Zekaria
1 Omo mwaka w’akabiri w’obutabali bwa Dario, oko mwisi we 8, Yehova mwakania n’omuminyereri Zekaria,* mughala wa Berekia, mughala wa Ido. Mwamubwira ati: 2 “Yehova mwahitana kutsibu oko bobaba wenyu.
3 “Ubabwire uti, ‘Yehova w’emilondo ati: “‘Munisubire,’ Yehova w’emilondo atya, ‘Naghe ngendibasubira,’ Yehova w’emilondo atya.”’
4 “‘Simubye ng’abobaba wenyu, abo abaminyereri babwira kera bati: “Yehova w’emilondo ati, ‘Kisi muleke erikola ebibi, muleke n’emikolere yenyu mibi.’”’
“‘Aliwe mubatowa, kandi mubatanitsomana,’ Yehova atya.
5 “‘Abobaba wenyu bali hayi lino? N’abaminyereri mubanabyaho kera na kera? 6 Abobaba wenyu mubayilangirira ebinywa n’ebyalayiro ebyo nabugha erilabira abaghombe baghe abaminyereri bikabererera, ko bite bitya?’ Neryo mubanisubira, bamabugha bati: ‘Yehova w’emilondo mwakatukolera erikwamana n’emighendere yetu n’emikolere yetu, ngoko anayisogha.’”
7 Ekiro 24 ky’omwisi we 11, ni bugha ambu, omwisi we Shebati,* oko mwaka w’akabiri w’obutabali bwa Dario, Yehova mwakania n’omuminyereri Zekaria, mughala wa Berekia, mughala wa Ido, mwamubwira ati abughe ati: 8 “Mungalangira enzoli omo kiro. Mungalangira omulume iniane oko sabayiri* y’erangyi y’omusasi. Omulume oyo mwakimana omo kati-kati k’emiti y’omuhadasi omo ngwangwa. Enyuma siwe, halue esyosabayiri sy’erangyi y’omusasi, esyeru, n’esy’omusohe.”*
9 Neryo munabulya niti: “Mukama waghe, aba ni bahi?”
Omumalaika oyo wabya akakania naghe mwanisubirya ati: “Ngendikubwira abo nga ni bahi.”
10 Enyuma sy’aho, omulume oyo wabya wimene omo kati-kati k’emiti y’omuhadasi mwanibwira ati: “Aba bo Yehova alyatuma bayalabe-labe omo kihugho.” 11 Neryo mubabwira omumalaika wa Yehova oyo wabya imene omo kati-kati k’emiti y’omuhadasi bati: “Mutukalaba-laba omo kihugho, mutukalangira ngoko ekihugho kyosi kitulere kandi sikirimo buna-buna.”
12 Neryo omumalaika wa Yehova mwabugha ati: “Yehova w’emilondo, erihika mughulu wahi ukendighana erighanyira omuyi we Yerusalema n’emiyi ye Yuda, eyo wabirihitanako kutsibu omo myaka 70 eyi?”
13 Yehova mwasubirya omumalaika oyo wabya akakania naghe omw’imubwira ebinywa ebyuwene n’ebikakiranaya. 14 Neryo omumalaika oyo wabya akakania naghe mwanibwira ati: “Ubughe omo mulenge muli uti, ‘Yehova w’emilondo ati: “Ngendilwira oko Yerusalema ne Sioni n’omuhwa, n’omuhwa munene. 15 Nihitene, nihitene kutsibu oko bihanda ebikere buholo, kundi nabya inihitene hake, aliwe ebihanda ebyo byamakanyia obuhanya.”’
16 “Busana n’ekyo, Yehova ati: ‘“Ngenditasyaghanyira Yerusalema, n’enyumba yaghe yikendihimbwa omo muyi oyo,” Yehova w’emilondo atya, “n’ekamba y’eripimamo yikendisyakakibwa oko Yerusalema.”’
17 “Kandi ubughe omo mulenge muli uti, ‘Yehova w’emilondo ati: “Emiyi yaghe yikendisyatasyusulamo ebyuwene; kandi Yehova akendisyatasyakirania Sioni, kandi akendisyatasyasombola Yerusalema.”’”
18 Enyuma sy’aho, munasumba ameso waghe, neryo munalangira amahembe ani. 19 Neryo munabulya omumalaika oyo wabya akakania naghe niti: “Bino ni bihi?” Mwanisubirya ati: “Aya w’amahembe awapanza-panza Yuda, Israeli, ne Yerusalema.”
20 Enyuma sy’aho, Yehova mwanikangania abafundi bani. 21 Munabulya niti: “Abandu aba bakasyakolaki?”
Mwanisubirya ati: “Aya w’amahembe awapanza-panza Yuda, erihika oko kika muhatabya oyo wangasumba omutwe wiwe. Abandi balya bakendisyasa n’erisaghisyabo, n’eritwa amahembe w’ebihanda ebyasumba amahembe wabyo bikalwa n’ekihugho kye Yuda, bitoke erikipanza-panza.”