaho busana n’obuhimbe bw’ehekalu. 10 Embere sy’aho, isibaliha abandu kutse esyonyama sy’omusahara; erighenda n’erisubula ihali ehatari busana n’enzighu, kundi munaleka abosi ibaponana.’

11 “‘Aliwe eritsuka lino, sinendikolera abalyasighalira b’oko bandu baghe ngoko nakolerabo embere,’ Yehova w’emilondo atya. 12 ‘Kundi embuto y’obuholo ikendisyaherwa; omuti w’omuzabibu akendisyasako amatunda, ekitaka kikendisyerako akalyo, n’olubula lukendisyaleta ekimi kyalo. Emyatsi yosi eyo ngendisyahayo abakendisyasighalira b’oko bandu aba mo mwandu. 13 Kandi ngoko mwabya ekindu ky’eritakirwa omo kati-kati k’ebihanda, inywe kihanda kya Yuda n’ekihanda kya Israeli, kutya ngendisyabasabula, kandi mukendisyabya muyisa. Simusaghe! Musike.’*

14 “Kundi Yehova w’emilondo ati, ‘“Ngoko nayisogha eribaletera obuhanya kundi abotata-kulu wenyu mubanihitania kutsibu,” Yehova w’emilondo atya, “kandi ngoko natayikubaya bomo, 15 kutya lino nabiriyisogha erikolera abandu be Yerusalema n’ekihanda kye Yuda ebyuwene. Simusaghe!”’

16 “‘Bino byo mutolere imwakola: Mubye mukabwirana ekwenene; n’omughulu mukatwira ebinywa oko milango y’omuyi, mubye mukatwabyo omo nzira eyikendileka ihabya ihane ekwenene n’obuholo. 17 Isimwabya mukasoherana erikolerana obubi omo mitima yenyu, kandi isimwanza erilapa ry’amabehi; kundi niponire emyatsi yosi eyo,’ Yehova atya.”

18 Kandi Yehova w’emilondo mwakania naghe, amanibwira ati: 19 “Yehova w’emilondo ati, ‘Amafungo w’oko mwisi w’akani, w’oko mwisi w’akatano, w’oko mwisi we 7, w’oko mwisi we 10, akendisyabya mughulu w’eriyisyandira n’eritsema oko bandu be Yuda, bikendisyabya biro bikulu by’obutseme. Neryo mwanze ekwenene n’obuholo.’

20 “Yehova w’emilondo ati, ‘Nomo bine bitya, abandu n’abikalani b’omo miyi mingyi bakendisyasa. 21 Abikalani b’omo muyi mughuma bakendisyaya eyiri abikalani b’omo ghundi muyi n’eribabwira bati: “Mwase, tuyalembe-lembe Yehova atoke eritukangania olukogho.* Tuyasonde-sonde Yehova w’emilondo. Itwe tunemuyayo.” 22 Abandu bangyi n’ebihanda ebiwite akaghala bikendisyasa bikasyasondya-sondya Yehova w’emilondo e Yerusalema, n’erilemba-lemba Yehova atoke eribakangania olukogho.’*

23 “Yehova w’emilondo ati, ‘Oko mughulu oyo, abandu 10 b’omo mibughe yosi y’ebihanda bakendisyamakirira, bakendisyamakirira kutsibu olukimba lw’Omuyahudi, n’eribugha bati: “Twanzire erighenda nenyu, kundi twabiryowa ngoko oMungu ane haghuma nenyu.”’”