Ebaruha y’erimbere oko Abanya Korinto
16 Oko mwatsi w’erisongya-songya ebindu by’eriwatikyamo ababuyirire, mukwame obusondoli obo naha esyondeko sye Galatia. 2 Obuli kiro ky’ekwanza eky’eyenga, obuli mundu abike ekyo angabana. Mwamabikola mutya, isimwendibya mukasongya-songya ebindu nabihika. 3 Ngendibyanahika, inatuma e Yerusalema y’abandu abo mulyahira omo syo baruha syenyu batoke eritwalayo ebindu ebyo mulyasonga-songaya omwanza ryenyu. 4 Aliwe, namabilangira ini ky’omughaso erighenda nabo, itukendighenda haghuma.
5 Ngendibya nabilua e Makedonia, imo nahika ewenyu, kundi ngendilaba e Makedonia. 6 Nanganabugha ebiro bilebe haghuma nenyu, kutse nibya omughulu wosi w’embeho nene, neryo imwangananikwamanisya hake ininemuya eyo ngalola. 7 Sinanzire eribalolako hake n’erilw’inalaba. Nanzire inasighala nenyu omo biro bilebe, Yehova* amanza. 8 Aliwe, ngendisighala e Efeso erihika oko kiro kikulu ky’Epentekoste. 9 Kundi nasungireyo akanya k’erikola omubiiri munene, aliwe hali esyonzighu nyingyi.
10 Timoteo amabihika, imwamukokya ndeke. Kandi mukole ndeke haghuma naye. Sihabye ekyangaleka inyahangya-hangya omughulu ane nenyu. Anemukola omubiiri wa Yehova* ng’angye. 11 Isihabya omundu oyukamughonera. Mumuwatikaye atoke erihika eyo niri y’obuholo. Ingye n’abandi baghala betu tunemumulinda.
12 Nikwa munahatikana omughala wetu Apolo niti aye ewenyu haghuma n’abandi baghala betu. Alue isyapangire eryasa lino, aliwe akendisyasa abisunga endambi.
13 Muyiteghaye, musike omo bwikirirya. Mubye n’obutubaha,* kandi mubye n’akaghala. 14 Mukole emyatsi yosi y’omo lwanzo.
15 Baghala betu, munasi ngoko ab’omo kihanda kya Stefana bo batsuka erikirirya omo kiharo kye Akaya. Kandi babirikolera ababuyirire n’omutima wosi. 16 Ngabasaba niti mubye mukowa abandu ng’abo, n’abandu abakola kutsibu, n’abakakola haghuma nabo. 17 Nitsemire kundi Stefana, Fortinato, na Akaiko bane hano naghe. Banemuniwatikya kutsibu omo mwanya wenyu. 18 Babiritusikya mutima, ingye nenyu. Musikaye abandu ng’abo.
19 Esyondeko sy’omo Azia syamabaramukya. Akila na Priska* n’endeko eyikahindana omo nyumba yabo yamabaramukya kutsibu omo Mukama. 20 Abalikyetu bosi abali hano bamabaramukya. Muramukanaye omo lwanzo.*
21 Ingye Paulo namabaha obuholo. Hano n’ingye ngahandika.
22 Omundu amabya isyanzire Omukama, atakirawe. Kisi Mukama, wase. 23 Olukogho lw’Omukama Yesu lubye haghuma nenyu. 24 Nibanzire inywe bosi, inywe mukakwama Kristo Yesu.