Zekaria
6 Kandi munasumba ameso waghe, namalangira emitoka ini iyinemwasira omo kati-kati k’ebitwa bibiri; n’ebitwa ebyo byabya by’ekwivre.* 2 Omutoka w’erimbere abya akakurwa n’esyosabayiri* sy’erangyi y’omusasi, n’omutoka w’akabiri abya akakurwa n’esyosabayiri sy’ekirima.* 3 Omutoka w’akasatu abya akakurwa n’esyosabayiri* sy’omusohe,* n’omutoka w’akani abya akakurwa n’esyosabayiri sy’ebitanga-bitanga kandi esiriko ebitingu-bitingu.
4 Neryo munabulya omumalaika oyo wabya akakania naghe niti: “Mukama waghe, ebi ni bihi?”
5 Omumalaika mwanisubirya ati: “Emitoka eyo ni birimu bini by’elubula ebikahuluka byabimana embere sy’Omukama w’ekihugho kyosi. 6 Omutoka owakakurawa n’esyosabayiri* sy’ekirima* akaya omo kihugho ky’oko luhande lw’endata. Esyosabayiri sy’omusohe sikaya omo kihugho ekiri oko ghundi musirya w’engetse. N’esyosabayiri sy’ebitanga-bitanga sikaya omo kihugho ky’oko luhande lw’eyikwa. 7 N’esyosabayiri* esiriko ebitingu-bitingu syabya isyabirisasayira eriyalaba-laba omo kihugho.” Enyuma sy’aho, mwabwirasyo ati: “Muyalabe-labe omo kihugho.” Neryo musyatsuka erilaba-laba omo kihugho.
8 Enyuma sy’aho, mwanibirikira, amanibwira ati: “Tahie, esyosabayiri* esiryaya omo kihugho ky’oko luhande lw’endata syabirileka ekirimu kya Yehova ikyatulera omo kihugho ky’oko luhande lw’endata.”
9 Kandi Yehova mwakania naghe, amanibwira ati: 10 “Wimaye ebindu ebyo Heldai, Tobiya, na Yedaya balusaya oko banyewa. Ekiro ekyo, ukendisyaya omo nyumba ya Yosia mughala wa Zefania haghuma n’abandu abalyalua e Babiloni. 11 Ukendisyimya efeza* n’ehoro, neryo iwakokotya muyo mw’embita. Ukendisyahirayo oko mutwe w’omuhereri mukulu Yosua mughala wa Yehozadaki. 12 Enyuma sy’aho, ukendisyamubwira uti:
“‘ Yehova w’emilondo ati: “Oyu y’omulume oyukahulawa mo Risasa. Akendisyalasira omo mwanya wiwe wiwe, kandi akendisyahimba ehekalu ya Yehova. 13 Oyo yukendisyahimba ehekalu ya Yehova, kandi yukendisyahabwa olukengerwa. Akendisyikala oko kitumbi kiwe ky’obwami n’eritabala, kandi akendisyabya muhereri oko kitumbi kiwe ky’obwami. N’ebibiri ebyo bikendisyahulikirirana.* 14 N’embita* eyo yikendisyasighala omo hekalu ya Yehova mo kindu ekikendisyabya kikibukya emyatsi eyo Helemu, Tobiya, Yedaya, na Heni mughala wa Zefania bakola. 15 N’abandu abali hali bakendisyasa n’eriwatikya oko buhimbe bw’ehekalu ya Yehova.” Neryo oko kwenene-kwenene, mukendisyaminya ngoko Yehova w’emilondo yo wanituma okw’inywe. Emyatsi eyo yikendisyabya mwamabihulikirira ndeke-ndeke omulenge wa Yehova oMungu wenyu.’”