Hagai
1 Omo mwaka w’akabiri w’obutabali bwa Dario, ekiro ky’erimbere ky’omwisi we 6, Yehova mwatuma omuminyereri Hagai* ati ayabwire ekinywa kiwe ky’omuguvernere we Yuda, ye Zerubabeli mughala wa Salatieli, n’omuhereri mukulu, ye Yosua mughala wa Yehozadaki. Mwababwira ati:
2 “Yehova w’emilondo ati, ‘Abandu bakabugha bati, “Endambi y’erihimba* enyumba* ya Yehova siyeyahika.”’”
3 Omuminyereri Hagai mwaendelea eribugha ekinywa kya Yehova, mwabugha ati: 4 “Eno y’en’endambi y’erikala omo manyumba awaswikireko esyombagho, enyumba eyi iyine bisambukalirya? 5 Neryo, Yehova w’emilondo ati: ‘Mulengekanaye kutsibu oko hali eyo mulimo.* 6 Mwabiribya mukahera embuto nene, aliwe imwasoloma bike. Mukalya, aliwe simulyughuta. Mukanywa, aliwe enyota yenyu iyitahwa. Mukambala esyongyimba, aliwe simulihuha. Oyukakola omubiiri w’erilihwa, akahira omusahara wiwe omo mufuko owatobongokire.’”
7 “Yehova w’emilondo ati: ‘Mulengekanaye kutsibu oko hali eyo mulimo.’*
8 “‘Muhetukire oko kitwa, mulete emiti, muhimbe enyumba nitoke eritsemerayo kandi nitoke eripipwa,’ Yehova atya.”
9 “‘Mwabya mukalindirira eribana bingyi, aliwe mumwabana bike; kandi mumwabya mwabitwalabyo ewenyu, namabuliraniabyo omw’ibuhirirabyo. Busanaki?’ Yehova w’emilondo atya. ‘Kundi enyumba yaghe yabiribya bisambukalirya, aliwe obuli mughuma w’okw’inywe inianemuyikandanga kutsibu atoke erisugha enyumba yiwe. 10 Ekyo kyo kyabirileka olubula ilwataleta ekimi, n’ekitaka ekyaterya akalyo. 11 Munataleka eribirikira ekipwa niti kyase oko kihugho, oko bitwa, oko ngano, oko divai nyihya-nyihya, oko maghuta, oko ebikera oko kitaka, oko bandu n’esyonyama, n’oko mubiiri wosi owakalire ogho mukakola.’”
12 Zerubabeli mughala wa Salatieli, n’omuhereri mukulu Yosua mughala wa Yehozadaki, n’abandi bandu bosi mubowa omulenge wa Yehova oMungu wabo n’ebinywa by’omuminyereri Hagai, kundi Yehova oMungu wabo yo wamutuma; abandu mubatsuka eryubaha Yehova.
13 Neryo Hagai, omutumwa wa Yehova, erikwamana n’omubiiri ogho Yehova amuha, mwabwira abandu ati: “‘Nine haghuma nenyu,’ Yehova atya.”
14 Neryo Yehova mwabukya ekirimu ky’omuguvernere we Yuda, ye Zerubabeli mughala wa Salatieli, n’ekirimu ky’omuhereri mukulu, ye Yosua mughala wa Yehozadaki, n’ekirmu ky’abandi bandu bosi; neryo bamasa n’eritsuka erihimba enyumba ya Yehova w’emilondo, oMungu wabo. 15 Ebyo byabya ekiro 24 ky’omwisi we 6, omo mwaka w’akabiri w’obutabali bw’omwami Dario.